Malumbo 91 - Sumu Yedi ya Isa Masiya 1906 Kitamo 1897 Malumbo 1905

¹ Ula etua ghati ya handu‐ha‐mbiso hakwe Eye wanga ya vyose: eneikaa si ya kivuri kyakwe Mwenye‐zinya.

² Ninemtetia Mzuri, Niye matukio langu na boma yangu: Izuwa wangu, eye namwitikija.

³ Amu enekung’ola ghati ya izero la mwendandeghe: na ghati ya ndwari mbiwi.

⁴ Enekufinikira na mazaghu makwe, na si ya mazaghu makwe uneareha matukio: kididi yakwe ni ngao na finikiro.

⁵ Toukaondoke we hena luitisho lwa kio: nete hena mvwi utonga hemusi.

⁶ Hena ndwari yasela kijeni: nete hena unyamaro utesha hemusi.

⁷ Elfu wenegwa hena mbai yako, na elfu ikumi hena mkono wa kuume wako: kake tekikakusongerie we.

⁸ Kake na meso mako uneyoa: na unekiwona kiingwa kyawo wawiwi.

⁹ Amu We, Ee Mzuri, niwe matukio langu: umwosha Eye wanga ya vyose matuo mako.

¹⁰ Tehena kindu kiwiwi kinekuzia: nete tehena ndwari inesongeria hema yako.

¹¹ Amu enewang’olia malaika wakwe aghanyo wanga yako: wakurinde ghati ya nzia jako jose.

¹² Wenekutika mikononi hawo: usikubighe kughu kwako na ibwe.

¹³ Unejiwata simba na nyoka: mwana‐simba na nyoka mbaha unejiwatawata na maghu.

¹⁴ Amu ewika lukundo lwakwe wanga yangu, hena lwa iyo ninemkija: ninembika wanga, amu elitisiwa izina langu.

¹⁵ Eneniitangia, na ninemtalwa; nineoka naye ghati ya wasi: ninemkija, na ninemguria nganyi.

¹⁶ Na kukia kweza ninemwighusha: na ninembondja lukio lwangu.