Marko 8 - Sumu Yedi ya Isa Masiya 1906 Kitamo 1897 Malumbo 1905

¹ Misi ila, matorano mekioka meingi muno nete tewena kindu cha kula ekiwaitanga waanalosha wakwe awawurra,

² Namasaria matorano, ti ingheriaha misi mitatu weikee nami, nete tewena kindu cha kula;

³ nami nikiwashigha watonge hawo wenye zaa nyumbeni hawo, wenesokea nzieni, amu weingi wawo wefumie hae.

⁴ Wakamtalua waanalosha wakwe, Mundu eidimaze kuwaighusha na kidjo aha hesina wandu?

⁵ Akawawujanya, Mabumunda amo muhete? Wakateta, Mafungate.

⁶ Akawawurra matorano maikae si, ekimauha mabumunda mafungate akaomba akabaa, akawainga waanalosha wakwe, wawike msongorana, wamakawika msongorana wa matorano.

⁷ Wakaoka na vinguluma si vingi, akatasia akawawurra na ivi viwikwe.

⁸ Wakala, wakaighuta; wakadodola vihindi vishighajike mbinda fungate.

⁹ Wakaoka welie sa maghana makumanne, akawashighiria watonge hawo.

¹⁰ Chwi ekikwea ngalaweni, hamwe na waanalosha wakwe, wakaza ghati ya ngata ya Dalmanutha.

¹¹ Wakafuma Wafarisayo wakawoka kuwunjanya naye, wekikunda hakwe luwano ghati ya wanga, wekimghesha.

¹² Ekiregija ngoroni akawawurra, Nikini irika ili ikundie luwano? Amin na mburra, teineingwa irika ili luwano.

¹³ Ekiwuka hawo, akakweawa ngalaweni, akaza sela.

¹⁴ Nawo wateiwaa kuete mabumunda, nete teweoho nawo ghati ya ngalawa nde ibumunda imwe.

¹⁵ Akawaaghanya ekiteta, Yoeni, muyoe chachu la Wafarisayo na chachu la Herode.

¹⁶ Wakaghambana wonawo, wekiteta, ti totuna mabumunda.

¹⁷ Ekitisiwa Yesu awawurra, Nikini mughambana ti mabumunda tomna? Tomumekusara? nete tomumetwarija? muna ngoro mtano ingeriaha teiwona?

¹⁸ Mukioka na meso tombona? mukioka na masikio tomsikia? nete tomkumbuka?

¹⁹ Nikinamabae mabumunda masano hena maghana ikumi na masano mbinda ijo mdodole jizue malumong’o?

²⁰ Wakamburra, Ikumi na mbiri. Na fungate meoho hena maghana ikumi na manne mbinda ijo jiizujwe na vibaje muvidodole?

²¹ Wakateta, Fungate. Akawawurra, Nizewa tomtwarija?

²² Ekiza mtano Betsaida, wamwetie ebajike‐meso, wamsembe amkuware.

²³ Ekimuha ebajike‐meso mkono, akamwete mtano some ya kaa, akatufa mate wanga ya meso makwe, akambikia mikono, akawujanya ti awona kindu.

²⁴ Akayoa wanga akateta, Nawona wandu, sa miti nawona wekisela.

²⁵ Akambikiawa mikono wanga ya meso makwe, akamuareha ayoe wanga, akahoa, akawona na raa vyose.

²⁶ Akamtuma nyumbeni hakwe, ekiteta, Usiingie ghati ya kaa, nete usimburre mundu wa kaa.

²⁷ Akafuma Yesu na waanalosha wakwe hena vikaa vya Kaisariya Filipo, mtano njieni akawawujanya waanalosha wakwe ekiwawurra, Wandu weteta mi niani?

²⁸ Wakatalua, Yohana Mbatizaji; na weingi, Eliya; na wengi, mwe wa waroti.

²⁹ Ye akawawurra, Unywi mutetaze mi nimi ani? Ekitalua Siman Petro amburre, We Masihi.

³⁰ Akawaghanya wasimburre mundu mburi jakwe.

³¹ Akawoka kuwalosha ti yambe Mwana wa Adamu kunyamarwa kwingi na kusuwa ni waghosi na wakohani wabaha, na watami, na kukomwa, na kutera kwa misi mitatu kuwuka.

³² Akateta kiteto iki na some. Akamuha Petro akawoka kumbohia.

³³ Akagharuka akawayoa waanalosha wakwe, akambohia Petro, ekiteta, Tonga hako nyuma yangu, shetani, amu toukusara evya Izuwa, nde vya wandu.

³⁴ Ekiwaita nga matorano hamwe na waanalosha wakwe, akawawurra, Ekundie kuratera nyuma yangu, akukanie awushije msalaba wakwe, aniratere.

³⁵ Amu ekundie kukija ngoro yakwe, eneitesha, ekundie kutesha ngoro yakwe hena lwangu, na hena lwa Anjili, eneikija.

³⁶ Inembeyia kini mundu, ekibigha mbucha ya masanga mose, ekitesha ngoro yakwe?

³⁷ Kana mundu ang’ole kini hena ngoranya ya ngoro yakwe?

³⁸ Ewona soni hena mi na viteto vyangu, ghati ya irika ili la kushinda na kutekwa, naye Mwana wa Adamu enewona soni hena ula, eneikaeze ghati ya uwedi wa wawee hamwe na malaika wedi.