Marko 4 - Sumu Yedi ya Isa Masiya 1906 Kitamo 1897 Malumbo 1905

¹ Akawokawa kulosha mbai ya ndiwa, wakawunganyika matorano meingi, mtano mwenye ekikwea hena ngalawa akaikaa ghati ya ndiwa, na matorano mose weoho mbai ya ndiwa, wanga ya si.

² Akawalosha meingi na mafwanano, akawawurra ghati ya kichei chakwe,

³ Sikieni, Mhanda mbeu efumie ahande,

⁴ ikaoka ghati ya kuhanda, iyo ikagwa wanga ya nzia, jikaza ndeghe ja wanga jikaila.

⁵ Ingi ikagwa hena mabwe, hesina teri nyingi, chwi ikamea,

⁶ amu teri yakwe teitongie si, mtano zano ikiwaa ikaoma, na amu teina kikolo ikafwa.

⁷ Ingi ikagwa hena mivwa, mivwa ikaeha, ikaidudura, nete teighera.

⁸ Ingi ikagwa wanga ya teri yedi, ikaghera ikimea na ikieha, ikaete imwe makumi matatu, na imwe makumi matandatu, na imwe ighana.

⁹ Akateta, Ena masikio ma kusikia, asikie.

¹⁰ Ekinaoka hesina wandu, wemjunguluke na wala ikumi na weri wakambujanya fwanano.

¹¹ Akawawurra, Mwaingwa unywi kutisiwa mbiso ya ufumwa wa Izuwa, wala weoho some wawurrwa vyose hena mafwanano;

¹² wekiyoa wayoe, nete wasiwone, na wekisikia wasikie nete wasitisiwe, wasigharuke hose, wakawushijiwa kutekwa.

¹³ Akawawurra, Tomutisiwa fwanano ili? munetisiwaze mafwanano mose?

¹⁴ Ehandaye ehandie kiteto.

¹⁵ Wala weoho nzieni, kiteto kihandwaho, niwo wesikia, chwi eza Shetani, ekiuha kiteto kihandiwe ghati ya ngoro jawo.

¹⁶ Na awa ni sa wawo wehandiwe wanga ya mabwe, niwo wesikie kiteto, chwi wekiuha na kuizihirwa;

¹⁷ nete tewena kikolo hawo, kake ni hena magheri, mtano ukioka ukiwa kana kukinya hena lwa kiteto, chwi washishirwa.

¹⁸ Nawo wengi niwo wehandiwe ghati ya mivwa,

¹⁹ niwo wesikie kiteto, na lurindo lwa masanga ama, na lukengiko lwa mali, na luso lwa jingi jishighajika makaingia makadudura kiteto, nacho kiokie tekigera.

²⁰ Nawo niwo wehandiwe ghati ya teri yedi, wesikia kiteto, nawo wekikunda, na wagera, mwe makumi matatu, mwe makumi matandatu, mwe ighana.

²¹ Akawawurra, Taa teiza igerwe si ya kizembe, kana si ya wui? isigerwa ghati ya kindu cha taa?

²² Amu tehena iwiswe, isiwonwe, nete ioho ijuwiwe, nde iwone kujughuka.

²³ Mundu ekioka na masikio ma kusikia, asikie.

²⁴ Akawawurra, Yoeni muvisikia. Amu kighe sho mugheshawo munegheshiwa naunywi, na ineti jwa henyu musikia.

²⁵ Amu mundu ena, eneingwa, naye esina, mtano kila ena eneuhwa.

²⁶ Akateta, Huwo ni ufumwa wa Izuwa,

²⁷ ni sa mundu ekimiza mbeu ghati ya si, ekishinjia na ekiwuka kio na hemusi, na mbeu ikimea ikaeha, sa esimaije uu;

²⁸ amu si yenye igera, kuwoka ijani, la keri shamwale, ekuade ngano ikuyie ghati ya kishamwale.

²⁹ Igeraho ndunda chwi eingija ibengele, amu kufindika kuoho.

³⁰ Akateta, Nifwananije na kini ufumwa wa Izuwa? kana hena fwana ani niuarehe fwana?

³¹ Sa ndembe ya kharadali, ikahandwa wanga ya si, niyo ndongo kukela mbeu jose jioho wanga ya si.

³² Nayo ikinahandwe, ieha, mtano ikaoka mbaha kukela mani mose, na kuketa mbagha mbaha, mtano weidima ndeghe ja wanga kuikaa si ya mvuri wakwe.

³³ Hena mafwanano mengi sa ii akawawurra kiteto sandu weidima kusikia:

³⁴ hesina fwanano tetetie nawo; hena mbiso akawatindia waanalosha wakwe mose.

³⁵ Naye akawawurra musi ula ikioka chamagheri, Tukele mtano sela ya keri.

³⁶ Nawo wakaaghana na matorano, wakamtika sawundu eokie ghati ya ngalawa, na ngalawa jingi ndongo jioho naye.

³⁷ Ikaoka ngungu mbaha ya mbeho, mawimbi makawiritwa wanga ya ngalawa, mtano ikawoka kuizua.

³⁸ Naye eokie ghati ya shetri ekishinjia wanga ya iseto. Nawo wakambusha wekimburra, Mlosha, touyoa we ti twateka?

³⁹ Naye ekiwuka akaibohia ngungu, akaiwurra ndiwa, Huja chwi, uswijwe. Ngungu ikaiting’o, ikaoka kuhoiya kubaha.

⁴⁰ Akawawurra, Nikini mba fole huwo? Nize tomna kuitikija?

⁴¹ Wakaondoka fole nyiingi, wekiwurrana, Uu niani, ti na ngungu na ndiwa jamwinga isikio?