Mattayo 11 - Sumu Yedi ya Isa Masiya 1906 Kitamo 1897 Malumbo 1905

¹ Ikaoka ekinaidiwe Yesu kuwaagbanya waanalosha wakwe ikumi na weri, efumie uko akatonga kulosha na kutinda ghati ya viongo vyawo.

² Ekinasikie Yohana kichungoni ndima ya Masihi, akaingija waanalosha wakwe,

³ Akamburra, Niwe ula eza, kana tumyoyie ungi?

⁴ Yesu akatalwa akawawurra, Tongeni mumlie Yohana mburi ya vindu muvisikia na muviwona;

⁵ Webajike‐meso wawona, wechingilika wasela; wesumura wazerrika, waming’ani wasikia; wefwie warushwa, wakiwa watindiwa sumu yedi:

⁶ Na etasiwa ula esishishirwa nami.

⁷ Nawo wekitonga, Yesu akawoka kuwawurra matorano mburi yakwe Yohana, Nikini mufumie shighati kuyoa? ighughu likidedemishwa na ngungu?

⁸ Kake nikini mufumie kuyoa; Mundu edokiwe bafta. Yoa wala wedoka bafta weoho nyumbeni ha wafumwa.

⁹ Kake nikini mufumie? kuyoa mroti? Ee, namburra, na wa kukela mroti.

¹⁰ Uu niye etamiwe, Yoa, namtuma mwondo wangu msongorana wako, enearehia nzia yako msongorana wako.

¹¹ Kididi namburra, Ghati ya wawonwa ni wache temewuka mundu mbaha kukela Yohana Mbatizaji: kake mdongo ghati ya ufumwa wa wanga ni mbaha kukela ye.

¹² Too misi ya Yohana Mbatizaji mtano yoo ufumwa wa wanga waketwa ni zinya, na wandu wa zinya waugura.

¹³ Amu waroti wose na wuchili warota mtano Yohana.

¹⁴ Na mukikunda kukiuhia, uu niye Eliya, ula eneikaeze.

¹⁵ Mwenye masikio ma kusikia, asikie.

¹⁶ Na kini ninefwanyanya irika ili? Lafwanana na waana weikaa vichindeni, wekiwaiyia waghenje,

¹⁷ Wekiteta, Twamubighia mitorito, musitoroka; twaiya, musishiniwa.

¹⁸ Amu Yohana ezie esile nete esinywe, na waghamba, Ena luhungu.

¹⁹ Mwana wa mundu ezie ekila na ekinywa, na waghamba, Yoa, mundu ekunda kula na mwengea, mbuyaa wa wauhi lushango na wenye ng’oki! Na kucha kwaisiswa nezo hena ndima yakwe.

²⁰ Akawoka magheri mala kuvibohia viongo, viarehikaho mihiro yakwe mibaha, amu tevichwa‐muti.

²¹ Wukiwa hako, Korazin! Wukiwa hako, Betsaida! Amu kwakicha ghati ya Turo na Sidon iarehike mihiro mibaha ila, iarehike henyu, kwakicha wekichwa‐muti kae ghati ya sako na maivu.

²² Kake namburra, hena Turo na Sidon ineoka kutikika musi wa kuchiliwa kukela henyu.

²³ Nawe Kapernaum, unekwejwa mtano wanga? Unesea mtano ahera: amu kwakicha mihiro mibaha ila iarehika hako iarehike ghati ya Sodoma, kwakicha ikiikaa mtano yoo.

²⁴ Kake namburra, hena Sodoma ineoka kutikika musi wa kuchiliwa kukela hako.

²⁵ Magheri mala akatalwa Yesu akaghamba, Nakuinga haika, Apa, Mzuri wa wanga na wa masanga, amu wawawisia wenye kucha na wechee vindu ivi, ukawajughuiya waana.

²⁶ Ee, Mzuri, amu nihuwo iokie kuiseja msongorana wako.

²⁷ Vyose nang’oliwa ni Apa wangu: nete tehena mundu emtisiwe Mwana, nde Apa; nete temtisiwe mundu Apa, nde Mwana, naye ose Mwana akunda kumjughuiya.

²⁸ Izoni hangu, unywi wose wenye ndima nyingi na mubundika, nami ninemusowosha.

²⁹ Kugereni kighogho changu, murekulosha hangu, amu mi ni mhoo na wa kinyenya ngoroni, na munekuwonia lusowoko ngoroni henyu.

³⁰ Amu kighogho changu kinyoiye, na mwagho wangu uanguhe.