Mattayo 17 - Sumu Yedi ya Isa Masiya 1906 Kitamo 1897 Malumbo 1905

¹ Kutera kwa misi mitandatu Yesu akawatika Petro na Yakobo na Yohana mundwawo; awaete wanga ya nduwi mbaha wenye.

² Akagharushwa msongorana wawo, wusho wakwe ukang’aa sa zano, na suke jakwe jikaoka nyewa sa kiangaji.

³ Na yoa, wakawafumia Musa na Eliya wekiteta naye.

⁴ Petro akatalwa akamburra Yesu, Mzuri, ni chedi uswi tuoke kunu; Ukakunda tuneareha maanda matatu, imwe lako, imwe la Musa, limwe la Eliya.

⁵ Ekioka ekiteta huwo, Yoa, ijumbi laangaja likawagera mvuri; na yoa, ighonda kufuma na ijumbi, likiteta, Uu niye mwana wangu mkundwa, naisejwa naye; msikieni.

⁶ Wekinasikie waanalosha wakagwa si, wakaituka muno.

⁷ Yesu ekiza akawakuwara ekiteta, Wukeni, nete musiituke.

⁸ Wakawushija meso, wasiwone mundu, nde Yesu mjenye.

⁹ Na wekinaoke wekisea nduwini Yesu akawaaghanya, ekiteta, Msimburre mundu ndoto, mtano Mwana wa mundu eneikaruke ghati ya wefwie.

¹⁰ Wakambujanya waanalosha wakwe wekiteta; Amu ii nikini watami waghamba, ti yambe Eliya kuza ini?

¹¹ Akatalwa akaghamba, Eliya eza, na eneareha vyose:

¹² Kake namburra, ti Eliya eidiwa kuza, na tewemtisiwe, kake wamwarehie sandu wekundie; huwo na Mwana wa mundu enerishwa wukiwa nawo.

¹³ Waanalosha wakatwarija, ti ewawurre mburi ya Yohana Mbatizaji.

¹⁴ Na wekinawazie matorano mundu akamzia ekimdung’utia na ekimburra,

¹⁵ Mzuri, umsarie mwana wangu, amu awukwa na arishwa wukiwa muno; amu keingi agwa motoni, na keingi mbombeni.

¹⁶ Nikamwete hena waanalosha wako, wasiidime kumhodja.

¹⁷ Yesu akatalwa akaghamba, Irika lisina luitikijo na libangabanga mtano rini nineoka na unywi? mtano rini ninetikana na unywi? Unietie uo na kunu.

¹⁸ Yesu akambohia, luhungu lukafuma hakwe, mwanake akahodjwa too saa ila.

¹⁹ Waanalosha wakamzia Yesu hena ngiliwata wakaghamba, Nikini uswi totuidime kulukinya ulu?

^20-21 Awawurra, Amu ya luitikijo lwenyu kuoka ludongo. Amu kididi namburra, Kwakicha muna luitikijo sa ndembe ya kyardali, muneiwurra nduwi ii, Fuma uko kutonga kula, inefuma; nete tehena musikiidima.

²² Wekinaoke wekiikaa Galilaya Yesu akawawurra, Mwana wa mundu eneng’olwa mkononi ha wandu.

²³ Nawo wenemkoma, na musi wa katatu enerushwa. Wakashiniwa muno.

²⁴ Wekinaze Kapernaum wala weuha didrakma wakamzia Petro, wakamburra, Mlosha wenyu teiha didrakma? Eghamba, Ee.

²⁵ Ekinaingie nyumbeni, Yesu akamburra ini, ekiteta, Wawonaze, Simon? Wafumwa wa masanga wauha lushango kana lukamba hena wandu ani? Hena waana wawo, kana hena wagheni?

²⁶ Ekighamba, Hena wagheni, Yesu akamburra, Huwo wala waana teweiha.

²⁷ Kake nesa tusiwashishirra, tonga ha ndiwa ugere kiloo, na wushija nguluma ila yakwea kuwoka: Na ukichungua itumbu lakwe unewona statera: ukiiuha ii uwainge hena mi na we.