Marko 6 - Sumu Yedi ya Isa Masiya 1906 Kitamo 1897 Malumbo 1905

¹ Akafuma uko, akaza ghati ya isanga lakwe ye; wakamratera waanalosha wakwe.

² Mtano ikioka sabato, akawoka kulosha ghati ya sunagogi, weingi wakasikia, wakarighiwa, wekiteta, Uu awoniahi ama? Kucha ani uku eingiwe, na zinya ani iji jioho mikononi hakwe?

³ Si uu eye musongoa, mwana wakwe Maryamu, na mundwawo Yakobo, na Yose, na Yuda, na Siman? na warumburie si aha hetu? Wakashishirwa naye.

⁴ Akawawurra Yesu ti, Mroti tesowa nganyi nde ghati ya isanga lakwe na hena mbare yakwe, na ghati ya nyumba yakwe.

⁵ Nete teidime uko kuareha zinya, nde atewaghera mikono wewadjua wesiwengi, akawahodja.

⁶ Akarighiwa amu wesuie kuitikija; akajunguluka ghati ya vikaa mbai jose ekilosha.

⁷ Akawaitanga wala ikumi na weri, akawoka kuwatuma weri weri, akawainga zinya wanga ya maluhungu mawiwi.

⁸ Akawaaghanya wasitike kindu cha nzieni, nde isibo tiki, nete kikuchu, nete ibumunda, nete pesa ghati ya ngana,

⁹ nde wekikuchungia viratu, wasidoke kanzu mbiri.

¹⁰ Akawawurra, Mneikamuingie ghati ya nyumba, muikae uko mtano munetonga henyu uko.

¹¹ Nawo wesimukundie nete wesimusikia, mukifuma uko mukutekute hae purughushe ioho maghuni henyu, hena kuwonja hawo. Amin namburra, ineoka kutikiana hena Sodoma na Gomorra musi wa wuchili, kukela kaa ila.

¹² Wakafuma wakatinda wagharuke;

¹³ wakakinya maluhungu meingi; wakawira na mafuta weingi wewadjua, wakahoa.

¹⁴ Akasikia mfumwa Herode, amu izina lakwe lina nguma, akateta, ti Yohana Mbatizaji atewuka ghati ya wefwie, na amu ii zinya jaketika hakwe.

¹⁵ Wengi wakateta, ti ni Eliya; wengi wakateta, ti mroti, sandu umwe wa waroti.

¹⁶ Ekisikia Herode akateta, ti Niye Yohana, nimtemie mtwi, ula atewuka ghati ya wefwie.

¹⁷ Amu Herode mwenye etumie akamgura Yohana, akamchunga kichungoni, hena lwa Herodia mche wakwe Filipo mundwawo, amu ambaika.

¹⁸ Amu Yohana amburra Herode, ti teiwe hako kuoka na mche wa mundwenyu.

¹⁹ Amu ii Herodia akamsua akakunda kumkoma, asiidima;

²⁰ amu Herode eokie ekimwondoka Yohana, ekimtisiwa mundu wa kididi na wedi, akamyoa; ekimsikia, akaareha vingi, akamsikia hena kuizihirwa.

²¹ Mtano ukioka musi wa kuwe, Herode ekinaareha itasi, musi wa kuwoneka kwakwe, hena wabaha na njama na wandu wa kuwoka wa Galilaya;

²² ekiingia mwana wa kiche wa Herodia, akatoroka, akwaizihirija Herode nawo weikee naye, mfumwa akamburra mbora, Uombe hangu kila ukikundie, nami ninekuinga.

²³ Akamraria, ti Kila ukikundie hangu, ninekuinga, mtano kibaje cha kifumwa changu.

²⁴ Ye ekifuma akamburra mee Niombe kini? Akamburra, Mtwi wa Yohana Mbatizaji.

²⁵ Ekiingia chwi wangu ha mfumwa, akaomba, ekiteta, Nikundie uniinge ekuade ghati ya mwanje mtwi wa Yohana Mbatizaji.

²⁶ Mfumwa akaoka na wukiwa wingi, hena lwa seso nawo weikee naye tekundie kumwima.

²⁷ Chwi mufumwa akatuma njama, akamburra mtwi wakwe uetwe.

