Mattayo 18 - Sumu Yedi ya Isa Masiya 1906 Kitamo 1897 Malumbo 1905

¹ Magheri mala waanalosha wakamzia Yesu wekighamba, Niani niye mbaha ghati ya ufumwa wa wanga?

² Akaitanga kamwana akamgera ghati yawo,

³ Akaghamba, Kididi namburra, ti msikachwe‐mti muoke sa waana, tomuneingia na ufumwa wa wanga.

⁴ Amu ii ose enekuseja mwenye sa kamwana aka, uu niye mbaha ghati ya ufumwa wa wanga.

⁵ Na ose euhia kamwana kamwe sa aka hena izina langu, eniuhia mi.

⁶ Na ose emtekwesha mwe wa awa wadongo weniitikija mi, keba hena ye, ibwe la kushaghia ibaha lichungwe singoni hakwe, naye amerukijwe ghati ya mawongo ma ndiwa.

⁷ Wukiwa masangeni amu ya matekwesho: amu tehena huwo matekwesho maze: kake wukiwa hena mundu ula hena lwakwe matekwesho maza.

⁸ Kwakicha mkono wako kana kughuu kwako kwakutekwesha, ukuchwe, ukutaghe hae: keba hako kuingia na moo kirema kana ukichingilika, kukela mwenye mikono miri kana maghuu meri kutaghwa ghati ya jehannum ya moto.

⁹ Na kwakicha ijiso lako lakutekwesha, uling’ole, ulitaghe hae: keba hako kuingia na moo na ngenge, kukela mwenye meso meri kutaghwa ghati ya jehannum ya moto.

^10-11 Mukuyoe musidae mwe awa wadongo; amu namburra, ti malaika wawo wanga misi yose wauyoa wusho wa Apa wangu eoho wanga.

¹² Mwawonaze? kwakicha mundu awona maghonji ighana, na imwe lawo lineteka, temashigha mala makumi kenda na kenda, na atonga nduwini, na alienda lila lateka.

¹³ Na ekiliwona, kididi namburra, ti eizihirwa wanga ila, kukela wanga mala makumi kenda na kenda mesiteke.

¹⁴ Huwo tekikundika msongorana wakwe Waweo wenyu eoho wanga, ti mwe wa awa wadongo ateke.

¹⁵ Kwakicha mundwenyu akuketia ng’oki, tonga uarehiane naye, we na ye wenye; kwakicha akusikia, wambona mundwenyu.

¹⁶ Kwakicha esikakusikie, tikawa nawe mwe kana weri, nesa hena itumbu la wewoni weri kana watatu, kiteto chose kiimushwe.

¹⁷ Kwakicha asiwasikia awa, uwawurre kanisa; na kwakicha asiwasikia kanisa, aoke hako sa mwe wa Mbare na mwuhi lushango.

¹⁸ Kididi namburra, Vyose muneikamuvichunge masangeni vineoka vyachungwa wanga, na vyose muneikamuvichungua masangeni vineoka vyachunguka wanga.

¹⁹ Namburrawa, ti weri wenyu weneikawearehana masangeni hena kindu chose weneomba, kineoka hawo hena Apa wangu eoho wanga.

²⁰ Amu handu weri kana watatu weoho wekiwunganyika hena izina langu, niho nioho ghati na ghati yawo.

²¹ Magheri mala Petro akamzia akamburra, Mzuri, kandu ako mundwetu ekinitekwia, nimshighie? mtano kando kafungate?

²² Yesu amburra, Sikuwurra, mtano kando kafungate, nde mtano kando makumi fungate kando kafungate.

²³ Amu ii ufumwa wa wanga wafwanana na mundu mfumwa, ekundie kuareha kutara na wazoro wakwe.

²⁴ Ekinawoke kuareha, akaetwe hakwe msile mwe eawa naye talanta maghana ighana.

²⁵ Naye esioke na kindu cha kuihia, mzuri wakwe akaaghanya ataghwe, na mche wakwe na waana, na vyose eokie navyo, sile ihwe.

²⁶ Amu ii muzoro akagwa akamsemba, ekiteta, Mzuri, unigumirie, nami ninekuiha pia.

²⁷ Mzuri wa mzoro ula akamsaria, akamchungua, akamshighia sile ila.

²⁸ Mzoro ula akafuma akawona mwe wa waghenje wakwe, eawa naye ya denari ighana, akamgura, akamnyama, ekiteta, Iha uawa.

²⁹ Amu ii mughenje akagwa akamsemba ekiteta, Unigumirie, nami ninekuiha.

³⁰ Naye akasua, akatonga akamgera kichungoni, mtano eneikaeihe sile.

³¹ Amu ii waghenje wekinawone vila viarehika wakashiniwa muno; wakatonga wakamburra mzuri wawo vyose viarehika.

³² Mzuri wakwe akamwitanga akamburra, Mzoro mbiwi, nakushighia sile ila yose, ukinanisembe;

³³ Teikuwe na we kumsaria mughenji wako sandu na mi nikusarie we?

³⁴ Mzuri wakwe akaregija akamng’ola hena warishi wukiwa, mtano eneikaeihe sile yose.

³⁵ Huwo na Apa wangu wa wanga enemketa unywi, msikashighie mundu ose mundwawo ngoroni henyu.