Marko 11 - Sumu Yedi ya Isa Masiya 1906 Kitamo 1897 Malumbo 1905

¹ Mtano wekinasongerie Yerusalemi, hena Betfage na Betania nduwini ya zeituni, atuma weri waanalosha wakwe,

² awawurra, Mutonge henyu kaa imurongekia, chwi mukiingia munewona mwana njoe echungiwe, esikweika ni mundu, muchungueni mweteni.

³ Mundu ekimburra, Muketaze? teteni, ti, Mzuri emkundie, chwi enemwingija aha.

⁴ Wakatonga wakambona mwana njoe echungiwe mbengeni some, nzia ikinajunguluke, wakamchungua.

⁵ Wandu weimuke uko wakawawurra, Mwareha kini mukimchungua mwana njoe?

⁶ Wakawawurra sandu eghambe Yesu, wakawashigha.

⁷ Wakamwete mwana njoe hena Yesu, wakatagha wanga yakwe suke jawo, akaikaa wanga yakwe.

⁸ Weingi wakatandika suke jawo nzieni, wengi wakatema mani ghati ya miti wakamatandika nzieni.

⁹ Werongore na weratere wakaloza wekiteta, Osanna! Mtasiwa ula eza hena izina la Mzuri;

¹⁰ mtasiwa ufumwa uza ghati ya izina la Bwana, wa apa wetu Daud; Osanna ghati ya wanga!

¹¹ Akafika Yerusalemi, mtano hekaluni: ekinayoe vyose, ikioka magheri ma chamagheri, akafuma mtano Betania, hamwe nawo ikumi na weri.

¹² Mtano heyawo ekifuma ghati ya Betania akasikia nzaa,

¹³ mtano ekiwona hae mtini mwenye ma ni akaza, kwakicha awone kindu ghati yakwe. Mtano ekiza tewonie kindu wanga yakwe nde mani, amu magheri ma tini hai.

¹⁴ Akatalua Yesu akauwurra, Mundu asile ndunda ghati ya we mtano tendarasi. Waanalosha wakwe wakamsikia.

¹⁵ Mtano wekifika Yerusalemi, Yesu akaingia ghati ya hekalu, akawoka kuwakinya wetagha na wezora ghati ya hekalu, akapulusha meza jawo wekoranya fetha, na vichumbi vyao wetagha mabeta,

¹⁶ nete teshighie mundu atike kindu ghati ya hekalu.

¹⁷ Akawalosha ekiwawurra, Teitamiwe, ti, Nyumba yangu ineitangwa nyumba ya kuomba hena mbare jose? Unywi muiareha mbanga ya wasoka.

¹⁸ Wakasikia wetama na wakohani wabaha, wakaenda wawoneze kumtesha, amu wakaondoka, ya kuoka matorano mose wakarighiwa hena kichei chakwe.

¹⁹ Mtano ikioka chamagheri, akafuma some ya kaa.

²⁰ Mtano heyawo wekivetia, wakawona mtini uomie ghati ya makolo.

²¹ Ekikumbuka Petro amburra, Mzuri, yoa mtini urarie, waoma.

²² Yesu ekitalua, awawurra, Muoke na luitikijo lwa Izuwa.

²³ Amu amin namburra, ti, ula eneiwurra nduwi ii, Ukuluke, utaghwe ndiweni; nete teitalwa ngoroni hakwe, nde eitikija ekiteta kineoka, kineoka hakwe sandu etetie.

²⁴ Amu iyo namburra, Vyose munevikunda ghati ya kuomba, mukiitikija ti muneuhia, kineoka henyu.

²⁵ Na unywi mwimukaho kuomba, mushighie, mukioka na kiteto wanga ya mundu, Wawee wenyu eoho wanga amushighie unywi kutekwa kwenyu.

²⁶ Musikashighie unywi, nete Wawee wenyu eoho wanga tenemshighia kutekwa kwenyu.

²⁷ Wakafikawa Yerusalemi, mtano ekisela ghati ya hekalu, wamzia wakohani wabaha na watama na waghosi,

²⁸ wamburra, Hena zinya ani uareha ama, na niani ekuingie zinya ii uwone kuareha ama?

²⁹ Yesu ekitalua akawawurra, Ninembujanya na mi kiteto kimwe, mkanitalua, nami ninemburra na zinya ani naareha ama.

³⁰ Lubatizo lwa Yohana luokie lwa wanga kana lwa waana wa Adamu? Munitalua.

³¹ Wakaareha wakaituka wonawo wekiteta, Tukighamba, lwa wanga, eneghamba, Nikini tomwitikije?

³² Tukighamba, lwa waana wa Adamu, wakaondoka wandu, amu wose wakamghura Yohana, ti ni mroti kididi.

³³ Wekitalua wamburra Yesu, Totutisiwa. Yesu ekitalua awawurra, Nete mi simburra na zinya ani namaareha ama.