Marko 5 - Sumu Yedi ya Isa Masiya 1906 Kitamo 1897 Malumbo 1905

¹ Wakafika sela ya keri ya ndiwa, ghati ya isanga la Wagadareni.

² Ekisea ghati ya ngalawa, chwi akamtorana mundu ghati ya mbira mwenye luhungu luwiwi,

³ eokie na maikao ghati ya mbira, nete tehena mundu eidima kumchunga, mtano hena nyise.

⁴ Amu echungiwe keingi hena pingu na nyise, na nyise jichwiwe naye, na pingu jibajiwe naye; nete teidima mundu kumhembereza.

⁵ Naye misi yose kio na hemusi ghati ya nduwi na ghati ya mbira, ekiiya na ekikuchwa na mabwe.

⁶ Ekinambone Yesu hae akasara akamwinamia,

⁷ ekiiya na ighonda ibaha ekiteta, Nina kini nawe, Yesu Mwana wa Izuwa eoho wanga? Nakuraria hena Izuwa, usiniwinye.

⁸ Amu amburra, Luhungu luwiwi, ufume ghati ya mundu!

⁹ Akambujanya, Izina lako niani? Akamtalua akamburra, Legioni izina langu, amu uswi weingi.

¹⁰ Akamsemba muno, asiwaingije hae some ya isanga.

¹¹ Heokieho ghati ya nduwi ifio la nguwe ibaha likirishwa.

¹² Wakamsemba maluhungu mose wekiteta, Utuingije hena nguwe, tuwone kujiingia jila.

¹³ Chwi Yesu akakunda. Maluhungu mawiwi wekifuma wakaingia ghati ya nguwe, ifio likatonga wanguwangu mawongowongo mtano na ndiwa, wakaoka sa maghana makumeri, wakanyamwa na ndiwa.

¹⁴ Nawo werishie nguwe wakamatuka, wakatoranya mburi ghati ya kaa na ghati ya miteme: wakaza wawone nikini kiokie.

¹⁵ Wakafika hakwe Yesu, na kumbona ula wa luhungu eikee edokie na mwenye kucha, eokie nawo Legioni, wakaondoka.

¹⁶ Nawo wewonie wakatinda sandu eokie hakwe wa luhungu, na vindu vya nguwe.

¹⁷ Wakawoka kumsemba afume ghati ya mihaka yawo.

¹⁸ Naye ekiingia ngalaweni, ula eokie na luhungu akamsemba aoke hamwe naye;

¹⁹ nete Isa temshigie, kake amburra, Tonga hako nyumbeni hako hena wandu wako, uwawurre mburi sandu Mzuri ekuketie, akakusaria.

²⁰ Akatonga hakwe akawoka kutinda ghati ya Dekapoli sandu emketie Yesu, wose wakarighiwa.

²¹ Ekinaidiwe Yesu kukelawa ghati ya ngalawa mtano sela, wakakuwunganya matorano meingi mtano hakwe, naye eoho mbayi ya ndiwa.

²² Akaza hakwe mwe wa wabaha wa sunagogi, izina lakwe Yairo, mtano ekimbona akagwa maghuni hakwe,

²³ akamsemba muno, ekiteta, ti, Mwana wangu wa kibora mdongo ni ghati ya kuidiwika kwakwe, nde uze umghere mikono awone kukia, naye eneoka na moo.

²⁴ Akatonga naye, wakamratera matorano meingi, wakamduduradudura.

²⁵ Na muche efumiwe ni sakame miaka ikumi na miri,

²⁶ eketike meingi na waghanga weingi, akaiha evihete vyose, nete teweiwaye, kake kashi mawiwi maneta,

²⁷ esikie vindu vya Isa, ekiza nyuma yakwe akaikuwara suke yakwe;

²⁸ amu etetie, ya kuoka mtano suke jakwe nikajikuwara, ninekia.

²⁹ Chwi likaoma kudofa kwa sakame yakwe, akatisiwa murini ya kuoka ahoa ghati ya ibigho.

³⁰ Chwi Yesu ekitisiwa ndeni hakwe ti zinya ifumie ekigharuka ghati ya matorano, akateta, Niani akuwara suke jangu?

³¹ Wakamburra waanalosha wakwe, Wawona matorano mekududura, nawe uteta, Niani anikuwara?

³² Akayoa kumbona ula aketa huwo.

³³ Muche ekiingiwa ni fole, na ekidedema, ekitisiwa, kila kioho ndeni hakwe, akaza akamgwiia, akamburra vya kididi vyose.

³⁴ Akamburra, Mwana wa kiche, kuitikija kwako kwakukija, tonga hako na kiboha, uhoe ghati ya kubighwa kwako.

³⁵ Mtano ekioka ghati ya kuteta, waza ghati ya mbaha wa sunagogi, wekiteta, ti, Mwana wa kiche wako afwa; niniwa umrisha wukiwa mlosha?

³⁶ Chwi Yesu ekisikia kiteto kitetiwe, amburre mbaha wa sunagogi, Usiondoke, itikija tiki.

³⁷ Nete teshighie mundu aratere naye, nde Petro, na Yakobo, na Yohana mundwawo Yakobo.

³⁸ Wakaza ghati ya nyumba ya mbaha wa sunagogi, akayoa kilozo nawo weiya na weareha kiiyo muno.

³⁹ Ekiingia awawurra, Nikini muketa kilozo na kuiya? Mwana tefwaye, ateshinjia.

⁴⁰ Wakamsekia. Naye ekiwang’ola wose, auha naye wawee wa mwana na mee, nawo weoho hamwe naye, na aingia ehayejwe mwana.

⁴¹ Akamgura mkono mwana, amburra, Talitha kumi, niyo igharushwe, Kamwana, nakuwurra, wuka.

⁴² Chwi akaimuka kamwana, akasela, amu efikie miaka ikumi na miri, wakarighiwa muno muno.

⁴³ Akawaaghanya muno, mundu asikitisiwe iki, akahamba aingwe kidjo.