Marko 2 - Sumu Yedi ya Isa Masiya 1906 Kitamo 1897 Malumbo 1905

¹ Akaingiawa ghati ya Kapernaum kutera kwa misi ila, ikasikiwa ti eoho nyumbeni.

² Chwi wakawunganyika weingi, mtano tehenawa handu nete msongorana wa mbenge, akawawurra kiteto.

³ Wakaza hakwe wamwetie mwenye kuwia, ekitikwa ni wanne;

⁴ nete teweidima kumsongeria hena matorano. Wakajughua guu eoho, wakatumbura wakaseja wui ekiyeie mwenye kuwia.

⁵ Yesu ekiwona kuitikija kwawo akamburra mwenye kuwia, Mwana wangu, kutekwa kwako kuwushijwa.

⁶ Weokie uko watami weikee si, wekikusara ngoroni,

⁷ Nikini uu eteta huwo uwiwi? Niani eidima kuwushija kutekwa nde mwe, niye Izuwa?

⁸ Chwi Yesu ekitisiwa ngoroni hakwe ti awa wekusara huwo ndeni hawo, akawawurra, Nikini mukusara ama ngoroni henyu?

⁹ Nikihi kianguhe, kumburra mwenye kuwia, Kutekwa kwako kuwushijwa, kana ndekuteta, wuka, Wushija wui wako, utonge?

¹⁰ Mbone kutisiwa ti Mwana wa Adamu ena zinya masangeni kuwushija matekwa, (amburra mwenye kuwia),

¹¹ Nakuwurra, wuka, wushija wui wako, utonge hako nyumbeni hako.

¹² Akawuka chwi, akawushija wui wakwe, akafuma msongorana wawo wose, mtano wakarighiwa wose, wakamwisisa Izuwa, wekihamba, Totumewona sa huwo pia.

¹³ Akafumawa mbai ya ndiwa, matorano mose makaza hakwe, akawalosha.

¹⁴ Mtano ekivetia akambona Lawi wa Alfayo eikee si forthani, akamburra, Niratere.

¹⁵ Akaimuka akamratera. Ikaoka ghati ya kuikaa mezeni nyumbeni hakwe, mapublikano weingi na wenye kutekwa weoho weikee hamwe na Yesu na waanalosha wakwe, amu weokie weingi, wakamratera.

¹⁶ Nao watama na Mafarisayo wekimbona ekila hamwe nawo mapublikano na wenye kukekwa, wakawawurra waanalosha wakwe, Nikini iki? ela na enywa hamwe na mapublikano na wenye kutekwa?

¹⁷ Mtano ekisikia Yesu, akawawurra, Wenye zinya teweendawo mughanga, nde wala wewadjua; sizie kuwaitanga wedi nde wala watekwa hena kuchwa‐muti.

¹⁸ Wakaoka waanalosha wa Yohana na wa Mafarisayo wekichunga; wakaza wakamburra, Nikini waanalosha wa Yohana na wa Mafarisayo wachunga, nde wako tewechunga?

¹⁹ Akawawurra Yesu, Teweidima waana wa ngasu kuchunga, mwenye ngasu ekioka nawo. Magheri mala wekioka naye mwenye ngasu hawo, teweidima kuchunga.

²⁰ Misi ineza, mwenye ngasu eneikawushijwe hawo, niho wenechunga misi ila.

²¹ Tehena mundu efuma kidame cha suke sha wanga ya suke isakae, amu ila sha iizuje iwushija ghati ya ila isakae, nayo ineta kubajika.

²² Nete tehena mundu egera mawa masha ghati ya vikuchu visakae, mawa masha mesibaje vikuchu, mawa mesiitike, nete vikuchu visiputuke. Kake mawa masha megerwa ghati ya vikuchu visha.

²³ Ikaoka ekiwetia musi wa sabato ghati ya miteme wakawoka waanalosha wakwe wekitonga kubughutua masuke.

²⁴ Mafarisayo wakamburra, Yoa, nikini weareha isiwe musi wa sabato?

²⁵ Akawawurra, Tomusomie sandu earehie Daud, ekinawone ukiwa, akasikia nzaa, yee nawo hamwe naye?

²⁶ Sandu eingie ghati ya nyumba ya Izuwa, ekioka Abiathar mkohani mbaha, wakala mabumunda ma kuwondja, isiwe kula, nde hena wakohani, akawainga wala weoho hamwe naye?

²⁷ Akawawurra, Sabato yaoka hena lwa mundu, nete si mundu hena lwa sabato.

²⁸ Amu ii Mwana wa Adamu ni Mzuri mtano wa sabato.