Marko 14 - Sumu Yedi ya Isa Masiya 1906 Kitamo 1897 Malumbo 1905

¹ Iokie Pasaka na isichachwa kutera kwa misi miri, wakaenda wakohani wabaha na watami wawoneze kumghura hena kucha na kumkoma.

² Wakateta, Si ghati ya karamu, isioke kilinganya ghati ya wandu.

³ Ekioka ye ghati ya Betania nyumbeni ha Siman mwenye ukoma, ekiikaa mezeni, akaza mche mwenye alabastro ya marhamu ya nardo pistikesi ya zora mbaha, ekiibaa alabastro, akaimiminia mtwini hakwe.

⁴ Weoho wereghije na ndeni, wakateta, Nikini waoka uteko uu wa marhamu?

⁵ Amu marhamu ikitaghwa na kukela kwa dinari maghana matatu, na kung’olwa hena wakiwa: wakamnunuwikia.

⁶ Akateta Yesu, Mshigheni, nikini mumghera wukiwa? Aketa nezo hangu.

⁷ Amu misi yose mna wakiwa hamwe na unywi, na mukakunda muidima kuwaketa nezo; mi tomuoho nami misi yose.

⁸ Aketa vila eoho navyo, arongora kughera muri wangu marhamu hena kujikwa kwangu.

⁹ Amin namburra, handu hose ineikaghambwe Anjili ii ghati ya masanga mose, navyo eviketa uu vinetetwa hena kukumbusha kwakwe.

¹⁰ Na Yuda Iskariota, mwe wawo waikumi na weri akatonga ha wakohani wabaha amng’ole hawo.

¹¹ Wekisikia wakaizihirwa, wakatemiana kumwinga fetha. Akaenda awoneze kumng’ola magheri ma kuwawe.

¹² Mtano musi wa kuwoka wa isichachwa, wekinasinze Pasaka, waanalosha wakwe wamburra, Nihi ukundie tutonge tureareha uile Pasaka?

¹³ Akatuma weri wa waanalosha wakwe, ekiwawurra, Mtonge henyu ghati ya kaa, enemtorana mundu etikie nyungu ya mbombe, mratereni:

¹⁴ na hala enehoingia, mburreni mwenye nyumba, Mlosha ateta, Nihi ha kusowoka nile Pasaka na waanalosha wangu.

¹⁵ Naye enembonja ghu mbaha itandikwe ikaidiwike: uko mwarehie.

¹⁶ Wakafuma waanalosha wakwe, wakaza kaa, wakawona sandu ewawurire, wakaareha Pasaka.

¹⁷ Ikioka chamagheri eza hamwe nawo waikumi na weri.

¹⁸ Nawo wekiikaa mezeni na kula, atete Yesu, Amin namburra, ti mwe wenyu ekila nami enening’ola.

¹⁹ Wakawoka kuingiwa ni wukiwa, na kumburra mwe mwe, Ni mi?

²⁰ Na ungi, Ni mi? Ekitalua akawawurra, Mwe wa waikumi na weri etoweja hamwe nami ghati ya ibongo.

²¹ Mwana wa Adamu atonga hakwe sawundu etamiwe: wukiwa hakwe mundu ula emng’ola Mwana wa Adamu! ekioka keba ye esiwoneka mundu ula.

²² Nawo wekila, Yesu ekiuha ibumunda, ekitasia, akabaa, akawainga akateta, Uheni, leni, niyo muri wangu.

²³ Ekiuha ndemwa, ekiomba, akawainga, wakainywa wose.

²⁴ Akawawurra, Niyo sakame yangu ya luaghano lusha iitike hena weingi.

²⁵ Amin namburra, ti sinenywawa ya ugherwa wa mzabibu, mtano musi ula nineikaunywe msha ghati ya ufumwa wa Izuwa.

²⁶ Wekiidiwa kuwina wakafuma mtano nduwi ya zeituni.

²⁷ Yesu awawurre, Muneshishirwa wose hena mi kio iki, amu itamiwe, Ninembigha mrisha, na maghonji meneghawanyika.

²⁸ Kake nineikaidiwika kuwuka, ninemurongoria kutonga Galilaya.

²⁹ Petro akamburra, Na wose wekishishirwa, si mi.

³⁰ Amburre Yesu, Amin nakuwurra, ti we yoo, kio iki, kuwoka nguruwi isimeiya kandu keri, unenikania kandu katatu.

³¹ Naye akaneta muno kuteta, Mtano ikiniwe kufwa nawe, sinekukania. Huwo wakateta na wose.

³² Nawo weza handu izina lakwe Gethsemane awawurre waanalosha wakwe, Ikaeni aha, mtano nineikaniombe.

³³ Auha Petro na Yakobo na Yohana hamwe naye, akawoka kuing’asiwa na kuingiwa ni wukiwa.

³⁴ Awawurre, ngoro yangu ina wukiwa wiingi mtano kufwa, ikaeni aha muchewe.

³⁵ Ekitonga kurongora hadongo, akagwa si, akaomba kwakicha kuidima kuketika, magheri mamwetie:

³⁶ Akateta, Abba, Apa, we waidima vyose; nitikie ndemwa ii; nde sioho nikundie mi, nde we.

