Marko 10 - Sumu Yedi ya Isa Masiya 1906 Kitamo 1897 Malumbo 1905

¹ Ekiwuka uko eza ghati ya mihaka ya Uyahudi hena sela ya Yardani, nawa matorano meingi wetonga hakwe, na sawundu emanyerie akawaloshawa.

² Nawo Wafarisayo wekimtongia wakambujanya ti ni kiedi mundu amshighe mche, wekimghesha.

³ Naye ekitalua, akawawurra, Nikini emburire Musa?

⁴ Wakateta, Musa akakunda kumtamia karatasi ya kuchwa, na kumshigha Akatalua Yesu,

⁵ akawawurra, Amu ngoro jenyu jidindie emutamie kiteto iki.

⁶ Too kuwoka kwa kulungwa Izuwa ewaareha mume na mche.

⁷ Amu iyo mundu enewashigha wawee na mee, enekundana na mche,

⁸ nawo weri weneoka muri mwe; mtano siwowa weri, nde muri mwe.

⁹ Amu ii Izuwa akilimbikanya, mwana Adamu asikighawe.

¹⁰ Nawa ghati ya nyumba waanalosha wakwe wakambujanya ya iyo.

¹¹ Awawurra, Enemshigha mche wakwe, ekimwowoa ungi, ashinda wanga yakwe;

¹² na mche ekimshigha mume wakwe, ekiuhwa ni ungi, ashinda.

¹³ Wakamwetie waana awakuware, waanalosha wakawabohia wewaetie.

¹⁴ Ekiwona Yesu, akaregija akawawurra, Washigheni waana waze hangu, musiwaswije, amu wawo sa awa ni ufumwa wa Izuwa.

¹⁵ Amin, namburra, esikunda ufumwa wa Izuwa sa mwana, teingia uko.

¹⁶ Akawashushudirra, akawawika mikono wanga yawo, akawatasia.

¹⁷ Mtano ekifuma nzieni, mundu ekiza ekisara akamdung’utia, akambujanya, Mlosha wedi, niketeze niwone kuhodja moo wa tendarasi?

¹⁸ Yesu akamburra, Nikini uniitanga wedi? tehena wedi nde umwe, niye Izuwa.

¹⁹ Umatisiwe maaghanyo, Usishinde, usikome, usihiwe, usiitikije maongo, usikenge, mughurie nganyi waweeo na mamako.

²⁰ Ekitalua, amburra, Mlosha, ama mose namarinda too umwana wangu.

²¹ Yesu ekimyoa, akamkunda, akamburra, Kimwe ukiiwaa. Tonga hako, utaghe una vyose, uwainge wakiwa, nawe uneoka na mali wanga; hayawa, uniratere mi, ukitika msalaba.

²² Naye akarumbuta hena kiteto iki, akatonga hakwe na wukiwa, amu eokie na mali mengi.

²³ Yesu ekiyoa kujunguluka awawurra waanalosha wakwe, Hena kudinda ani wenye mali weneingia ghati ya ufumwa wa Izuwa.

²⁴ Waanalosha wakarighiwa hena viteto vyakwe. Yesu ekitaluawa awawurra, Waana, ni kudinda ani uku waitikija hena mali waingie ghati ya ufumwa wa Izuwa.

²⁵ Ianguhe ngamela avetie ghati ya iworo la sindano, kukela mumazi kuingia ghati ya ufumwa wa Izuwa.

²⁶ Wakarighiwa muno, wekiteta wonawo, Niani eidima kukia?

²⁷ Ekiwayoa Yesu ateta, Hena wandu tekiidima kuketika, nde siyo ha Izuwa, amu vyose viidima kuketika ha Izuwa.

²⁸ Akawoka Petro kumburra, Yoa uswi twashigha vyose, tukakuratera we.

²⁹ Ekitalua Yesu, amburre, Amin namburra, Tehena eshigha nyumba, kana wandwawo, kana warumburie, kana wawee, kana mche, kana waana, kana ngonde, hena lwangu na hena lwa Anjili,

³⁰ esiingwa kando ighana ingeriaha magheri ama, nyumba, na wanduwawo, na warumburie na mee na waana na ngonde, hamwe na makinyo, na ghati ya akenya iza moo wa tendarasi.

³¹ Weingi wa kuwoka weneoka wa nyuma, na wa nyuma weneoka wa kuwoka.

³² Weokie nzieni wekitonga Yerusalemi, naye Yesu akawarongoria, wakarighiwa, mtano wekiratera wakaondoka. Ekiwauhawa wala ikumi na weri, akawoka kuwawurra vila vinembona,

³³ ti Tutonga Yerusalemi, naye Mwana wa Adamu eneng’olwa hena wakohani wabaha na watama, nawo wenemchilia kufwa, na wenemng’ola hena mbare,

³⁴ na wenemsola, na wenembigha, na wenemtufia mate, na wenemkoma, na musi wa katatu enewuka.

³⁵ Wakamzia Yakobo na Yohana waana wa Zebedayo, wekiteta, Mlosha, tukundie utuarehie kila tunekikunda.

³⁶ Akawawurra, Mkundie nimuarehie kini?

³⁷ Wakamburra, Utuinge tuwone kuikaa mwe mkono wako wa kuume na mwe mkono wako wa kumoso ghati ya ubaha wako.

³⁸ Yesu akawawurra, Tomutisiwe mkikundie; muidima kunywa ndemwa mi ninenywa, na kubatizwa na lubatizo mi nabatizwa.

³⁹ Wakamburra, Twaidima. Yesu akawawurra, Ndemwa nainywa mi, mumenywa, na lubatizo nibatizwa mi, munebatizwa naunywi;

⁴⁰ nde kuikaa mkono wangu wa kuume kana wa kumoso si hangu ning’ole, nde hawo wearehiwe.

⁴¹ Wekisikia waikumi wakawoka kuregija na Yakobo na Yohana.

⁴² Kake Yesu awaitanga awawurra, Mutisiwa ti wegheshijiwa kuoka wa kuwoka wa mbare niwo wazuri wawo, na wabaha wawo wena zinya wanga yawo.

⁴³ Teineoka huwo henyu: nde ula ekundie kuoka mbaha henyu eneoka mwindi,

⁴⁴ naye ekundie kuoka wa kuwoka henyu eneoka muzoro wa wose.

⁴⁵ Amu naye Mwana wa Adamu tezie aindwe nde ainde, na ang’ole moo wakwe ukombola wa weingi.

⁴⁶ Wakafika Yeriko, naye ekifuma ghati ya Yeriko, na waanalosha wakwe, na matorano weingiweingi, mwana wa Timayo, Bartimayo ebajike meso, eikeesi mbai ya nzia ekiomba.

⁴⁷ Mtano ekisikia ti ni Yesu Mnazareti, akawoka kuiya na kuteta, Mwana wa Daudi, Yesu, unisarie.

⁴⁸ Wakamtetia weingi, ahuje. Akaneta muno kuiya, Ee Mwana wa Daudi, unisarie.

⁴⁹ Ekiimuka Yesu, atete aitangwe. Nawo wamwitanga ebajike meso, wekimburra, Uoke na ngoro, wuka, akuitanga.

⁵⁰ Ekitagha suke yakwe, akawuka akaza ha Yesu.

⁵¹ Yesu ekitalua amburre, Ukundie kini, nikuarehieze? Ebajike meso amburra, Rabboni, niwone.

⁵² Yesu amburra, Tonga hako, kuitikija kwako kwakukija. Chwi akawona, akamratera Yesu nzieni.