Malumbo 86 - Sumu Yedi ya Isa Masiya 1906 Kitamo 1897 Malumbo 1905

¹ Uliinamije isikio lako, ee Mzuri, urenitalwa: amu nimi mkiwa na mwenye kuwaiya.

² Uirinde ngoro yangu, amu nimi mguri‐mbea: ee Izuwa wangu we, umkije mzoro wako eitikija hena we.

³ Unisarie, ee Mzuri: amu nakuiyia we hemusi puti.

⁴ Umwiizihira ngoro mzoro wako: amu hako, ee Mzuri, naiwushija ngoro yangu.

⁵ Amu, we, ee Mzuri, u wedi, na ukundie kushighia: na waizua lusario hena wose wekuitangia.

⁶ Uinge isikio, ee Mzuri, hena luombo lwangu: na ulisikije ighonda la kusemba kwangu.

⁷ Musi wa wukiwa wangu ninekuitangia: amu unenitalwa.

⁸ Tehenaho sa we ghati ya maizuwa, ee Mzuri: nete tehenaho ndima sa ndima jako.

⁹ Mbare jose ujiarehie jineza na jineomba msongorana wako, ee Mzuri: na jineliisisa izina lako.

¹⁰ Amu niwe mbaha, na waketa marighio: niwe Izuwa mjenye.

¹¹ Uniloshe nzia yako, ee Mzuri; nineiselia kididi yako: uioshe ngoro yangu mwe, ya kuliondoka izina lako.

¹² Ninekuisisa, ee Mzuri Izuwa wangu, na ngoro yangu yose: na ninelirumisha izina lako ndarasi.

¹³ Amu lusario lwako ni lubaha hangu: na uing’olie ngoro yangu ghati ya Sheol ioho si.

¹⁴ Ee Izuwa, wenye mafuti weniwukia, na wunganyiko la wenye kuketa zinya weienda ngoro yangu: na tewekuwika we msongorana wawo.

¹⁵ Kake we, ee Mzuri, ni Izuwa mwenye kuizua lusario na mvono: mboha hena kureghija, na mwenye lusario lwingi na kididi nyingi.

¹⁶ Ukugharushe hangu, na unisarie: umwinge mzoro wako zinya yako, na umkije mwana wa mzorowakiche wako.

¹⁷ Uniwondje luwano lwa vyedi; nesa wala wenisua waluwone wa wagurwe ni soni: amu ni we, Mzuri, unighenja na undindija.