Marko 16 - Sumu Yedi ya Isa Masiya 1906 Kitamo 1897 Malumbo 1905

¹ Mtano sabato ikiwetia Maryamu Magdalene na Maryamu wa Yakobo, na Salome wakazora vindu vya mbungo yedi wawone kuza kumghera marhamu.

² Mtano heyawo kerre ya kuwoka kwa sabato waza hena mbira izuwa likifuma.

³ Wakateta wonawo, Niani enetubingilishia ibwe ghati ya mbenge ya mbira?

⁴ Mtano wekiyoa wawona ti libingilishwa hae ibwe; amu liokie ibaha muno.

⁵ Wekiingiambireni wakawona mbwange eikee mbai ya kuume, edokie suke njewa; wakairuto.

⁶ Awawurre, Musiiruto; mumwenda Yesu Mnazareti ewanikwe: awuka, teoho aha ye.

⁷ Yoa handu wehambikie. Kake mutonge henyu, wawurreni waanalosha wakwe na Petro, ti, amurongoria kufika Galilaya; uko munembona, sandu emburire.

⁸ Wakafuma wangu wakamatuka ghati ya mbireni, wakaoka na kudedema na kutekwa ni kucha, nete tewemburire mundu kiteto, amu wakaondoka.

⁹ Ekiwuka heyawo ya kuwoka kwa sabato akamfumia kuwoka Maryamu Magdalene, ghati yakwe ekinyie maluhungu mafungate.

¹⁰ Uu ekitonga akawaliyia mburi wala weokie hamwe naye, wekiingiwa ni wukiwa na wekiiya.

¹¹ Nawo wekisikia ti eoho na moo, naye awonwa naye, teweitikija.

¹² Kutera kwa ama akawafumia weri wawo hena fwana lingi wekisela wekitonga mitemeni.

¹³ Nawo awa wekitonga hawo wakawaliyia mburi weshighajike; nete awa tewewaitikija.

¹⁴ Ikuade akawafumia wala ikumi na mwe wekiikaa mezeni, akawabohia hena kusua kuitikija na kuoka idindie ngoro yawo, ti tewewaitikija wala wembonie ekinawuke.

¹⁵ Akawawurra, mukitonga ghati ya masanga mose pia, tindeni Anjili elungiwe wose.

¹⁶ Ula eitikija na ebatizwa enekia, ula esiitikija enechiliwa.

¹⁷ Maluwano ama meneraterana nawo weitikija; hena izina langu wenekinya maluhungu; weneteta na malumi masha;

¹⁸ weneuha nyoka; mtano wekinywa kindu cha kufwija, tekinewanyamara; weneghera mikono wanga ya wewadjua, nawo wenekia.

¹⁹ Haya Mzuri ekinaidiwe kuteta nawo, akauhwa wanga Izuwa, akaikaa ha kuume kwa Izuwa.

²⁰ Wala wekifuma wakatinda hose, Mzuri ekiketa nawo, na ekikindindija Kiteto hena maluwano meraterane. Amen.