Mattayo 19 - Sumu Yedi ya Isa Masiya 1906 Kitamo 1897 Malumbo 1905

¹ Ikaoka ekinaidiwe Yesu viteto ivi, efumie Galilaya, akaza na mihaka ya Uyahudi sela ya Yardani;

² Matorano mabaha wakamratera, akawahodja uko.

³ Wafarisayo wakamzia wekimghesha na wekiteta, Ni kyedi mundu amshighe mche wakwe hena lukake lose?

⁴ Akatalwa, akaghamba, Tomsomie ti ye ewaarehe kuwoka ewaarehe wa kiume na wa kiche,

⁵ Akaghamba, Hena lwa iyo mundu eneshigha wawee na mee, na enegurana na mche; na weri weneoka muri mwe?

⁶ Huwo si weriwowa, kake muri mwe. Amu iyo Izuwa ekilunganya, mundu asighawe.

⁷ Wamburra, Nize Musa eaghanyie kung’ola khati ya kutana, na kumshigha?

⁸ Awawurra, Musa amu ya kuoka ngoro jenyu jidindie amuingie kushigha wache wenyu; kake too kuwoka si huwo.

⁹ Kake namburra, ti mundu emshigha mche, nde hena kushinda, na kumwaika ungi, ashinda; naye emwaika ula ashighwa ashinda.

¹⁰ Waanalosha wamburra, Vindu vya mundu na mche vikioka huwo, tokuwe kuaika.

¹¹ Akawawurra, Si wose weidima kukiuhia kiteto iki; nde wala weingwa.

¹² Amu weoho weshaniwe, wewonwa huwo kufuma ndeni ha mee; weohowa weshaniwe weoshwa weshaniwe ni wandu; weohowa weshaniwe wekuosha weshaniwe hena lwa ufumwa wa wanga. Ula aidima kuuhia, auhie.

¹³ Akaetewa hala waana, nesa awagere mikono, na aombe; waanalosha wakawabohia.

¹⁴ Kake Yesu eghambie, Washigheni waana wadongo, nete musiwaswije, kunizia; amu wala sa awa, wawo ni ufumwa wa wanga.

¹⁵ Akawagera mikono, akafuma na uko.

¹⁶ Na yoa, mundu emzia akaghamba, Mlosha, nikini kyedi ninekiareha, nesa niwone moo wa ndarasi?

¹⁷ Akamburra, Nikini waniwujanya mburi ya kyedi? Mwe niye wedi; kake ukakunda kuingia ghati ya moo, magura maaghanyo.

¹⁸ Amburra, Mahi? Yesu akamburra, Usikome, Usishinde, Usihiwe, Usichunganje na maongo,

¹⁹ Uwagurie nganyi waweo na mamako, na, Umkunde walatya wako sa ngoro yako.

²⁰ Mbwange amburra, Ama mose namagura: Nikiniwa naduhuka.

²¹ Yesu akamburra, Ukakunda kusheneta, tonga tagha mali yako, urewainga wakiwa; na uneoka na vindu vyedi wanga; izowa, niratera.

²² Mbwange ekinasikie kiteto akatonga hakwe na kushiniwa; amu eokie na mali nyingi.

²³ Yesu akawawurra waanalosha wakwe, Kididi namburra, ti hena wukiwa mmazi eneingia na ufumwa wa wanga.

²⁴ Namburrawa, Ni anguhe ngamela avetie iworo la sindano, kukela mmazi aingie na ufumwa wa wanga.

²⁵ Wekinasikie waanalosha wakarighiwa muno, wekiteta, Nianiwa aidima kukijwa?

²⁶ Yesu ekiwayoa akawawurra, Hena wandu hiki tekidimika, kake hena Izuwa vyose vyaidimika.

²⁷ Akatalwa Petro, akamburra, Yoa, uswi twashigha vyose, tukakuratera: tunewona kiniwa?

²⁸ Yesu akawawurra, Kididi namburra, ti unywi muniratera, ghati ya kuwoneka kwa keri eneikaeikae mwana wa mundu ghati ya kichumbi cha kirumi chakwe, na unywi muneikaa wanga ya vichumbi ikumi na viri mukijichilia mbare ikumi ja Israeli.

²⁹ Na mundu ose eshigha nyumba, kana wandwawo, kana warumburie, kana wawee, kana mee, kana waana, kana miteme, hena lwa izina langu, eneuhia kandu kaighana, na enehodja moo wa ndarasi.

³⁰ Kake weingi wa kuwoka weneoka wa kuidiwika, na wa kuidiwika weneoka wa kuwoka.