Malumbo 73 - Sumu Yedi ya Isa Masiya 1906 Kitamo 1897 Malumbo 1905

¹ Kididi Izuwa wedi hena Israeli: hena wala wezerre ngoro.

² Kake hena mi, maghu mangu afuhi na kuteka: mawato mangu mekundie kushereta.

³ Amu niokie nikiwaneng’a wetomode: nikinawona ti wawiwi weketa nguwari.

⁴ Amu tehenaho machungo ghati ya kifwa kyawo: kake zinya yawo iduwie.

⁵ Teweingiawo na wasi sa waghenji: nete tewerishwa wukiwa hamwe na waghenji.

⁶ Amu ii mafuti meoho sa luse singoni hawo: kuketa‐zinya kwawafinikira sa suke ya kudoka.

⁷ Meso mawo mevimba hena kubanda: wevihete vikela makusaro ma ngoro.

⁸ Wesola, na ghati ya owiwi weteta mainyalo: weteta vibaha.

⁹ Wewika itumbu lawo wanga: lumi lwawo lwasela ghati ya masanga.

¹⁰ Amu ii wandu wakwe wahunduka na uko: mbombe ja kuizua jakurwa nawo.

¹¹ Na weghamba, Nize Izuwa etisiwa: kutisiwa kuoho hakwe eikee wanga?

¹² Yoa, awa niwo wawiwi: nawo, wekisowoka misi yose, wenetijiwa mali.

¹³ Kididi nazerrija ngoro yangu huwo: naoja mikono yangu ghati ya kusatekwa.

¹⁴ Hemusi puti narishwa wukiwa: na kuihijwa kwangu heyawo yose.

¹⁵ Kwakicha nitetie, Nineteta huwo: yoa, nawaketia kirenge irika la waana wako.

¹⁶ Nikinagheshijie nize naidima kukitisiwa iki: iokie ndima mesoni hangu.

¹⁷ Mtano nikinaingie na heshenete ha Izuwa: nikatwarija mwidiwiko wawo.

¹⁸ Kididi uwawike na handu hesherete: uwaghusha si mtano lunyamaro.

¹⁹ Nize weoshwa mrabu chwi: weliwa den’ge na maitusho.

²⁰ Sa ndoto mundu ekiidiwa kuwuka: ni huwo, Ee Mzuri, ukiwuka unedaa sanamu yawo.

²¹ Amu ngoro yangu ishiniwe: nikasomwa vikudi.

²² Nimi nitomode huwo nisitisiwa: niokie sa nyama msongorana wako.

²³ Kake nioho misi yose hamwe nawe: unigura mkono wangu wa kuume.

²⁴ Uneniwondja nzia hena mburi yako: ikuade uneniuhia hena kirumi.

²⁵ Niani nina wanga nde we: nete tehena masangeni nimkundie kukela we.

²⁶ Muri wangu usokea, na ngoro yangu: Izuwa niye zinya ya ngoro yangu na ngata yangu ndarasi.

²⁷ Amu, yoa, wala weoho hae kufuma hako weneteka: uwanyamara wala wose wekuarehia lushindo.

²⁸ Kake kyedi hena mi kumsongeria Izuwa; namwosha Mzuri Izuwa lumatukio lwangu: nesa niliye mburi ya ndima jose jako.