Malumbo 84 - Sumu Yedi ya Isa Masiya 1906 Kitamo 1897 Malumbo 1905

¹ Nize masikani jako ni jedi: Mzuri wa malweriri we!

² Ngoro yangu ina nyami, ee, yasokea hena viwanza vyakwe Mzuri: ngoro yangu na muri wangu jamwiyia Izuwa mwenye moo.

³ Ee, kadeghe kawona nyumba yakwe, na njerunjeru handu ha kuyaja waana wakwe: visiko vyako, ee Mzuri wa malweriri, Mfumwa wangu, na Izuwa wangu.

⁴ Wetasiwa wala wetua na nyumba yako: weneoka wekikuisisa misi yose.

⁵ Etasiwa mundu ula ena zinya ghati yako: na ngoroni hakwe nzia mbaha hena Sayuni.

⁶ Wekivetia ghati ya Iwongo la Kuiya weliosha handu ha maluchoro: ee, mvua ya kuwoka yaifinikira na matasio.

⁷ Wetonga kufuma zinya mtano zinya: mundu ose wawo ewonwa msongorana wakwe Izuwa ghati ya Sayuni.

⁸ Ee Mzuri Izuwa wa malweriri, ulusikie luombo lwangu: ung’ole isikio, ee Izuwa wa Yakobo.

⁹ Yoa, ee Izuwa ngao yetu: uwone wusho wakwe ula egeriwe mafuta na we.

¹⁰ Amu musi viwanzeni hako keba kukela elfu: keba kashi nioke mrinda‐mbenge nyumbeni hakwe Izuwa wangu, kukela nitue na hema ja owiwi.

¹¹ Amu Mzuri Izuwa ni nzano na ngao; Mzuri eneng’ola mvono na kirumi: nete tehenaho kindu kyedi enewaima wala wesela nezo.

¹² Ee Mzuri wa malweriri: etasiwa mundu ula eitikija hena we.