Marko 7 - Sumu Yedi ya Isa Masiya 1906 Kitamo 1897 Malumbo 1905

¹ Wakambunganyikia Mafarisayo na weingi wa watama, wefuma ghati ya Yerusalemi,

² wakawawona wengi wa waanalosha wakwe wekila vidjo na mikono miwiwi, niyo isiojiwe.

³ Amu Wafarisayo na Wayahudi wose wesioje mikono muno, tewela, wekighura mauhio ma waghosi:

⁴ nete kufuma ghati ya kichinda, wesigherire mbombe tewela, na mengi ni meingi wemauhie kughura, kughera mbombe ndemwa, na mianje, na vindu vya usango, na meza.

⁵ Niho wakambujanya Wafarisayo na watama, Nikini waanalosha wako tewetonga hena mauhio ma waghosi, kake wela kidjo na mikono miwiwi?

⁶ Akatalua akawawurra, ti Nezo eng’olie mroti Isaya hena unywi warenge, sandu itamiwe, Wandu awa wenigurie nganyi na miomo, ngoro jawo jaoka hae hangu.

⁷ Hena malinganyo waniomba, wekilosha malosho, vindu vya waana Adamu.

⁸ Amu mukiwushija kuaghanya kwa Izuwa, mughura mauhio ma wandu, kugherwa mbombe mianje na ndemwa, na mengi sa ama meingi muareha.

⁹ Akawawurra, Nezo muwika hae kuaghanya kwa Izuwa, muwone kurinda mauhio menyu.

¹⁰ Amu Musa etetie Uwaghurie nganyi waweeo na mamako, naye emteta kiwiwi wawee kana mee hena kufwa ateke.

¹¹ Naunywi mteta, Mundu ekimburra wawee kana mee, Korban (nikyo itasi) unetijiwe nami,

¹² nete tomumshigha eareha kiteto wawee kana mee,

¹³ mkinyamara kiteto cha Izuwa hena mauhio menyu mmauhiie, na mengi sa ama meingi mwareha.

¹⁴ Ekiwaitanga matorano mose akawawurra, Nisikieni wose, mutwarije.

¹⁵ Tehena kindu kioho some ya mundu kikimwingia, kiidima kumghera owiwi, kake vifuma ghati ya hakwe nivyo vimghera owiwi.

¹⁶ Mundu ekioka na masikio ma kusikia, asikie.

¹⁷ Mtano ekinaingie nyumbeni ghati hena matorano, waanalosha wakwe wakambujanya ifwanano.

¹⁸ Akawawurra, Hae na unwi tomna kucha? nete tomkusara ti kyose kioho some kikimwingia mundu tekidima kumughera owiwi?

¹⁹ ti tekimwingia ngoroni, nde ndeni, na kifuma ghati ya kubalia, kizerija vidjo vyose?

²⁰ Akateta, Kimfuma mundu nikyo kimghera owiwi;

²¹ amu ghati ya ndeni, ghati ya ngoro ya mundu, mefuma maberati mawiwi,

²² kushinda, ubuya, kukoma, kulangwa, owiwi, inghelighisho, utiri, ijiso la owiwi, virigho, kukuisisa, kutomoda;

²³ ama mose mawiwi mefuma ghati ya ndeni, namo memghera mundu owiwi.

²⁴ Ekiwuka uko akaza ghati ya mihaka ya Turo na Sidona, na ekiingia ghati ya nyumba ekundie mundu asitisiwe, nete teidima kuwiswa.

²⁵ Amu mche esikia vindu vyakwe, mwana wa kiche wakwe ekioka na luhungu luwiwi, ekiza akamguia maghuni.

²⁶ Naye mche eokie Helleni, hena mbare Msurofenissa, akamwomba amkinye luhungu ghati ya mwana wakwe.

²⁷ Yesu akamburra, Washighe waana waighute kuwoka, amu si kyedi kuuha kidjo cha waana na kukiwiritia hena nguro.

²⁸ Akatalua, akamburra, Kididi, Mzuri, amu mtano nguro si ya meza wela ghati ya kugwa kwa waana.

²⁹ Akamburra, Hena kiteto hiki tonga hako, luhungu lwafuma ghati ya mwana wako.

³⁰ Ekifika nyumbeni hakwe akawona luhungu lwafuma, na mwana wakwe eyejwe wuini.

³¹ Ekifumawa ghati ya mihaka ya Turo na Sidona, akaza ha ndiwa ya Galilaya, ghati ya mihaka ya Dekapoli.

³² Wakamtikia ming’ani esiteta nezo, nawo wamsemba amghere mkono.

³³ Ekimbushija ghati ya matorano, hena mbiso, akaghera vichaa vyakwe masikioni hakwe, akatufa mate, akamkuwara lumi.

³⁴ Ekiyoa wanga Izuwa akasumukia, akamburra, Effatha, nikyo Jughuke.

³⁵ Chwi masikio makwe makajughuka, na ikano la lumi lwakwe likateruka, akateta nezo.

³⁶ Akawaaghanya wasimburre mundu; sandu ewaaghanye, wakaneta muno kutete;

³⁷ wakareghija kikaitala, wekiteta, Aareha vyose nezo, awaarehie ming’ani wasikie na bubu watete.