Malumbo 80 - Sumu Yedi ya Isa Masiya 1906 Kitamo 1897 Malumbo 1905

¹ Usikie, Ee Mrisha wa Israeli, umtika Yusuf sa ifio: uikee wanga ya makerubi, ung’ae.

² Msongorana wakwe Efraim, na Benyamini, na Manasse: uiwushe zinya yako, uze kutukija.

³ Utugharushewa, ee Izuwa: uuangaje wusho wako, na tunekijwa.

⁴ Ee Mzuri Izuwa wa malweriri: mtano rini uneregija hena luombo lwa wandu wako?

⁵ Uwarishe na kidjo kya masoji: ukawainga masoji ma kunywa meingi muno.

⁶ Watuosha iwoo hena walatya wetu: na maring’a metu weseka wonawo.

⁷ Utugharushewa, ee Izuwa wa malweriri: uuangaje wusho wako, na tunekijwa.

⁸ Uetie mzabibu kufuma Misiri: ukajikinya mbare, ukauhanda.

⁹ Ukauarehia mwanya: ukaigera migi yakwe si muno, ukaliizuja isanga.

¹⁰ Nduwi jikafinikirwa na mvuri wakwe: na mbagha jakwe jikaoka sa mierezi yakwe Izuwa.

¹¹ Ukajiingija mbagha jakwe mtano na bahari: na viwaro vyakwe mtano na Mfuro.

¹² Nini wamabaa malusarigho makwe: mtano wose wevetie nzieni weutunda?

¹³ Nguwe ya kititoni yaukolua: na nyama ja shighati jakurisha wanga yakwe.

¹⁴ Ugharuke, twakusemba, ee Izuwa wa malweriri: uyoe kufuma wanga, na uwone, na uuzie mzabibu uu.

¹⁵ Na muti mkono wako wa kuume uuhandie: na mbagha ila uidindije hena lwako mwenye.

¹⁶ Yashotwa na moto, yatemwa: weteka hena kudewera kwa wusho wako.

¹⁷ Mkono wako uoke wanga ya mundu wa mkono wako wa kuume: wanga ya mwana wa mundu ula umdindije hena lwako mwenye.

¹⁸ Huwo totukahunduke nyuma kufuma hako: utuwushe, na tuneliitangia izina lako.

¹⁹ Utugharushewa, ee Mzuri Izuwa wa malweriri: uuangaje wusho wako, na tunekijwa.