Malumbo 74 - Sumu Yedi ya Isa Masiya 1906 Kitamo 1897 Malumbo 1905

¹ Ee Izuwa, nini watutagha ndarasi: nini oro yako yafusha wanga ya ng’onji ja marisho mako.

² Ulikumbuke wunganyiko lako: ulizorie kae.

³ Ulikombole lioke mbare ya uhodja wako: na nduwi Sayuni, henayo uitue.

⁴ Uwushije maghu mako hena mabaiko ma ndarasi: owiwi ose mring’a euketie hesheneteni.

⁵ Wazo wako waruruma ghati ya wunganyiko lako: wewika bendera jawo hena maluwano.

⁶ Wewoniwe sa wandu wewushija mazoka: kikoloni ha miti.

⁷ Na ingeriaha ndima isongowe yakwe yose: weibaa na mazoka na viria.

⁸ Wegera moto heshenete hako: wegera ikwe matuo ma izina lako mtano na si.

⁹ Wakaghamba ngoroni hawo, Tuwanyamare deng’e: weshota masunagogi mose ma Izuwa isangeni.

¹⁰ Totumawona maluwano metu; tehena mroti ungiwa: nete tehena ghati yetu mundu etisiwa mtano rini

¹¹ Mtano rini, ee Izuwa, mzo eneitukuru: mring’a enelirigha izina lako ndarasi?

¹² Nini wahundua mkono wako, mkono wa kuume: uung’ole mbafuni hako, uwakure.

¹³ Kake Izuwa ni mfumwa wangu too kae: ekihira ghati na ghati ya masanga.

¹⁴ Uighawie bahari na zinya yako: uibaie mitwi ya nyangumi mbombeni.

¹⁵ Ukabaabaa mitwi ya ngerere: ukang’ola hena kidjo kya wandu wetue shighati.

¹⁶ Ukabaja luchoro na lunyonyo: ukaomija mifuro mibaha.

¹⁷ Hemusi ni yako, na kio pia kyako: wakiarehia kyangaji na zano.

¹⁸ Wawika mihaka yose ya masanga: waareha irukiruki na kisie.

¹⁹ Ukikumbuke iki, ti mring’a eitukuru, Ee Mzuri: na ti wandu wetomode welirigha izina lako.

²⁰ Usiing’olie nyama ikaehe ngoma ya ibeta lako: usiuiwae moo wa mkiwa wako ndarasi.

²¹ Umayoe maaghanyo: amu handu ha kija ha masanga heiziua matuo ma kuinyala.

²² Mwenye kuinyalwa asihunduke ekigurwa ni soni: mkiwa na mwenye kuwaiya waliisise izina lako.

²³ Uwuke, ee Izuwa, uiliye mburi yako mwenye: ukumbuke nize mundu etomode ekuitukuru hemusi puti.

²⁴ Usiliiwae ighonda la wazo wako: ilimana lawo wekuwukia lakwea lisiitin’go.