Malumbo 92 - Sumu Yedi ya Isa Masiya 1906 Kitamo 1897 Malumbo 1905

¹ Nikyo kindu kyedi kumng’olia haika Mzuri: na kulivinia maluisiso izina lako, We wanga‐ya‐vyose.

² Kulutoranya lukundo lwako heyawo: na luitikijo lwako kio kyose.

³ Hena kindu kya nzighi ikumi, na hena kinanda: hena kiiyo kya luitusho kya kinubi.

⁴ Amu We, Mzuri, uniiseja hena ndima yako: nineng’ara ghati ya ndima ja mikono yako.

⁵ Mbaha nijo ndima jako, Ee Mzuri: makusaro mako matonga si muno.

⁶ Mundu esina kucha tetisiwaye: nete mundu etomode tekitwarijaye.

⁷ Magheri wawiwi wemea sa mani, wa waketi‐viwiwi weketa nguwari wose: niwo wenenyamarwa ndarasi.

⁸ Kake We, Ee Mzuri: niwe wanga ndarasi na ndarasi.

⁹ Amu yoa, maring’a mako, Ee Mzuri, amu yoa, maring’a mako meneteka: waketi‐viwiwi wose wenezarijwa.

¹⁰ Kake uikweja mbembe yangu sa mbembe ya mbogho: nigeriwe mafuta mawisi.

¹¹ Na ijiso langu lawona sandu nikundie wanga ya maring’a mangu: masikio mangu masikia sandu nikundie ya waareha‐viwiwi weniwukia.

¹² Mwenye‐ngalo eneketa nguwari sa ichangara: eneeha sa mwerezi wa Lebanoni.

¹³ Wala wehandwa nyumbeni ha Mzuri: weneketa nguwari viwanzeni ha Izuwa wetu.

¹⁴ Weneneta kugera ndunda magheri ma wughosi: weneizua makakama na weneoka na mani meingi.

¹⁵ Nesa wawondje ti Mzuri eirowili: niye ibwe langu, na tehena hakwe wusiwungalo.