Mattayo 10 - Sumu Yedi ya Isa Masiya 1906 Kitamo 1897 Malumbo 1905

¹ Akawaitanga waanalosha wakwe ikumi na weri, akawainga zinya wanga ya maluhungu mawiwi, wamakinye, na wahodje ndwari jose na wufaa wose.

² Na mazina mawo waondo ikumi na weri ni ama; wa kuwoka Simon eitangwa Petro, na Andrea mundwawo; Yakobo wa Zebedayo, na Yohana mundwawo;

³ Filipo na Bartolomayo; Tomaso na Mattayo mwuhi lushango; Yakobo wa Alfayo na Thaddayo;

⁴ Simon Mkananaya, na Yuda Iskariota, niye emng’olie.

⁵ Awa ikumi na weri Yesu akawaingija akawaaghanya, ekiteta, Ghati ya nzia ya Mbare musitonge, nete ghati ya kiongo cha Wasamariya musiingie;

⁶ Keba mutonge hena maghonji metekie ma nyumba ya Israeli.

⁷ Na ghati ya nzia tindeni, mukighamba, Ufumwa wa wanga wasongeria.

⁸ Hodjeni wala wewadjua, rusheni wefwie, zerrijeni wenye kusumura, kinyeni maluhungu; mwauhia huwo, ng’oleni huwo.

⁹ Musitike thahabu nete fetha nete shaba ghati ya ngana jenyu;

¹⁰ Nete kikuchu cha kuzokia, nete kanzu mbiri, nete viratu, nete isibo; amu yambe mhiri awahache yakwe.

¹¹ Na kiongo chose kana kaa mwaingiaho, endeni niani eoho aidima, ikaeni uko mtano muneikamufume.

¹² Na mukiingia nyumbeni, ikezieni.

¹³ Na nyumba ikioka yedi, luworo lwenyu luizie; kake kwakicha si yedi, luworo lwenyu lumugharukie.

¹⁴ Na mundu esimtigha, nete esivisikija viteto vyenyu, mkifuma na shighati ya nyumba kana kiongo kila mukutekute hae purughushe ioho maghuuni henyu.

¹⁵ Kididi namburra, ineoka kutikika hena Sodoma na Gomorra musi wa wuchili kukela hena kiongo kila.

¹⁶ Yeoni, namwingija sa maghonji ghati ya mabau; amu ii muoke wechee sa nyoka, na wazerre sa mabeta.

¹⁷ Mukuyoe hena wandu; amu wenemung’ola hena sunedrim, na ghati ya masunagogi wenembigha:

¹⁸ Munetikwa msongorana wa wachili na wafumwa hena lwangu, hena luwonjo‐mburi lwa Mbare.

¹⁹ Weneikawemung’ole, musikurisha wukiwa viteto ani kana kini muneteta; amu muneingwa saa ila nikini muneteta.

²⁰ Amu si unywi mwateta, nde Ngoma ya Waweo wenyu iteta ndeni henyu.

²¹ Mundu enemng’ola mundwawo, na wawee mwana, hena kufwa; na waana wenewawukia wawona wawo, na wenewafwija.

²² Na muneoka mkishishirwa ni wandu wose hena lwa izina langu, kake ula egumiria mtano kuidiwika, enekijwa.

²³ Wekimkinya ghati ya kiongo kimwe, matakuni na cha keri. Amu kididi namburra, tomuneidiwa viongo vya Israeli, mtano eneikaeze Mwana wa mundu.

²⁴ Mwanalosha si wanga ya mlosha, nete mzoro wanga ya mzuri wakwe.

²⁵ Yamfika mwanalosha kuoka sa mlosha, na mzoro sa mzuri wakwe. Wekioka wemwitanga mwenye nyumba Beelzebul, teweneta kuwaitanga wala wa nyumbeni hakwe?

²⁶ Amu ii musiwaituke: amu tehena kindu kifinikirwa, kisijughuke ikuade, nete kiwiswe, kisitisiwike ikuade.

²⁷ Kila namburra kijeni, ghambeni kiangajini: na kila mukisikia isikioni, tindeni wanga ya nyumba.

²⁸ Na musiituke wala wekoma muri, wasiidime kukoma ngoma; keba mwitukeni ula eidima kukoma na muri na ngoma na jehannum.

²⁹ Videghe viri tevitaghwa ni pesa mwe? Na kimwe chawo tekigwa si kisioho na Waweo wenyu.

³⁰ Mtano na nyui ja mitwi yenyu jatarika jose.

³¹ Amu ii musiituke, unywi wakela videghe viingi.

³² Amu ii ose enenighamba mi msongorana wa wandu, nami ninemghamba msongorana wa Apa wangu eoho wanga.

³³ Na ose enenikania mi msongorana wa wandu, nami ninemkania msongorana wa Apa wangu eoho wanga.

³⁴ Musighambe ti nizie kuingija luworo masangeni, sizie kuingija luworo, nde muhandi.

³⁵ Amu nizie kuwasuanya mundu na wawee, na mche na mee, na mkwe na mkwewe;

³⁶ Na wazo wa mundu weneoka wala wa nyumba yakwe.

³⁷ Emkundie wawee kana mee kukela mi, teimbe mi, na emkundie mwana wa kiume kana wa kiche kukela mi, teimbe mi.

³⁸ Naye esiuha msalaba wakwe aniratera mi, teimbe mi.

³⁹ Ula euwona moo wakwe eneutesha; na ula eutesha moo wakwe hena lwangu eneuwona.

⁴⁰ Emuhia unywi, eniuhia mi; eniuhia mi, emuhia ula eningije.

⁴¹ Emuhia mroti hena izina la mroti, eneingwa awahache ya mroti; naye euhia mwenye ngalo hena izina la mwenye ngalo, eneingwa awahache ya mwenye ngalo.

⁴² Na ose enemwinga mwe wa awa wadongo ndemwa ya mbombe ya mbeho tiki hena izina la mwanalosha, kididi namburra, Tenesowaye awahache yakwe.