Marko 9 - Sumu Yedi ya Isa Masiya 1906 Kitamo 1897 Malumbo 1905

¹ Akawawurra, Amin namburra, ti weoho weimuke aha, tewenewona kufwa, mtano weneikawawone ufumwa wa Izuwa ukiza na zinya.

² Mtano kutera kwa misi mitandatu Yesu akauha Petro na Yakobo na Yohana, akawatika ghati ya nduwi ndeza hena mbiso wenye, akagharuka msongorana wawo.

³ Na nguo jakwe jaoka jakiwaa, nyewa muno sa theluji, sa tehena muaria ghati ya isanga etisiwe kuareha nyewa.

⁴ Wakawafumia Eliya na Musa, wakaoka wekiteta na Yesu.

⁵ Akatalua Petro amburre Yesu, Rabbi, ni keba tukae aha uswi, tuareha vianda vitatu, chako kimwe, cha Musa kimwe, cha Eliya kimwe.

⁶ Amu tetisiwe ateteze, amu waingiwa ni fole.

⁷ Likaoka ijumbi likawagera mvuri, likaza ighonda ghati ya ijumbi, likiteta, Uu ni Mwana wangu nimkundie, msikieni.

⁸ Wekiyoa chwi tewewonie munduwa nde Yesu mwenye hamwe nayo.

⁹ Wekisea ghati ya nduwi, akawaaghanya wasimtindie mundu weviwonie, nde Mwana wa Adamu eneikawuke ghati ya wefwie.

¹⁰ Wakakigura kiteto hawo, wekiwujanyana, kuwuka ghati ya wefwie nikini?

¹¹ Wakambujanya, wekitita, Nikini wateta watama ti imbe Eliya kuza kuwoka?

¹² Akatalua, akawawurra, Eliya eza ini, ahundua vyose, na sandu itamiwe hena Mwana wa Adamu, anyamarwe muno, adawe:

¹³ kake namburra, ti Eliya ateza, nawo watemketa wundu wekundie, sandu etamiwe.

¹⁴ Ekiza hena waanalosha wakwe akawona matorano meingi, wekiwajunguluka, na watama wekiwujanyana nawo.

¹⁵ Chwi matorano mose wekimbona wakairuto wakasara, wakamkezia.

¹⁶ Akawawujanya watama, Muwujanya kini nawo?

¹⁷ Ekitalua mwe wa matorano, akateta, Mlosha, naete mwana wangu hako, ena luhungu lusiteta;

¹⁸ na hose emwuhaho embaja, naye eng’ola ifuo, eumaja majegho makwe, enyaruka, nikateta na waanalosha wako wawone kulukinya, nete wasiidime.

¹⁹ Ekimtalua, ateta, Ee irika isiitikija, mtano rini nineoka henyu, mtano rini ninetikana naunywi? Mweteni hangu.

²⁰ Wakamwete hakwe. Ekimbona chwi luhungu lukambaja, ekigwasi akabingilika eking’ola ifuo.

²¹ Akambujanya wawee, Ni rini yaoka naye ii?

²² Akateta, Too umwana. Na keingi lumughera ghati ya moto na ghati ya mbombe, lumteshe, kake ukiidima kiteto, utughenje utusarie.

²³ Yesu akamburra, Ukiidima kuitikija, vyose vyaidima kuketika hakwe eitikija.

²⁴ Chwi akayia wawee mwana, na masoji akateta, Mzuri, naitikija, unighenje ghati ya kung’ola kuitikija.

²⁵ Ekiwona Yesu ti matorano wewughanyika wangu, akalubohia luhungu luwiwi, ekimburra, Luhungu lusiteta na ming’ani, nakuwurra, fuma hakwe, nete usiingiewa hakwe.

²⁶ Akaiya akambaja muno, akafuma, akaoka sa efwie, mtano wengi wakateta ti afwa.

²⁷ Yesu akamgura mkono, akambushija, akaimuka.

²⁸ Mtano ekifika nyumbeni waanalosha wakambujanya hena mbiso, Nikini uswi totuidime kumkinya?

²⁹ Akawawurra, Mbare iyo teidime kufuma nde hena kuomba na kuchunga.

³⁰ Wekitoka uko wakatonga ghati ya Galilaya, nete tekundie mundu atisiwe.

³¹ Akawalosha waanalosha wakwe, akawawurra, ti, Mwana wa Adamu ang’olwa mikononi ha wandu, nawo wenemkoma, na ekidiwika kukomwa enewuka musi wa katatu.

³² Awa tewetwarije ekitetie, wakaondoka kumbujanya.

³³ Akafika Kapernaum, mtano ekioka nyumbeni akawawujanya, Nikini mukiteta unywi na unywi ghati ya nzia?

³⁴ Wakahuja, amu wetetie nzieni, niani eye mbaha?

³⁵ Akaikaa si, akawaitanga waikumi na weri, akawawurra, Mundu ekikunda kukuoka wa kuwoka, eneoka wa nyuma wa wose na mwindi wa wose.

³⁶ Ekiuha kamwana, akamwimusha ghati yawo, akamshushudirra, akawawurra,

³⁷ Mundu enemsongerija mwe mwana sa uu hena izina langu, enisongerija mi, na mundu enisongerija mi, tenisongerija mi nde ye enituma.

³⁸ Akamtalua Yohana ekiteta, Mlosha, twambona mundu ekikinya maluhungu hena izina lako, esituratera uswi, tukamswija ya kuoka teturatera uswi.

³⁹ Yesu akateta, Msimswije, amu tehena eketa zinya hena izina langu, eneidima wangu kuniteta owiwi.

⁴⁰ Amu esioho wangu lwetu, ni hena lwetu.

⁴¹ Amu enemnywesha mwe ndemwa ya mbombe hena izina langu, ya kuoka unywi wa Masihi, amin namburra, uzuri wakwe tounemteka.

⁴² Naye enemtekwesha mwe wawo wadongo weniitikija, ni keba kashi, agherwe ibwe la kushagia ghati ya shingo lakwe, ataghwe ndiweni.

⁴³ Na mkono wako ukikutekwesha, uuchwie kula; ni keba uingie ghati ya moo, ukiduhuka irungo, kukela kutonga hako ghati ya jehannum mwenye mikono miri,

⁴⁴ ghati ya moto usijimika, funjo wawo wesina kuidiwika, nete moto toujima.

⁴⁵ Na kughu kwako kukikutekwesha, ukuchwie kula; ni keba uingie ghati ya moo, ukiduhuka kughu, kukela mwenye maghu meri kutaghwa ghati ya jehannum ya moto,

⁴⁶ funja jaho jisina kuidiwika, nete moto toujima.

⁴⁷ Na ijiso lako likikutekwesha, ulitaghe kula; u keba mwenye ngenge uingie ghati ya ufumwa wa Izuwa kukela mwenye meso meri kutaghwa ghati ya jehannum ya moto,

⁴⁸ funja jaho jesina kuidiwika, nete moto toujima.

⁴⁹ Mundu ose enegherrwa munyu hena moto, na matasi mose menegherrwa munyu hena munyu.

⁵⁰ Munyu ni wedi, nde munyu ukioka touna munyu, kinegerrwaze sororo? Muoke na munyu ndeni henyu, mrekundana unywi na unywi.