Mattayo 15 - Sumu Yedi ya Isa Masiya 1906 Kitamo 1897 Malumbo 1905

¹ Magheri mala wakamzia Yesu kufuma Yerusalemi Wafarisayo na watami, wekiteta,

² Nikini waanalosha wako tewegura mauhio ma waghosi? amu tewekuoja mikono wekila kidjo.

³ Akatalwa akawawurra, Nikini na unywi mwalubaa luaghanyo lwa Izuwa hena mauhio menyu?

⁴ Amu Izuwa etetie, Uwagurie nganyi waweo na mamako; na Ula emrigha wawee kana mee ekifwa afwe.

⁵ Kake unywi mwaghamba, Ula enemburra wawee kana mee, Ni itasi, chose mwaidima kuwona hena mbucha hangu,

⁶ Asimgurie nganyi wawee: na mwanyamara kiteto chakwe Izuwa hena mauhio menyu.

⁷ Wakeleki, nezo Isaya emurotia, ekighamba,

⁸ Wandu awa waniguria nganyi na miomo, kake ngoro yawo ni hae hangu.

⁹ Kake waniomba huwo, wekilosha malosho maaghanyo ma wandu.

¹⁰ Akawaitanga matorano, akawawurra, Sikieni na twarijeni,

¹¹ Si kila chaingia itumbuni ha mundu chamgera mundu ikwe; kake kila chafuma itumbuni, iki chamgera mundu ikwe.

¹² Waanalosha wakaza wakamburra, Watisiwa ti Wafarisayo wakashishirwa wekikisikia kiteto?

¹³ Akatalwa akaghamba, Chose chahandwa, kisihandwe ni Apa wangu eoho wanga, kinekuluka.

¹⁴ Washigheni; niwo warongori webajike‐meso: ebajike‐meso ekimtika ebajike‐meso, wenegwa iwongoni wose weri.

¹⁵ Petro akatalwa akamburra, Utuwurre mfwanano na some.

¹⁶ Akaghamba, Mtano na unywi tomuna kucha?

¹⁷ Tomutisiwa ti chose chaingia itumboni chatonga matumboni, na chang’olwa ghati ya kubalia.

¹⁸ Kake vila vyafuma itumbuni chafuma ngoroni; navyo nivyo vyamgera mundu ikwe.

¹⁹ Amu ngoroni mafuma makusaro mawiwi, kukoma, kushinda, vindu vya mbuyaa, kuhiwa, kuchwia maongo, kurigha;

²⁰ Na ama nimo mamgera mundu ikwe. Kake kula esimeoja mikono tokumgera mundu ikwe.

²¹ Na ekifuma uko Yesu akatonga na mbai ya Turo na Sidona.

²² Na mche Msamaria wa mihaka ila akafuma akaloza ekiteta, Unisarie, Mzuri, mwana wa Daudi, mwana wangu wa kiche erishwa wukiwa ni luhungu.

²³ Naye temtalua kiteto. Waanalosha wakwe wakaza wakambujanya wekiteta, Umsame, amu eiya nyuma yetu.

²⁴ Akatalwa akaghamba, Siingijwe nde hena maghonji metekie ma nyumba ya Israeli.

²⁵ Akaza akamwinamia, ekighamba, Mzuri, unighenje.

²⁶ Akatalwa akaghamba, Si chedicho kuuha kidjo cha waana, na kujitaghia nguro.

²⁷ Akaghamba, Ee, Mzuri; amu na nguro jila malumong’o megwie mezeni ha wazuri wawo.

²⁸ Yesu akatalwa akamburra, Mche, luitikijo lwako ni lubaha; uwone sandu ukundie. Mwana wakwe akahodjwa too saa ila.

²⁹ Yesu akafuma uko akafika mbai ya ndiwa ya Galilaya, akakwea nduwini akaikaa uko.

³⁰ Matorano meingi wakamzia, wenye wechingilika, webajike‐meso, bubu, virema, na wengi weingi, wakawagera maghuuni hakwe; akawahodja.

³¹ Mtano matorano wakarighiwa wekiwona bubu wekiteta, virema wazima, wechingilika wekisela, na webajike‐meso wekiwona: wakamrumisha Izuwa wa Israeli.

³² Yesu akawaitanga waanalosha wakwe akaghamba, Nawasaria matorano, amu ingeriaha waikaa nami misi mitatu, na tewena cha kula; na sikundie mi kuwasama wenye nzaa nesa wasisokea nzieni.

³³ Waanalosha wakamburra, Tuwonehi shighati mabumunda meingi, mtano kuighusha matorano mabaha sa ama.

³⁴ Yesu awawurra, Mabumunda amo muhete? Wakaghamba, Mafungate na nguluma ndongo si nyiingi.

³⁵ Akamaaghanya matorano waikae si.

³⁶ Akamauha mabumunda mafungate na nguluma, akang’ola haika akabaa, akawainga waanalosha, waanalosha wakawainga matorano.

³⁷ Wakala wose, wakaighushwa; wakatika mashighajiko ma malumong’o, mbinda fungate jaizue.

³⁸ Wala welie wakaoka wome maghana makumi manne, na wachewa na waana.

³⁹ Akamasama matorano akakwea na ngalawa, akaza isanga la Magada.