Malumbo 68 - Sumu Yedi ya Isa Masiya 1906 Kitamo 1897 Malumbo 1905

¹ Izuwa awuke, maring’a makwe mazarike: nawo wemsuie wamatuke msongorana wakwe.

² Sa moshi utekateka, ni huwo mazarike: sa machocho machangaruka msongorana wa moto, huwo na wawiwi wateke msongorana wakwe Izuwa.

³ Kake wenye ngalo waizihirwe, wang’are msongorana wakwe Izuwa: Ee, waisejwe na luizihiro.

⁴ Mbinieni Izuwa, livinieni maluisiso izina lakwe: areheni nzia mbaha hena ula evetia ghati ya mashighati; izina lakwe Yah; na ng’areni msongorana wakwe.

⁵ Wawee wawo wesina wawee, na mchili wa ngawiani: Izuwa ghati ya matuo makwe meshenete.

⁶ Izuwa embika mwenye kihebu nyumbeni; ewang’ola wachungwa wakete nguwari: kake wagolong’i wetua na isanga liomie.

⁷ Ee Izuwa, ukinafume msongorana wa wandu wako: ukinateng’ere ghati ya shighati.

⁸ Masanga makadedema, majumbi makagwa msongorana wa Izuwa: mtano Sinai ila msongorana wa Izuwa, Izuwa wa Israeli.

⁹ We, Ee Izuwa, uingije mvua nyingi: ukaudindija uhodja wako ukinabundike.

¹⁰ Mawunganyiko mako makaikaa uko: we, Ee Izuwa, ukawaarehia wakiwa hena uwedi wako.

¹¹ Mzuri eng’ola kiteto: wache wetinda mburi ni lweriri lubaha.

¹² Wafumwa wa malweriri wematuka, wematuka: na ula eikee nyuma nyumbeni eghawa matahwa.

¹³ Muneshinjia ghati ya virigha: sa mazaghu ma ibeta mefinikirwa ni fetha, na nzwa jakwe ni thahabu ing’aa.

¹⁴ Mwenye‐zinya ekinabarasakanye wafumwa uko: heokie sa theluji ghati ya Salmoni.

¹⁵ Nduwi ya Izuwa ni nduwi ya Bashan: nduwi ndeza ni nduwi ya Bashan.

¹⁶ Nini mwadaa, unywi nduwi ndeza, nduwi ila Izuwa eikundie ioke ha kutua kwakwe: Ee, Mzuri enetua uko ndarasi.

¹⁷ Magari ma Izuwa nimo elfu makumeri, nimo elfu wanga ya elfu: Mzuri eoho ghati yawo, Sinai ghati ya heshenete.

¹⁸ Wakwea wanga, watika kuchungwa kwako kukichungwa: wauhia viingijo ghati ya wandu, Ee, ghati ya wagolong’i pia nesa Mzuri Izuwa atue nawo.

¹⁹ Atasiwe Mzuri, etika mwagho wetu misi yose: Eye Izuwa lukio lwetu.

²⁰ Izuwa hetu ni Izuwa wa malukio: na hena Yahuwa Mzuri vila vifumie na kifwa.

²¹ Kake Izuwa eneusoma mtwi wa maring’a makwe: na kitoshi kina nyui kya ula eneta kutonga ghati ya kutekwa kwakwe.

²² Mzuri etetie, ninehundua kufuma Bashan: nineetewa kufuma heforeke ha bahari.

²³ Nesa utoweje kughu kwako na sakame; nesa lumi lwa nguro jako luoke na ifungu lakwe la kufuma maring’a.

²⁴ Weiwonie mitongie yako, Ee Izuwa: mitongie ya Izuwa wangu, Mfumwa wangu, ghati ya heshenete.

²⁵ Wavini werongorie, wabighi‐kinanda wakaratera: ghati na ghati ya wabora webigha ngoma.

²⁶ Mtasieni Izuwa ghati ya mawunganyiko: Eye Mzuri, unywi wa luchoro lwa Israeli.

²⁷ Hena Benyamini mdongo mwitoria wawo, wabaha wa Yuda na siri yawo: wabaha wa Zebulon, na wabaha wa Naftali.

²⁸ Izuwa wako ekung’olia zinya: ukidindije, Ee Izuwa kila uketie hena uswi.

²⁹ Amu ya hekalu lako ghati ya Yerusalemi: wafumwa wenekuetie viingijo.

³⁰ Uibohie nyama ya magugu, matorano ma nzao, hamwe na ndama ja wandu: ekiwata na maghu vihindi vya fetha, ejizarija mbare jikundie ngondo.

³¹ Wabaha weneza kufuma Misri: Kushi inesara kumrongia Izuwa mikono yakwe.

³² Mbinieni Izuwa, unywi mafumwa ma masanga: mbinieni maluisiso Mzuri.

³³ Hakwe ekwea wanga ya wanga, jioho too kae: yoa, eng’ola ighonda lakwe, ighonda la zinya.

³⁴ Mwingeni Izuwa zinya: kirumi kyakwe wanga ya Israeli, na zinya yakwe majumbini.

³⁵ Ee Izuwa, wa kuitusha kufuma heshenete hako: Izuwa wa Israeli, ewainga wandu wakwe zinya na luidimo, Atasiwe Izuwa.