²⁸ Naye akatonga akamtema mtwi kichungoni, akaete mtwi wakwe ghati ya mwanje, akamwinga mbora, mbora akamwinga mee.

²⁹ Waanalosha wakwe wakasikia, wakaza wakatika mning’a wakwe, wakauwika mbireni.

³⁰ Mitume wakawunganyika ha Yesu, wakamliya mburi ja vindu vyose, vila weviarehe na vila waviloshe.

³¹ Akawawurra, Zooni unywi wenye hena mbiso handu hesina wandu, musowoke hadongo: amu weoho weza na wetonga weingi, nete tehena handu mtano ha kula.

³² Wakatonga hawo handu hesina wandu hena mbiso hena ngalawa.

³³ Matorano wakawawona wekitonga, weingi wakamtisiwa, wakasara uko na maghu ghati ya kaa jose, wakawarongoria wakaza hamwe hakwe.

³⁴ Mtano ekisea akawawona matorano meingi, akawasaria, amu weikee sa maghonji mesina mrisha, akawoka kuwalosha muno.

³⁵ Mtano ingeriaha magheri mekineta waanalosha wakwe wekimzia wakateta, ti, handu aha hesina wandu, na ingheriaha magheri maneta,

³⁶ uaghane nawo, wawone kutonga mbuweni mbai jose na vikaa, kukuzoria kidjo, amu tewena kidjo.

³⁷ Ekitalua akawawurra, Waingeni unywi wale. Wakamburra, Tutonge tuzore vidjo vya dinari maghana meri tuwainge wale?

³⁸ Akawawurra, Mabumunda amo muna? Tongeni mreyoeni. Wekitisiwa wakateta, Masano, na nguluma mbiri.

³⁹ Akawaaghanya waikae si wose, mikayi na mikayi, wanga ya mani mabisi.

⁴⁰ Wakaikaa si siri na siri hena ighana, na hena makumi masano.

⁴¹ Naye akmauha mabumunda masano na nguluma mbiri, akayoa wanga, akang’ola haika, akamabaa mabumunda, akawainga waanalosha wakwe, wawone kuwaetie wala, najo nguluma mbiri akaghawanya hena wose.

⁴² Wakala wose wakaighuta.

⁴³ Wakadodola malumong’o ma kuizuja mbinda ikumi na mbiri, na ghati ya nguluma.

⁴⁴ Wakaoka wemalie mabumunda maghana makumi masano wome.

⁴⁵ Chwi akawasingirija waanalosha wakwe waingie ngalaweni wakarongora sela ya Betsaida, mtano ye aneikaaghane matorano.

⁴⁶ Mtano ekinashighija akatonga nduwini kuomba.

⁴⁷ Mtano ikioka chamagheri, ngalawa ioho ghati ya ndiwa, naye niye mwenye ghati ya si.

⁴⁸ Akawona wekishishirwa na kujuta, amu ngungu yeokie wanga yawo. Mtano sa ngata ya kannne ya kio eza hawo, ekisela wanga ya ndiwa, akakunda kuwavetia.

⁴⁹ Nawo wekimbona esela wanga ya ndiwa, wakaghamba ti ni kiwuri, wakaloza.

⁵⁰ Amu wose wakambona, wakaitalwa. Chwi akateta nawo, akawawurra, Hujeni, nimi, musigurwe ni fole.

⁵¹ Akakwea nawo ghati ya ngalawa; ngungu ikaiting’o; wakarighiwa ndeni hawo muno muno, wakaitalwa.

⁵² Amu tewekumbuke mabumunda, amu ngoro jawo jeokie tejiwona.

⁵³ Wekikela wakaza isanga la Gennesereti, wakafika kiwambara.

⁵⁴ Mtano wekifuma ghati ya ngalawa, chwi wekimtisiwa,

⁵⁵ wakasara ghati ya isanga lila lose, wakawoka kuwatika ghati ya wui weokie wewadjua, wekisikia handu ti eoho.

⁵⁶ Naye ekiingia ghati ya vikaa, kana kaa, kana mtemeni, wakawawika wewadjua kichindeni, wakamsemba wawona kukuwara mtano litiriwo la suke yakwe, nawo wemkuware wakahoa.