Malumbo 78 - Sumu Yedi ya Isa Masiya 1906 Kitamo 1897 Malumbo 1905

¹ Sikijeni, unywi wandu wangu, sheria yangu: inamijeni masikio menyu hena viteto vya itumbu langu.

² Ninejughua itumbu langu hena mfwanano: nineviteta viteto vya mbiso vya kae.

³ Vila tuvisikie tukavitisiwa: na waapa wetu wetuwurrie.

⁴ Totukaviwise uswi hena waana wawo: tukilitindia irika la akenya maluisiso ma Mzuri, na zinya yakwe, na marighio makwe emaketie.

⁵ Amu eduwija mburi ghati ya Yakobo, akawika sheria ghati ya Israeli: akawaaghanya waapa wetu, wawatisiwija waana wawo vindu vila.

⁶ Nesa irika lila liza litisiwe, niwo waana wekundie kuwoneka: wenewuka na wenewatindia waana wawo.

⁷ Nesa waluwike luing’idaki lwawo ghati ya Izuwa: na wasiiwae ndima ja Izuwa, nde wamagure maaghanyo makwe.

⁸ Na wasioke sa wawawee wawo, irika lidindie na lagolong’a: irika lisigere ngoro yawo nezo, na ngoma yawo teikaayo hakwe Izuwa.

⁹ Waana wa Efraim, wenye nareta na wekitika mawuta: wegharuke nyuma musi wa ngondo.

¹⁰ Tewegurawo aghanyo lakwe Izuwa: wakasua kuiselia sheria yakwe.

¹¹ Wakaiiwaa mihiro yakwe: na marighio makwe ewawondjie.

¹² Vindu vya kuing’asija eviketie mesoni ha wawawee wawo: ha isanga la Misri, na ha mbuwa ya Zoani.

¹³ Echwa bahari, akawavetija ghati na ghati: akajiimusha mbombe sa kizumbu.

¹⁴ Na hemusi akawatika na ijumbi: na kio bagha na kyangaji kya moto.

¹⁵ Akabaja mabwe shighati: akawainga wanywe nezo sa kufuma heforeke.

¹⁶ Akaete malunyonyo pia kufuma ibweni: akaosha mbombe kusea sa mifuro.

¹⁷ Kake wakaneta kumketia ng’oki: wakamgolong’ia Eye wanga ya wose shighati.

¹⁸ Wakamghesha Izuwa ngoroni hawo: wekiomba nyama hena kulangwa kwawo.

¹⁹ Ee, wakateta wanga ya Izuwa: wakaghamba, Izuwa eidima kuarehia meza shighati?

²⁰ Yoa, elibighie ibwe, mbombe jikafuma, malunyonyo makaizua muno: eidima kung’ola na kidjo, enewaetie wandu wakwe nyama?

²¹ Amu iyo Mzuri akasikia, akaregija: moto ukaaka wanga ya Yakobo, oro ikakwea wanga ya Israeli.

²² Amu tewemwitikijewo Izuwa: na teweing’idaki ghati ya lukio lwakwe.

²³ Kake emaaghanyie majumbi wanga: akajijughua mbenge ja majumbini.

²⁴ Akawasejie mana sa mvua, nesa wale: akawainga mahemba ma majumbini.

²⁵ Wandu wakala kidjo kyawo wenye zinya: akawaingijia nyama ya kuighusha.

²⁶ Akaosha ngungu ya mashariki kururuma wanga: na hena zinya yakwe akarongoja ngungu ya kusini.

²⁷ Akawasejia nyama sa purughushe: na ndeghe jina mazaghu sa mzangazi wa bahari.

²⁸ Akaighusha ghati na ghati ya matuo mawo: kujijunguluka nyumba jawo.

²⁹ Huwo wakala, wakaighuta nezo: akawainga kila wekilangwa.

³⁰ Magheri wesimetana na kulangwa kwawo: nyama ikaoka ingeriaha matumbuni hawo.

³¹ Oro ya Izuwa ikakwea wanga yawo, ikakoma wala webandie hawo: ikawagusha wabwange wa Israeli.

³² Hena iki kyose wakaneta kutekwa: wasimaitikije marighio makwe.

³³ Amu ya iyo akaikurija misi yawo na kihaya: na miaka yawo ghati ya fole.

³⁴ Ekinawakome, niho wakambujanyia: wakahunduka wakamwenda Izuwa na ngoro.

³⁵ Wakakumbuka ti Izuwa eokie ibwe lawo: naye Izuwa Eye wanga ya vyose mkombola wawo.

³⁶ Kake wemwisise maongo na itumbu lawo: wakamchwia maongo na lumi lwawo.

