Malumbo 65 - Sumu Yedi ya Isa Masiya 1906 Kitamo 1897 Malumbo 1905

¹ Luisiso lwakuinda, Ee Izuwa, ghati ya Sayuni: na raro linearehiwa hako we.

² We usikia kuomba: wenye muri wose weneza hako.

³ Mawiwi manilela: na matekwa metu, unemahaija.

⁴ Etasiwa mundu umsaghurie, na umsongerije hako; nesa atue ghati ya viwanza vyako: tuneighuta na uwedi wa nyumba yako, heshenete ha hekalu lako.

⁵ Na vindu vya kuitusha unetutalwa ghati ya ngalo, Ee Izuwa wa lukio lwetu: niwe luing’idaki lwa miidiwiko yose ya masanga nawo weoho hae baharini.

⁶ Eye na zinya yakwe eimusha nduwi: ekidoka luidimo kikudini.

⁷ Eye ehujija kururuma kwa bahari, na kururuma kwa visibwe vyawo: na ilimana la mbare.

⁸ Wala pia wetua hae kukela wose weituka hena maluwano mako: waosha mifumie ya heyawo na chamagheri iizihirwe.

⁹ Umazia masanga, umanyosha: umamazija muno.

¹⁰ Mfuro wa Izuwa uizue mbombe: uwaarehia mbeu, ukimaarehia huwo masanga.

¹¹ Wanyosha maforo makwe muno, waseja vituwi vyakwe: wamanyoija na kime; watasia kumea kwakwe.

¹² Wahamba mtwi wa mwaka na uwedi wako: mavetio mako meng’ola kubanda.

¹³ Wakang’ola wanga ya marisho ma shighati: najo nduwi jadoka luizihiro.

¹⁴ Marisho mafinikirwa na mafio: namo mawongo mefinikirwa na mbeke, meloza hena luizihiro, mevina pia.