Malumbo 51 - Sumu Yedi ya Isa Masiya 1906 Kitamo 1897 Malumbo 1905

¹ Unisarie, Ee Izuwa, hena wingi wa uwedi wako: hena uwedi wa masario mako uwushije matekwamangu.

² Unioje den’ge ghati ya owiwi wangu: unizerrije ghati ya ng’oki jangu.

³ Amu naghamba matekwa mangu: na ng’oki jangu msongorana wangu misi yose.

⁴ Wanga yako tiki naketa ng’oki, niarehe owiwi mesoni hako: nesa uoke na ngalo hena kuteta kwako, uzerrike magheri ma kuchiliwa.

⁵ Yoa, nilungiwe ghati ya kutekwa: na ghati ya ng’oki iya enitikie.

⁶ Kake yoa, ukundie kididi ndeni: unenitisiwija kucha hena mbiso.

⁷ Unenihaija na husopo, nami ninezerrika: unenioja, nami nineoka mjewa kukela Kiboo.

⁸ Unenisikija mburi ya luizhirwo na luisejo: nesa mawindi umabae maizihirwe.

⁹ Ugharushe wusho wako hena ng’oki jangu: uwushije matekwa mangu mose.

¹⁰ Uniarehie ngoro izerire, Ee Izuwa: uarehewa ngoma yedi ndeni hangu.

¹¹ Usinikinye msongorana wako: nete usiniwushijie Ngoma yako Mshenete.

¹² Uniingewa ludindijo lwa lughenjo lwako: unidindije na Ngoma yako ianguhe.

¹³ Niho ninewalosha watekwa nzia jako: na wenye ng’oki wenegharushwa hako.

¹⁴ Unikije ghati ya lukake lwa sakame, Izuwa, niwe Izuwa wa kuduwa kwangu: na lumi lwangu luneluwinia luisiso lwako.

¹⁵ Unejughua miomo yangu, Mzuri: na itumbu langu linewonya luisiso lwako.

¹⁶ Amu toukundie itasi, kwakicha niking’ola: kake touisejwa na matasi ma kushota.

¹⁷ Itasi la Izuwa nilo ngoro ihuike: ngoro ihuike na ibaike, Ee Izuwa, touneidaawe.

¹⁸ Uoke wa lukundo na wa lusario ha Sayuni: umajenge malusarigho ma Yerusalemi.

¹⁹ Niho uneisejwa na itasi la ngalo; na matasi ma kushota na mang’olwa: niho weneng’ola nzao hena kisiko chako.