Malumbo 45 - Sumu Yedi ya Isa Masiya 1906 Kitamo 1897 Malumbo 1905

¹ Ngoro yangu yaizua pacha na kindu kyedi: naviteta vindu namwarehia mfumwa

² Lumi lwangu nilo kalamu: lwa mundu mwanguhe wa kutama.

³ Niwe wedi kukela waana wa wandu; mvono umiminiwa miomoni hako: amu ii Izuwa ekutasia ndarasi.

⁴ Uchunge muhandi wako kigheni hako, mwenye zinya we: kirumi kyako na ubaha wako.

⁵ Na ghati ya ubaha wako ukikwea vetia na nguwari, amu ya kididi na kinyenya na ngalo: na mkono wako wa kuume unekulosha vindu vya kuitusha.

⁶ Mivwi yako ikaehe; mbare jagwa si yako: ioho ngoroni ha maring’a ma mfumwa.

⁷ Kiikayo kyako, ee Izuwa, nikyo kya ndarasi: isibo la singisi ni isibo la ufumwa wako.

⁸ Ukundie ngalo, ukasua uresi: amu ii Izuwa, Izuwa wako, ekugera mafuta ma luizihirwo kukela waghenji wako.

⁹ Suke‐ja‐kudoka jako jose janyuka manemane, na undi, na mdalasini: kufuma nyumba‐ja‐kifumwa ja majegho vinubi vyakuiseja.

¹⁰ Waana wa wafumwa ghati ya wache wako wenye nganyi: hena mkono wako wa kuume malkia eimuka mwenye thahabu ya Ophir.

¹¹ Sikija, ee mwana, ukusare, uinamije isikio lako: uwaiwae pia wandu wako mwenye, na nyumba ya waweo.

¹² Ni huwo mfumwa eneukunda uwedi wako: amu niye Mzuri wako; na unemwomba we.

¹³ Na mwana‐wa‐kiche wa Turo eneoka hala na kiingijo: nawo wenye mali ghati ya wandu weneomba lughenjo hako.

¹⁴ Mwana‐wa‐kiche wa mfumwa eoho, wedi deng’e: suke‐ja‐kudoka jakwe jichumiwe na rachi ya thahabu.

¹⁵ Eneetwe ha mfumwa ekidoka ndima ichumiwe: wabora waghenji wakwe wemratera weneetwe hako.

¹⁶ Weneetwe na luisejo na luizihirwo: weneingia na nyumba‐ya‐kifumwa yakwe mfumwa.

¹⁷ Handu ha wawaweeo wako weneoka waana wako: unewaosha njama ghati ya masanga mose.

¹⁸ Nineliosha izina lako likumbukwe ghati ya marika mose: amu ii wandu wose wenekuinga haika ndarasi na ndarasi.