Marko 15 - Sumu Yedi ya Isa Masiya 1906 Kitamo 1897 Malumbo 1905

¹ Chwi heyawo wakaareha chila wakohani wabaha hamwe na waghosi, na watama, na lumungu lwose, wakamfunga Yesu, wakamtika wakamwete ha Pilato.

² Akambujanya Pilato, Niwe mfumwa wa Wayahudi?

³ Ekitalua amburra, Wateta. Wakalinganya muno wakohani wabaha.

⁴ Pilato akambujanyawa ekiteta, Toutalua kiteto? Yoa, mburi ijo wakung’olia.

⁵ Nete Yesu tatalua kiteto kimwe, mtano akarighiwa Pilato.

⁶ Hena karamu awachunguiya mwe echungiwe, wemkundie.

⁷ Heokie eitangwa Barabba, echungiwe hamwe nawo wearehe kilinganya naye: wearehe ukoma ghati ya kilinganya.

⁸ Na matorano wekiloza, wakawoka kukunda sa earehe misi yose hawo.

⁹ Pilato akawatalua, ekiteta, Mwakunda nimuchunguiye mfumwa wa Wayahudi?

¹⁰ Amu akatisiwa ti ha luneng’o wakohani wabaha wamng’ola.

¹¹ Wakohani wabaha wakaeleja matorano keba awachunguyie Barabba.

¹² Pilato ekitaluawa awawurre, Mwakunda kini, mimketeze ula mumwitanga mfumwa wa Wayahudi?

¹³ Wakalozawa, Mbanike.

¹⁴ Pilato akawawurra, Amu owiwi ani eketie? Wakaneta kuloza, Mbanike.

¹⁵ Pilato ekikunda kuwaizihija matorano akawachunguyia Barabba, akamng’ola Yesu, abighwe, awanikwe.

¹⁶ Asikari wakamwete ndeni ya nyumba, niyo Praitorio, wakawaitanga hamwe Iweriri yose.

¹⁷ Wakamdoka bendera, wakamghera lumerisia wekiluiwita na mivwa;

¹⁸ wakawoka kumkezia, Ngezia, Mfumwa wa Wayahudi.

¹⁹ Wakambigha mtwi na ighughu, watamtufia mate, wakadung’uta wakamsemba.

²⁰ Mtano wekinamsole, wakamhambua bendera, wakamdoka suke jakwe ye, wakamwete awanikwe.

²¹ Wakamsingirija mundu ewetia, Siman Mkurene, ekifuma shighati, wawee Iskandea na Rufu, atike msalaba wakwe.

²² Wakamwete wanga ya handu ha Golgotha, niyo ikitisiwika, handu ha kiborong’.

²³ Wakamwinga kunywa mvinyo ugerirwe manemane, nde ye tauhia.

²⁴ Mtano wekinambanike wakaghawanya suke jakwe, wekibigha kura wanga jawo, ti mundu ose auhe kini.

²⁵ Iokie saa ya katatu wakambanika.

²⁶ Heokie na itamo ya ulinganya wakwe litamiwe wanga, MFUMWA WA WAYAHUDI.

²⁷ Na hamwe naye wawanika na wasoki weri, mwe mbai yakwe ya kuume, na mwe mbai ya kumoso.

²⁸ Lafika itamo liteta, Akatarika hamwe nawo watekwa.

²⁹ Nawo wewetie wakamtetia utiri, wekikushakusha mitwi yawo, wekiteta, Wa! Unyamara hekalu, na hena misi mitatu ulijenga,

³⁰ ukukije mwenye, usee ghati ya msalaba.

³¹ Huwo na wakohani wabaha wekisola wonawo hamwe na watama, wakateta, Ewakijije wengi, mwenye teidima kukija:

³² Masihi mfumwa wa Israeli asee ingeriaha ghati ya msalaba, tuwone na tuitikije. Wala wesulibijwe hamwe naye wakamwetie nyare.

³³ Ikioka saa ya katandatu, heokie kija wanga ya isanga lose, mtano saa ya kenda.

³⁴ Na saa ya kenda Yesu akaloza na ighonda ibaha, ekiteta, Eloi, Eloi, lama sabakthani? Niyo ikitisiwika, Izuwa wangu, Izuwa wangu, nikini unishigha?

³⁵ Wandu weimuke hafuhi wekisikia wakateta, Emwitanga Eliya.

³⁶ Mwe ekisara, akaizuja sifongo na siki, akaighera na nyungu, akamwinga ainywe, ekiteta, Mshighe, tuyoe kwakicha Eliya eza amseje.

³⁷ Yesu eking’ola ighonda ibaha, akahema ngoro.

³⁸ Pazia la hekalu likabajika vibarandu viri wanga mtano si.

³⁹ Ekiwona njama eimuke kumrongekia, ti ekiloza akahema ngoro, akateta, Kididi mundu uu eokie Mwana wa Izuwa.

⁴⁰ Heokie na wache weyoa hae, ghati ya awa Maryamu Magdalene, na Maryamu mee Yakobo mdongo na Yose,

⁴¹ na Salome, niwo ekinaoke ghati ya Galilaya wemratere na wemwindie, na wengi weingi wekoyia naye mtano Yerusalemi.

⁴² Mtano ingeriaha ikioka chamagheri, ikinaoke paraskeue, niyo uoho kuwoka kwa sabato,

⁴³ ekiza Yusufu eye wa Arimathaya, njama mwenye nganyi, eokie na mwenye ekiuyoyia ufumwa wa Izuwa, akaria kuingia ha Pilato, akakunda muri wa Yesu.

⁴⁴ Pilato akarighiwa ti ingeriaha afwa; mtano ekimwitanga akida akambujanya ti too aho afwa:

⁴⁵ ekitisiwa hena akida, akamwinga Yusufu muri.

⁴⁶ Naye ekizora suke akamseja akamkoda ghati ya suke, akambika ghati ya mbira, iforiwe ghati ya mabwe, akabingilisha ibwe wanga ya mbenge ya mbira.

⁴⁷ Maryamu Magdalene na Maryamu wa Yose wakawona handu ahawikwa.