Malumbo 9 - Sumu Yedi ya Isa Masiya 1906 Kitamo 1897 Malumbo 1905

¹ Ninemwinga haika Mzuri hena ngoro yangu yose: ninetoranya marighio mako mose.

² Nineizihirwa, na ninekuang’aria: ninelivinia izina lako, uoho wanga.

³ Maring’a mangu wekigharuka nyuma: wetandarika, weteka, msongorana wako.

⁴ Amu ufishie wuchili wangu na viteto vyangu: uikee kiikayoni, ukichila hena ngalo.

⁵ Ujibohie mbare, umnyamare mbiwi: ulihaija izina lawo ndarasi na ndarasi.

⁶ Maring’a waiting’o, kuteka ndarasi: navyo viongo uvisanzue, mtano lukumbusho lwawo lwateka.

⁷ Kake Mzuri eikaa ndarasi: ekiwika kiikayo kyakwe hena wuchili.

⁸ Enemachilia mwenye masanga hena ngalo: enewachilia wandu hena vitikane.

⁹ Mzuri eneoka matukio lawo weinyalwa: matukio la magheri ma wasi.

¹⁰ Nawo wekutisiwa izina wenekuitikija: amu touwashigha wala wekuenda, Mzuri.

¹¹ Mbinieni Mzuri eikee Sayuni: rarijeni hena wandu mihiro yakwe.

¹² Amu ula eihia sakame awakumbuka: tewaiwaaye wakiwa weiya.

¹³ Unisarie, ee Mzuri, yoa winyo langu hawo wenishishirwa: we uniwushija ghati ya mbenge ja kifwa.

¹⁴ Nesa nitinde maluisiso mako mose: mbengeni ha mwana Sayuni, ninelung’aria lukio lwako.

¹⁵ Mbare walimerukia ikongo waliareha: hena izero weliwisie wegurwa maghu mawo.

¹⁶ Mzuri etisiwika, eareha wuchili: mbiwi agurwa ni ndima ja mikono yakwe mwenye.

¹⁷ Wawiwi wenehunduka Ahera: mbare jose wemwiwaa Izuwa.

¹⁸ Amu tekaiwawe mwasi misi yose: lugumirio lwawo wakiwa toluneteka ndarasi.

¹⁹ Uwuke, ee Mzuri; asilele mundu: mbare jichiliwe msongorana wako.

²⁰ Uwagere fole, ee Mzuri: mbare jiwone kukutisiwa wandu tiki.