³⁷ Na ngoro yawo teirongeke hena ye: nete teweokie waitikiji ghati ya aghanyo lakwe.

³⁸ Kake ye, ekiizua lusario, eshighie owiwi wawo, asiwanyamare: ee, kandu keingi akagharusha kureghija kwakwe, asiakije oro yakwe.

³⁹ Akakumbuka ti weokie muri tiki: ngungu ivetie, isihunduke.

⁴⁰ Kandu ako wemgolong’ie shighati: wakamwosha kushiniwa hala hesina matuo.

⁴¹ Wakagharukawa, wakamghesha Izuwa: wakamdaa Mshenete wa Israeli.

⁴² Tewekumbukewo mkono wakwe: nete musi ekinawakombole hena maring’a.

⁴³ Nize emawikie maluwano makwe ghati ya Misri: na marighio makwe ghati ya mbuwa ya Zoani.

⁴⁴ Akaigharusha mifuro yawo kuoka sakame: na malunyonyo mawo, wasiidime kunywa.

⁴⁵ Akaingija ghati yawo shindaki nyingi, jiwale: na machua, mawanyamare.

⁴⁶ Akang’ola kuneta kwawo hena manyongo: na ndima yawo hena nzighe.

⁴⁷ Akaitesha mizabibu yawo hena mvua ya mabwe: na mikuyu yawo hena mbeho.

⁴⁸ Akajing’ola ng’ombe jawo pia hena mvua ya mabwe: na mafio mawo hena mabwe meshie ma kururuma.

⁴⁹ Akawawiritia kukaehe kwa kuregija kwakwe, oro, na luwawo, na wasi: lweriri lwa malaika wa owiwi.

⁵⁰ Akakuarehia kureghija kwakwe nzia, asijishighie ngoro jawo jisifwe: kake akang’ola moo wawo hena ndwari.

⁵¹ Akawabigha wose wa mbele ghati ya Misri: wabaha wa zinya yawo ghati ya hema ja Ham.

⁵² Akawaosha wandu wakwe mwenye kufuma sa maghonji: akawarongoja shighati sa ifio.

⁵³ Akawatika na kiboha, wasiituke: kake bahari ikawatesha maring’a mawo.

⁵⁴ Akawaete mtano na mhaka wa heshenete hakwe: nduwi ii, mkono wa kuume wakwe uizorie.

⁵⁵ Akajikinya pia mbare msongorana wawo, akawawika kuoka uhoja hena mtambara: akajiikaja mbare ja Israeli hemeni hawo.

⁵⁶ Kake wakamghesha wakamgolong’ia Izuwa Eye wanga ya vyose: wasijigure mburi jakwe.

⁵⁷ Wakagharuka nyuma, wakaketa na urenge sa wawawee wawo: wakagharushwa mbai sa wuta wa ukeleki.

⁵⁸ Wakamreghija na handu hawo ha wanga: wakamwosha kuneng’a hena sanamu jawo jisongowe.

⁵⁹ Izuwa ekinasikie, akareghija: akashishirrwa muno na Israeli.

⁶⁰ Huwo akaishigha masikani ya Shilo: hema eiwikie ghati na ghati ya wandu.

⁶¹ Akaing’ola zinya yakwe hena kuchungwa: na kirumi kyakwe mkononi ha mzo wakwe.

⁶² Akawaingija pia wandu wakwe hena muhandi: akareghija na uhoja wakwe.

⁶³ Moto ukawala wabwange wawo: wabora wawo wakasowa kivino kya wai.

⁶⁴ Wakara wawo wakagwa hena muhandi: ngawiani wawo wasikete kiiyo.

⁶⁵ Niho Mzuri akawuka sa kufuma lughohe: sa mundu mwenye zinya eloza hena mvinyo.

⁶⁶ Akawabigha wazo wakwe wahunduke na nyuma: akawagera nguruna ya ndarasi.

⁶⁷ Nawa akasua hema ya Yusuf: nete tesaghuraye mbare ya Efraim.

⁶⁸ Kake akasaghura mbare ya Yuda: nduwi ya Sayuni eikundie.

⁶⁹ Akahajenga heshenete hakwe sa hekweie: sa masanga emaduwija ndarasi.

⁷⁰ Akamsaghura na Daudi mzoro wakwe: akamng’ola ghati ya virigha vya maghonji.

⁷¹ Akamwete kufuma kuratera maghonji meamwa: awarishe Yakobo wandu wakwe, na Israeli uhoja wakwe.

⁷² Huwo akawarisha hena wuirowili wa ngoro yakwe: akawarongoja hena ng’eno ya mikono yakwe.