Marko 3 - Sumu Yedi ya Isa Masiya 1906 Kitamo 1897 Malumbo 1905

¹ Akaingiawa ghati ya sunagogi, heokieho uko mundu mkono wakwe uwiye:

² wakamyoa, ti musi wa sabato enemhodja, wawone kumlinganya.

³ Akamburra mundu mwenye mkono uwiye, Imuka ghati na ghati.

⁴ Akawawurra, Ni kyedi musi wa sabato kuketa nezo kana kuketa owiwi? Kuhodja moo kana kukoma? Wakahuja.

⁵ Naye ekiwayoa na oro, ekiregija hena kuoka jidindie ngoro jawo, akamburra mundu, Ronga mkono wako. Akauronga, mkono wakwe ukahojwa, wedi sa wa keri.

⁶ Wekifuma chwi Mafarisayo wakala ngiliwata na Maherodiani wanga yakwe, wamteshe.

⁷ Yesu akatonga hakwe hamwe na waanalosha wakwe mtano na ndiwa. Wandu weingi muno wa ghati ya Galiliya wakamratera,

⁸ na ghati ya Uyahudi, na ghati ya Yerusalemi, na ghati ya Idumayo, na sela ya keri ya Yardeni, nawo weoho afuhi na Turo na Sidon, weingi muno, wekisikia sandu eareha, wakamzia.

⁹ Akawawurra waanalosha wakwe ngalawa ndongo iikae afuhi yakwe, hena matorano wasimwitale.

¹⁰ Amu akawahodja weingi, mtano wakamugwia, wawone kumukuwara weokie na mabigho.

¹¹ Na maluhungu mawiwi, wekinambone, wakagwa msongorana wakwe, wakaiya, wekiteta, Niwe Mwana wa Izuwa.

¹² Akawabohia muno wasimghambe.

¹³ Akakwea ghati ya nduwi, akawaitanga ewakundie, wakaza hakwe.

¹⁴ Akaareha ikumi na weri wawone kuoka hamwe naye, naye awone kuwatuma kutinda,

¹⁵ na kuoka na zinya ja kuhodja ndwari na kukinya maluhungu.

¹⁶ Na Siman akamwinga izina Petro;

¹⁷ na Yakobo wa Zebedayo, na Yohana mdwawo Yakobo, akawainga izina Boanerge, niyo waana wa kururuma;

¹⁸ na Andrea, na Filipo, na Bartolomayo, na Mattayo, na Tomaso, na Yakobo wa Alfayo, na Thaddayo, na Siman Mkananayo,

¹⁹ na Yuda Iskariota emng’olie.

²⁰ Wakaza nyumbeni, matorano wakawunganyikawa, mtano teweidime nete kula kidjo.

²¹ Nawo wa hakwe wakasikia, wakaza kumsingirija, amu wakaghamba, ti kucha kwakwe kwateka.

²² Nawo watami weseiye ghati ya Yerusalemi wakateta, ti ena Beelzebul, na ti hena mbaha wa maluhungu amakinya maluhungu.

²³ Naye akawaitanga akawawurra hena mafwanano, Eidimaze Shetani kumkinya Shetani?

²⁴ Na idje ufumwa wabalijwa wanga yakwe yenye towuidima kuimuka ufumwa ula.

²⁵ Na idje nyumba ikabalijwa wanga yakwe yenye teidima kuimuka nyumba ii.

²⁶ Na Shetani ekiwuka wanga ya mwenye akakubalija, teidima kuimuka, kake awona kuidiwika.

²⁷ Teidima mundu ekiingia nyumbeni ha mundu mung’eno, kuhora vindu vyakwe, esimchunga ini ula mung’eno, niho eneidima kuhora nyumba yakwe.

²⁸ Kididi namburra, ti weneshighiriwa waana wa Adamu matekwa mose, na marigho wenemateta,

²⁹ nde ye enemteta righo Ngoma Mshenete, tena kushighiwa mtano ndarasi,

³⁰ kake imbe wuchili wa ndarasi, amu wetetie, Ena luhungu luwiwi.

³¹ Wakaza wandwawo na mee, nawo wekiimuka some wakatuma hakwe wekimwitanga.

³² Matorano wakaikaa wekimjunguluka, wakamburra, Mamako na wandwenyu some wakuenda.

³³ Akawatalua, ekiteta, Niani eye iya kana wandwetu?

³⁴ Ekiwayoa mbai jose weikee wemjunguluke, ekiteta, Yoeni, iya na wandwetu.

³⁵ Amu mundu enekiareha ekikundie Izuwa, uu ni mundwetu, na rumburia, na iya.