Marko 12 - Sumu Yedi ya Isa Masiya 1906 Kitamo 1897 Malumbo 1905

¹ Akawoka kuwawurra hena fwanano. Mundu edongie mizabibu, akajungulusha kirigha, akafurira iwongo, akajenga mnara, akawizija hena waimi, akazoka.

² Akatuma mzoro ha waimi magheri makwe auhie hena waimi magherwa ma mizabibu.

³ Awa wekimwuha wakambigha wakamkinya esina kindu.

⁴ Akatumawa hawo mzoro ungi. Uu wakambiritia mabwe, wakamghera arata mtwi, wakamkinya ekihalelwa.

⁵ Akaingijawa ungi, wakamkoma. Na wengi weingi; wengi wakabighwa, wengi wakakomwa.

⁶ Mtano ekioka na mwana mwe mkundwa wakwe, akamtuma uu hawo kuidiwika, ekiteta, Wenemyoa mwana wangu.

⁷ Wala waimi wakateta wonawo, ti, Uu ni mhoja, haya, tumkome, na uhoja uneoka wetu.

⁸ Wakamwuha, wakamkoma, wakamtagha some ya mizabibu.

⁹ Haya, eneketaze mwenye mizabibu? Eneza awateshe waimi, eneng’olia wengi mizabibu.

¹⁰ Tomusomie itamo ili, Ibwe wesilikundie waesi, ili liokie ibaha la ngandeni;

¹¹ hena Mzuri yaoka ii, nayo ni kurighiwa mesoni hetu?

¹² Wakaenda wamghure, wakaondoka matorano: amu wakatwarija ti ateta fwanano wanga yawo: wekimshigha wakatonga hawo.

¹³ Watuma hakwe wandu wa Wafarisayo na Waherodiano wamteshe hena kiteto.

¹⁴ Wekiza wamburra, Mlosha, twakutisiwa mwenye kididi, nete toukusara hena mundu, amu touyoa wusho wa mundu, nde ulosha hena kididi nzia ya Izuwa. Kiwe kung’ola lushango hena Kaisari, kana sihuwo?

¹⁵ Tung’ole, kana tusing’ole? Naye ekitisiwa ngileja jawo akawawurra, Nikini munighesha? nietieni dinari niiwone.

¹⁶ Wakaete. Naye awawurra, Ni yakweni fwana ili na itamo? Wakamburra, Ni ya Kaisari.

¹⁷ Ekitalua Yesu akawawurra, Hundueni hena Kaisari meoho ma Kaisari, namo meoho ma Izuwa hena Izuwa. Wakamrighiwa.

¹⁸ Na Wasadukayo waza hakwe, watetawo ti tehena kuwuka, wakambujanya, wekiteta,

¹⁹ Mlosha, Musa etutamie, ti, mundwawo mundu ekifwa, ekimshigha mche, nete waana teshigha, mundwawo amwuhe mche wakwe, aimushe uwonwa hena mundwawo.

²⁰ Haya, heokie wandwawo wafungate, wa kuwoka akauha mche, ekifwa teshighie waana.

²¹ Wa keri akamwuha akafwa, nete ye teshighie waana, na wa katatu ni huwo.

²² Wakamwuha wafungate, nete teweshighie waana. Kuidiwika kwa wose na mche akafwa.

²³ Haya, ghati ya kuwuka, weneikawuke, wa uhi wawo eneoka mche? amu wafungate weokie naye mche.

²⁴ Yesu ekitalua akawawurra, Si hena iyo mwateka, musitisiwa matamo, nete zinya ja Izuwa?

²⁵ Amu weneikawuke ghati ya wefwie, tewewoa nete tewewowa, kake weoho sa malaika ghati ya wanga.

²⁶ Ha wefwie, ti wawuka, tomusomie ghati ya kitamo cha Musa, wanga ya mfuro, sawundu Izuwa emburra, Mi ni Izuwa wa Ibrahimu, na Izuwa wa Isaak, na Izuwa wa Yakobo.

²⁷ Siye Izuwa wa wefwie, nde wa weoho na moo: amu ii unwi mwateka muno.

²⁸ Ekiza mwe wa watama ekiwasikia wekibujanyanana, ekitisiwa ti awataluiya nezo, akambujanya, Nikihi ekyo kiteto cha kuwoka hena vyose?

²⁹ Yesu akamtalua, ti, Cha kuwoka cha viteto vyose, Sikia, Israeli, Mzuri Izuwa wetu ni Mzuri mwe:

³⁰ nawe umkunde Mzuri Izuwa wako hena ngoro yako yose, na hena moo wako wose, na hena kucha kwako kwose, na hena zinya jako jose. Nikyo kiteto cha kuwoka.

³¹ Na cha keri hena fwana lakwe, Umkunde walatya wako sa we mwenye. Ekyo kibaha kukela ivi tehena kiteto.

³² Akamburra mtama, Ni kyedi, Mlosha, cha kididi wateta ti ni mwe Izuwa, nete tehena ungi nde ye;

³³ na kumkunda hena ngoro yose, na hena kucha kwose, na hena moo wose, na hena zinya jose, na kumkunda walatya sa mwenye, kuvetia matasi mose na ndaswa.

³⁴ Yesu ekimbona atalua sa mwenye kucha, akamburra, Si hae we ghati ya ufumwa wa Izuwa. Nete mundu tekariawa kumbujanya.

³⁵ Akatalua Yesu akateta ekilosha ghati ya hekalu, Waghambaze watama ti Masihi ni Mwana wa Daudi?

³⁶ Amu Daudi mwenye ateta hena Ngoma Yedi, Mzuri akamburra mzuri wangu, Uketi mkono wa kuume kwangu, mtano ninekaniwike maring’a mako si ya mawato mako.

³⁷ Haya Daudi mwenye emwitanga Mzuri, aokaze mwana wakwe? Weoho weingi ghati ya matorano wakamsikia hena kuizihirwa.

³⁸ Akawawurra ghati ya kulosha kwakwe, Yoeni watama, wekundawo kusela wenye suke ndeza,

³⁹ na kukeziwa kichindeni, na vichumbi vya kuwoka ghati ya masunagogi, na kuikaa wanga ghati ya karamu.

⁴⁰ Wela nyumba ja wache wefwiwe ni wome, na hena uwonjo weikaa ghati ya kuomba, awa weneingwa uchili ulelie.

⁴¹ Ekiikaa Yesu ekikulotija handu ha mali ayoa wegherawo matorano fetha ghati ya handu ha mali, na wengi wenye mali wakaghera meingi.

⁴² Ekiza mche mwe esina mume, mkiwa, naye akaghera kihindi pesa mbiri, niyo kodranto.

⁴³ Ekiwaitanga waanalosha awawurra, Amin namburra, ti mche uu esina mume mkiwa aghera nyingi kukela wose weghera ghati ya handu ha mali:

⁴⁴ amu wose wegherire ghati ya kuneta kwawo, uu ghati ya kuduhuka kwakwe aghera vyose ena, moo wakwe wose.