Malumbo 69 - Sumu Yedi ya Isa Masiya 1906 Kitamo 1897 Malumbo 1905

¹ Unikije, Ee Izuwa: amu mbombe jaingia mtano na ngoma yangu.

² Namerukia na itondo liforeke, hesina ha kuimukia: naingia na mbombe iforeke, mtano viroro vyanifinikira.

³ Nabundika na kuiya kwangu; mrangi wangu waoma: meso mangu mesokea nikimwindia Izuwa wangu.

⁴ Wala wenisua wesho ni wengi kukela nyui ja mtwi wangu: wala wekundie kunikoma, wekioka maring’a mangu hena maongo, waaria.

⁵ Niho nikahundua kila nisikiuha: Ee Izuwa, watisiwa utomodi wangu, na matekwa mangu temewiswa hako.

⁶ Wala wekuinda We wasigurwe ni soni hena lwangu, Ee Mzuri Izuwa wa malweriri: wala wakuenda wasioke na nguruna hena lwangu, Ee Izuwa wa Israeli.

⁷ Amu hena lwako nabohiwa: soni yanifinikira wusho.

⁸ Naoshwa mugheni hena wandwetu: na esiwakaa hena waana wakwe iya.

⁹ Amu luneng’o lwa nyumba yako lwanila: na marigho ma wala wekurigha we manigwia.

¹⁰ Nikinaiye, nikinarishe‐wasi ngoma yangu hena kuchunga: kukaoka hena kurighwa kwangu.

¹¹ Nikinakudoke na suke‐ya‐gunia: nikaoka shomio hawo.

¹² Wala weikaa mbengeni wenitetia: na nimi kivino kya wala weengee.

¹³ Kake mi, luombo lwangu ni hako: magheri mekundiwe.

¹⁴ Ee Izuwa, hena wiingi wa lusario lwako: unitalwe hena kididi ya lukio lwako.

¹⁵ Uning’ole ghati ya matondo, nisimerukie: ning’olwe ghati ya wala wenisuie, na ghati ya mbombe jiforeke.

¹⁶ Kiroro kisinilele, nete heforeke hasinimije: nete iwongo lisichunge itumbu lakwe wanga yangu.

¹⁷ Unitalwe, Ee Mzuri; amu lukundo lwako ni lwedi: hena wiingi wa malusario mako ugharuke hangu.

¹⁸ Nete usimbisie mzoro wako wusho wako: amu nala wasi; unitalwe wanguwangu.

¹⁹ Uisongerie ngoma yangu, uikombole: unikombole amu ya maring’a mangu.

²⁰ Watisiwa kurighwa kwangu, na soni yangu, na nguruna yangu: wazo wangu wose weoho msongorana wako.

²¹ Kurighwa kwanibaa ngoro; naizua kushiniwa: nikayoia mwe asarie, kake tehenaho; na wadindiji, nisiwone nete mwe.

²² Wakaniinga nyongo hena kidjo kyangu: na hena ngiru yangu wakaniinga siki ninywe.

²³ Meza yawo msongorana wawo ioshwe izero: na wekioka na luworo, luoke itegho.

²⁴ Meso mawo magerwe kija, wasiwone: vikudi vyawo vioshwe kudedema misi yose.

²⁵ Uwamiminie oro yako: ukaehe wa kuregija kwako uwafikie.

²⁶ Matuo mawo maoke mrabu: mundu asiikae na mahema mawo.

²⁷ Amu wemkinya ula umbighie we: na welia mburi ya luwawo lwa wala uwawinyie.

²⁸ Uuongejie owiwi wawo owiwi: na wasiingie na ngalo yako.

²⁹ Wahaijwe ghati ya kitamo kya moo: na wasitamwe hamwe nawo wenye ngalo.

³⁰ Kake nimi mkiwa na mwenye luwawo: lukio lwako, Ee Izuwa, lunikweje wanga.

³¹ Ninelivinia izina la Izuwa na kivino: na ninemrumisha hena kung’ola haika.

³² Na kunemwiseja Mzuri kukela ng’ombe: kana nzao mwenye mbembe na mbughachu.

³³ Wanyenya weiwona, na weizihirwa: unywi mumwenda Izuwa, ngoro yenyu ikie.

³⁴ Amu Mzuri ewasikia wenye kuwaiya: na tedaaye wachungwa wakwe.

³⁵ Wanga na masanga wamwisise: bahari, na vindu vyose vyatonga uko.

³⁶ Amu Izuwa enekija Sayuni, na enejenga viongo vya Yuda: na wenetua hala, na wenehagura.

³⁷ Waana wa wazoro wakwe weneuhodja: na wala welikundie izina lakwe wenetua uko.