Malumbo 81 - Sumu Yedi ya Isa Masiya 1906 Kitamo 1897 Malumbo 1905

¹ Tumbinie muno Izuwa zinya yetu: tumlozie hena kuizihirwa Izuwa wa Yakobo.

² Wushijeni lumbo, eteni na kunu ngoma: kinubi kya kuiseja hamwe na kinanda.

³ Bigheni lughunda hena mweji msha: hena mweji mbaha, hena musi wetu mbaha na wa kuitusha.

⁴ Amu ni itanawo hena Israeli: aghanyo la Izuwa wakwe Yakobo.

⁵ Ekiwikie ghati ya Yusuf hena mburi, ekinafume wanga ya isanga la Misri: hala nivisikie viteto nisivitisiwe.

⁶ Ning’olie kituro kyakwe ghati ya kutika mwagho: mikono yakwe ikashighiriwa ghati ya mbinda.

⁷ Uitange ghati ya wasi, nikakukija: nikakutalwa ha handu ha mbiso ha kururuma: nikakughesha ha mbombe ja Meriba.

⁸ Sikieni, wandu wangu, ninekuliya mburi: ee Israeli, kwakicha unenisikija.

⁹ Tekaoke izuwa wa kigheni hako: nete toukaombewe izuwa wa kigheni.

¹⁰ Nimi Mzuri Izuwa wako, Eye ekukweja kufuma isanga la Misri: ulijughue itumbu lako nezo, na nineliizuja.

¹¹ Kake wandu wangu tewelisikijawo ighonda langu: na Israeli tenikundieye nete kadongo.

¹² Huwo nikawashigha kuratera kugolong’a kwa ngoro yawo: nesa wasele ghati ya mburi yawo wenye.

¹³ Kashi wandu wangu wekinisikija: kashi Israeli ekisela ghati ya nzia jangu!

¹⁴ Ineoka wanguwangu ninewalela maring’a mawo: na ninegharusha mkono wangu wanga ya wazo wawo.

¹⁵ Wala wemsua Mzuri weneoka wekikugera si yakwe: kake magheri mawo meneoka mekiikaa ndarasi.

¹⁶ Eneoka ekiwarisha pia na ngano yedi kukela yose: na nineoka nikikuighusha na nzoke kufuma ibweni.