³⁷ Ekiza awawona weshinjie; amburre Petro, Siman, washinjia? Touna zinya ya kuchewa saa mwe?

³⁸ Cheweni ndeombeni, musiwone kuingia ghati ya kugheshwa: ngoro ianguhe, muri mnana.

³⁹ Ekitongawa akaomba, ekiteta kiteto kilakila.

⁴⁰ Mtano ekihunduka akawawona weshinjiewa, amu meso mawo maemea, nete tewetisiwe kumtalua.

⁴¹ Ekiza ya katatu, awawurre, Shinjieni ishighajike, musowoke: yafika, magheri maza; Mwana wa Adamu ang’olwa mikononi hawo wenye kutekwa.

⁴² Wukeni, tutonge, ula ening’ola asongeria.

⁴³ Chwi ekioka ghati pa kuteta, afika Yuda, eye mwe wa waikumi na weri, na hamwe naye matorano mengi na mihandi na marungu, wefumie ha wakohani wabaha na watami na waghosi.

⁴⁴ Naye eng’ola awainga luwano, ekiteta, Ula ninemnyonyoza, niye; mghureni, mumtike nezo.

⁴⁵ Ekiza chwi ekimtongia ateta, Rabbi, Rabbi; akamnyonyoza muno.

⁴⁶ Wala wakamghera mikono yawo, wakamghura.

⁴⁷ Mwe wawo weimukie, ekijuta muhandi, akambigha mzoro wa mkohani mbaha, akamtema isikio.

⁴⁸ Ekitalua Yesu, akawawurra, Sa wanga ya msoka mwafuma na mihandi na marungu, muniuhe?

⁴⁹ Misi na misi neikee henyu ghati ya hekalu nikilosha, nete tomunighurire: nde matamo mawone kufishwa:

⁵⁰ wekimshigha wose wakamatuka.

⁵¹ Na kabwange kamwe akamratera, edokie suke wanga ya utuhu; wabwange wakamghura.

⁵² Naye ekiishigha suke akawamatukia tuhu.

⁵³ Wakamtika Yesu ha mkohani mbaha, wakawunganyika hakwe wose wakohani wabaha, na waghosi na watama.

⁵⁴ Na Petro akamratera hae mtano ndeni ghati ya nyumba ya mkohani mbaha; akaoka ekiikeesi nawo wazoro, akaota moto.

⁵⁵ Wakohani wabaha na lumungu lose wakakunda wanga ya Yesu mburi ya kumfwija, nete tewewonie.

⁵⁶ Amu weingi wakamng’olia mburi ya maongo, nete mburi yawo si mwe.

⁵⁷ Mtano wengi wekiimuka wakamng’olia mburi ya maongo,

⁵⁸ wekiteta, Uswi twamsikia ekiteta, ti, mi ninelinyamara hekalu ili, liarehike na mikono, na hena misi mitatu ninejenga lingi lisiarehike na mikono.

⁵⁹ Nete huwo mburi yawo si mwe.

⁶⁰ Ekiimuka ghati mkohani mbaha akambujanya Yesu ekiteta, Toutalua kiteto?

⁶¹ Awa wakung’olia mburi ani? Akahuja, nete tatalua kiteto. Mkohani mbaha akambujanyawa, ekimburra, Niwe Masihi, Mwana wakwe etasiwe?

⁶² Yesu akateta, Nimi, na unywi munembona Mwana wa Adamu eikee mkono wa kuume wa zinya, na ekiza na majumbi ma wanga.

⁶³ Mkohani mbaha akabaja suke yakwe, ekiteta, Tukundiezewa weng’ola mburi?

⁶⁴ Musikie utiri: muwonaze? Wose wakamchilia yambe kufwa.

⁶⁵ Wakawoka wengi kumtufia mate, na kumfinikira wusho, na kumbigha na maluhi, na kumburra, Ukete uroti: wazoro wakambigha luhi.

⁶⁶ Ekioka Petro ghati ya nyumba si, aza mwe wa wazoro wa kiche wa mkohani mbaha:

⁶⁷ ekimbona Petro ekiota moto akamyoa ekiteta, Na we uokie hamwe na Mnazareti Yesu.

⁶⁸ Akakana, ekiteta, Sitisiwe, nete sisikie vila uviteta. Akafuma some mrangoni, nguruwi ikaiya.

⁶⁹ Mzoro wa kiche akambonawa akawoka kuwawurra weimuke afuhi, ti, Uu ni wa hawo.

⁷⁰ Akakanawa. Kutera hadongowa weimuke afuhi wakamburra Petro, We kididi wa hawo, amu na Mgalilaya, na viteto vyako nivyo.

⁷¹ Akawoka kusesa na kurara, ti, Simtisiwe mundu uu mumteta.

⁷² Chwi ya keri nguruwi ikaiya. Petro akakumbuka kiteto ekimburire Yesu, ti, Kuwoka kwa kuiya nguruwi kando keri, unenikania kando katatu. Akagheshijia akaiya.