Malumbo 57 - Sumu Yedi ya Isa Masiya 1906 Kitamo 1897 Malumbo 1905

¹ Unisarie, Ee Izuwa, unisarie; amu ngoma yangu yaenda mashorota hako; Ee, ghati ya mvuri wa mazau mako ninewona mashorota, mtano mawiwi ama maiting’o.

² Ninemwiyia Izuwa Eye wanga ya vyose: eye Izuwa eniarehia vindu vyose.

³ Enetuma kufuma wanga, na enenikija: magheri ula ekundie kunimija enibohia.

⁴ Izuwa eneingija lusario lwakwe na kididi yakwe: ngoma yangu ioho ghati na ghati ya simba.

⁵ Nashinjia ghati yawo weaka moto: niwo waana wa wandu, majegho mawo machumo na mivwi, na lumi lwawo muhandi ukaehe.

⁶ Ukwejwe, Ee Izuwa, wanga ya wanga: na uwedi wako uoke wanga ya masanga mose.

⁷ Wemaarehia mawato mangu wavu; ngoma yangu yainamijwa: wefora ikongo msongorana wangu; wegwa ghati na ghati yakwe wenye.

⁸ Ngoro yangu yaduwijwa, Ee Izuwa, ngoro yangu yaduwijwa: ninewina, Ee, ninewina maluisiso.

⁹ Wuka uwedi wangu; wuka, kinanda na kinubi: mi mwenye ninewuka heyawo muno.

¹⁰ Ninekung’olia haika, Ee Mzuri, ghati na ghati ya wandu: ninekuwinia maluisiso ghati na ghati ya mbare.

¹¹ Amu lusario lwako lubaha mtano wanga: na kididi yako mtano majumbi.

¹² Ukwejwe, Ee Izuwa, wanga ya wanga: na uwedi wako uoke wanga ya masanga mose.