Mattayo 12 - Sumu Yedi ya Isa Masiya 1906 Kitamo 1897 Malumbo 1905

¹ Magheri mala Yesu akavetia ghati ya miteme musi wa sabato: waanalosha wakasikia nzaa, wakawoka kutunda vishamwale na kula.

² Wafarisayo wekinawone wakaghamba, Yoa, waanalosha wako waketa sa si chedi kuketa musi wa sabato.

³ Akawawurra, Tomusomie sandu eketie Daudi, ekinasikie nzaa, na wala hamwe naye?

⁴ Ti eingie nyumba ya Izuwa, akala mabumunda ma luwondjo, namo si chedi hakwe kula, nete hawo hamwe naye, nde hena wakohani wenye?

⁵ Kana tomusomie ghati ya wuchili, ti musi wa sabato wakohani hekaluni waibaa sabato, wasiwone ng’oki?

⁶ Kake namburra, ti mbaha kukela musi wa sabato eoho kunu.

⁷ Kake kwakicha mutisiwe iki nikini, Nakunda lusario nete si itasi, kwakicha tomkiwachilia wesina ng’oki.

⁸ Amu Mwana wa mundu ni mzuri wa musi wa sabato.

⁹ Na ekifuma uko akaza na isunagogi lao.

¹⁰ Na yoa, mundu mwenye mkono wa kuwia; wakambujanya wekiteta, Ni chedi kuhodja musi wa sabato? nesa wamlinganye.

¹¹ Akawawurra, Eneoka mundu ani wenyu, eneoka na ighonji imwe, na kwakicha lagwa na iwongo musi wa sabato, esiligura na esiliwushija?

¹² Huwo mundu si wa kukela muno ighonji; amu ii ni chedi kuketa nezo musi wa sabato.

¹³ Akamburra mundu, Ronga mkono wako, Akauronga; ukagharuka kuoka mzima sa wa keri.

¹⁴ Wafarisayo wakatonga wakateta mburi wanga yakwe, nesa wamteshe.

¹⁵ Yesu akatisiwa akafuma uko, weingi wakamratera, akawahodja wose.

¹⁶ Akawaaghanya, wasimtinde.

¹⁷ Nesa kifike kila kitetiwe ni mroti Isaya, ekiteta,

¹⁸ Yoa, mwana wangu nimsawure; mkundwa wangu, eizihira ngoro yangu; nawika Ngoma yangu wanga yakwe, na enewatindia Mbare wuchili.

¹⁹ Tenehirija nete teneiya; nete mundu tenemsikia ighonda lakwe nzieni.

²⁰ Ighughu litunyuke tenelibaa, nete mashashi meng’ola moshi tenemajimisha, mtano eneikaeng’ole wuchili hena kulela.

²¹ Na izina lakwe Mbare weneliing’idaki.

²² Akaetewa mwenye luhungu ebajikemeso na bubu: akamhodja, mtano bubu akateta akawona.

²³ Matorano mose wakarighiwa wakaghamba, Uu siye mwana wa Daudi?

²⁴ Wafarisayo wekisikia wakaghamba, Uu tekinya maluhungu nde hena Beelzebul njama wa maluhungu.

²⁵ Ekitisiwa makusara mawo akawawurra, Ufumwa wose waghawanyika ghati yakwe wanyamarika, na kiongo chose kana nyumba ikighawanyika ghati yakwe teineimuka:

²⁶ Na kwakicha Shetani emkinya Shetani, eghawanyika ghati yakwe: ufumwa wakwe uneimukaze?

²⁷ Na kwakicha mi nakinya maluhungu hena Beelzebul, waana wenyu wakinya hena kini? Amu iki weneoka wachili wenyu.

²⁸ Kake kwakicha mi nakinya maluhungu hena Ngoma ya Izuwa, huwo ufumwa wa Izuwa wamzia.

²⁹ Kana aidimaze mundu kuingia nyumbeni ya mwenye zinya, na kutika mali yakwe, esimemchunga ini mwenye zinya? ikuade enetika nyumba yakwe.

³⁰ Mundu esioke hamwe nami, ni wanga yangu, na mundu esiwunganya nami emiza.

³¹ Amu ii namburra ng’oki na blasfemia jose jineshighika hena wandu; kake blasfemia wanga ya Ngoma teineshighika.

³² Na ose eneteta kiteto wanga ya Mwana wa mundu, kineshighika hakwe: kake ose eneteta kiteto wanga ya Ngoma Mshenete, tekineshighika hakwe, nete ghati ya masanga ma ingeriaha nete ghati ya mala ma akenya.

³³ Areheni mti wedi na ndunda yakwe yedi, kana areheni mti mbiwi na ndunda yakwe mbiwi, amu mti utisiwika hena ndunda.

³⁴ Waana wa nyoka, mwaidimaze mukioka wawiwi kuteta vindu vyedi? amu hena wiingi wa ngoro itumbu lateta.

³⁵ Mundu wedi ghati ya mali yedi eng’ola vyedi; na mundu mbiwi ghati ya mali mbiwi eng’ola viwiwi.

³⁶ Namburra, Kiteto chose cha huwo wandu wenekighamba, weneng’ola mburi yakwe musi wa kuchiliwa.

³⁷ Amu hena viteto vyako unewonwa wa ngalo, na hena viteto vyako unechiliwa.

³⁸ Magheri mala wengi wa watami na Wafarisayo wakamtalwa wakiteta, Mlosha, twakunda kuwona luwano hako.

³⁹ Akatalwa akawawurra, Irika iwiwi na la kushinda laenda luwano; na tehena luwano lineingwa, nde luwano lwa mroti Yunus.

⁴⁰ Amu sa Yunus eokie ndeni ha nyamgumi misi mitatu, hemusi na kio, huwo mwana wa mundu eneoka ngoroni ha si misi mitatu hemusi na kio.

⁴¹ Wandu wa Ninawi weneimuka ghati ya kuchiliwa hamwe na wandu wa irika ili, na wenelichilia: amu wechwie‐mti hena lutindo lwakwe Yunus, na yoa, emkelie Yunus ni aha.

⁴² Mfumwa wa kiche wa kusini enewuka ghati ya kuchiliwa hamwe na irika ili, na enelichilia: amu ezie kufuma mihaka ya masanga asikie kucha kwakwe Sulemani, na yoa, emkelie Sulemani ni aha.

⁴³ Luhungu luwiwi lukifuma mundu, lwavetia ghati ya handu hesina mbombe lukienda lusowoko, lusiluwone.

⁴⁴ Ikuade lwaghamba, Ninehunduka nyumbeni hangu nifumieho: na ekiza lwaiwona isina kindu, ihaiwa, ihambwa.

⁴⁵ Ikuade lwatonga na lwatika hamwe nalo maluhungu mengi mafungate mawiwi kulukela lwenye, namo meingia na meikaa uko: na vindu vya kuidiwa vya mundu ula vyaoka viwiwi kukela vila vya kuwoka. Huwo ineoka hena irika ili iwiwi.

⁴⁶ Ekinaoke ekiteta na matorano, yoa, mee na wandwawo wakaimuka shighati wekikunda kuteta naye.

⁴⁷ Mundu akamburra, Yoa mamako na wandwenyu waimuka shighati wekikunda kuteta nawe.

⁴⁸ Akatalwa akamburra ula eteta naye, Niani iya wangu? na niwani wandwetu?

⁴⁹ Akaronga mkono wakwe hena waanalosha wakwe akaghamba, Yoa iya wangu na wandwetu:

⁵⁰ Amu ose eneareha wundu ekundie apa wangu eoho wanga, niye mundwetu na rumburia na iya.