Mattayo 14 - Sumu Yedi ya Isa Masiya 1906 Kitamo 1897 Malumbo 1905

¹ Magheri mala Herode tetrarka akasikia kirumi chakwe Yesu,

² Akawawurra wazoro wakwe, Uu niye Yohana Mbatizaji; atewuka kufuma wefwie, na amu ii vindu vibaha vyaketika niye.

³ Amu Herode emgurie Yohana, akamchunga, akamgera kichungoni hena lwa Herodiada mche wakwe Filipo mundwawo:

⁴ Amu Yohana emburrire, Si chedicho hako kumhete.

⁵ Na ekikunda kumkoma akaituka wandu, amu wemgurie sa mroti.

⁶ Kake musi wa kuwoneka kwakwe Herode ukinafike mwana we kibora wakwe Herodiada esekie ghati na ghati, akamwiseja Herode.

⁷ Amu ii akatemiana kena kurara kumwinga chose eneomba.

⁸ Naye ekiingijwa ni mee, aghamba, Uniinge aha na mwanje mtwi wakwe Yohana Mbatizaji.

⁹ Mfumwa akashiniwa, kake hena lwa kurara kwake nawo weikaa naye akaaghanya aingwe;

¹⁰ Akaingija akamchwia mtwi Yohana kichungoni.

¹¹ Mtwi wakwe ukaetwe na mwanje, mbora akaingwa, akamtikia mee.

¹² Waanalosha wakwe wakatonga wakawushija mning’a, wakaujika wakatonga wakamburra Yesu.

¹³ Ekinasikie Yesu akafuma uko ngalaweni mtano handu hesina wandu mwenye: matorano wekinasikie wakamratera na maghuu kufuma viongo.

¹⁴ Ekinafume akawona matorano meingi, akawasaria, akawahodja wewadjua wawo.

¹⁵ Hekinaoke chamagheri waanalosha wakamzia wekighamba, Handu aha hesina wandu, na ingeriaha haswa; uwasame matorano, nesa wekitonga ghati ya kaa wakuzorie kidjo.

¹⁶ Yesu akawawurra, Teiwawe kutonga; unywi muwainge kula.

¹⁷ Wakamburra, Totuna kindu kunu nde mabumunda masano na nguluma mbiri.

¹⁸ Akaghamba, Nietieni na kunu.

¹⁹ Akaaghanya matorano kuikaa si ghati ya mani, akamauha mabumunda masano na nguluma mbiri, akayoa wanga izuwa, akang’ola haika, akamabaa, akawainga waanalosha mabumunda, waanalosha wakawainga matorano.

²⁰ Wakala wose, wakaighuta: wakatika mashighajiko ma mabumunda mabaike, mbinda ikumi na mbiri jaizua.

²¹ Wala welie wakaoka wome sa maghana makumi masano, na wachewa na waana.

²² Chwi akawasuija waanalosha kukwea ngalaweni, na kumrongoria kutonga sela ya keri, ekiwasama matorano.

²³ Ekinaidiwe kuwasama matorano akakwea nduwini kuomba mwenye; hekinaoke chamagheri akaoka uko mwenye.

²⁴ Ngalawa ikaoka ghati na ghati ya ndiwa, ikabighwa muno na visibwe, amu ya ngungu kuoka mbiwi.

²⁵ Na lukamba lwa kanne lwa kio akawazia ekisela wanga ya ndiwa.

²⁶ Waanalosha wekimbona esela wanga ya ndiwa wakaituka, wekiteta ti ni kivuri: wakaloza hena fole.

²⁷ Chwi Yesu akateta nawo, ekighamba, Ngoro jenyu jidinde; nimi; musiituke.

²⁸ Petro akatalwa akamburra, Mzuri, kwakicha niwe, uniaghanye nize hako wanga ya mbombe.

²⁹ Akamburra, Izo. Naye Petro ekinasee kufuma ngalaweni akasela wanga ya mbombe, kutonga hakwe Yesu.

³⁰ Ekiwona ngungu akaituka, na ekiwoka kumerukia akaloza, ekiteta, Mzuri, unikije.

³¹ Chwi Yesu akauronga mkono akamgura, amburra, We wa luitikijo ludongo, hena kini mwaitalwa.

³² Wakakwea ngalaweni, ngungu ikahuja.

³³ Wala ngalaweni wakamwinamia, wekiteta, Kididi niwe Mwana wa Izuwa.

³⁴ Wekinaidiwe kukela wakalifikia isanga la Genesareti.

³⁵ Wakamtwarija wandu wa handu hala, wakaingija ghati ya isanga lose la mbai na mbai, wakamwetie wose weokie wewadjua:

³⁶ Wakamsemba, wakuware tiki lutiriwo lwa suke yakwe; na wose welukuware wakahodjwa pia.