Malumbo 55 - Sumu Yedi ya Isa Masiya 1906 Kitamo 1897 Malumbo 1905

¹ Ung’ole isikio hena luombo lwangu, Ee Izuwa: na usikuwise hena kusemba kwangu.

² Uniyoe, na unitalwe: sisoghokami ghati ya kuiya kwangu, kake nadiha.

³ Amu ya ighonda la mring’a, amu ya kuinyala kwawo wawiwi: amu wewirita owiwi wanga yangu, na ghati ya oro wenikinya.

⁴ Ngoro yangu yawawiwa muno ndeni hangu: na fole ya kifwa yanigwia.

⁵ Kuituka na kudedema kwanizia: na kuiruto kwanilela.

⁶ Nikaghamba, Ije nikioka na mazau sa ibeta: ije nikimatuka, na nikisoghoka.

⁷ Ije nikianga hae: na nikitua shighati.

⁸ Ije nikikusarija hena mashorota: hena ngungu ya zinya na ngurumo.

⁹ Nyamara, Ee Mzuri, ubaje lumi lwawo: amu nawona kuketa‐zinya na iwoo kiongoni.

¹⁰ Hemusi na kio wejunguluka wanga ya malusarigho makwe; owiwi na mateshanyo pia meoho ghati yakwe.

¹¹ Kuketa‐viwiwi kuoho ghati yakwe: luinyalo na ukeleki touwukika ghati ya nzia jakwe.

¹² Amu si mring’a enibohia: kwakicha ni huwo, kwakicha nikitikana nakyo.

¹³ Nete si mzo wangu ekuwushija wanga yangu: amu ngea kwakicha nikikuwisa hakwe.

¹⁴ Kake ni we mughenji wangu: mrongoria wangu, na mbuyaa nimtisiwa muno.

¹⁵ Tulie hamwe mburi inonie: tukasela na nyumba ya Izuwa sa wambuyaa.

¹⁶ Kifwa kimange kuwazia, na wasare kusea na ahera: amu owiwi uoho ghati ya matuo mawo, na ghati yawo.

¹⁷ Na mi, ninemwitanga Izuwa: naye Mzuri enenikija.

¹⁸ Chamagheri, na heyawo, na hemusi nineiya, na ninediha: naye enenisikia ighonda.

¹⁹ Niye eng’ola ngoma yangu na luworo ghati ya ngondo inilelie: amu weokie weingi welelane nami.

²⁰ Izuwa enesikia, enewatalwa, eye eikaa too kae: wala wesina kugharuka, na tewemwituka Izuwa.

²¹ Egera mikono yakwe wanga ya wala weokie na luworo naye: akalubaa lutemiano lwakwe.

²² Itumbu lakwe likashereta sa mafuta, kake ngoro yakwe ngondo: viteto vyakwe vinyoie kukela mafuta‐ma‐mbombe, kake nivyo mihandi ijutiwe.

²³ Gera mwagho wako wanga ya Mzuri, naye enekudindija: tekashigheye wenye ngalo wadedemishwe ndarasi.

²⁴ Kake we, Ee Izuwa, unewaseja: mtano iwongo la lunyamaro.

²⁵ Wandu wa sakame na ukeleki tewekakiewo kihindi kya misi yawo: kake ninekuing’idaki we.