Malumbo 44 - Sumu Yedi ya Isa Masiya 1906 Kitamo 1897 Malumbo 1905

¹ Twasikia na masikio metu, ee Izuwa, waapa wetu wetuwurra: ndima ani wahira misi yawo, misi ya kae.

² Ujikinyie mbare na mkono wako, ukawahanda woo: ukawarisha wandu wukiwa, ukawatoranya.

³ Amu tewegurawo isanga na muhandi wawo wenye, nete mkono wawo wenye touwakijie: kake mkono wako wa kuume, mkono wako na kyangaji kya wusho wako, amu uwakundie.

⁴ Niwe Mfumwa wangu, ee Izuwa: aghanya lukio hena Yakobo.

⁵ Hena we tunewaghusha maring’a metu: hena izina lako tunewawata si wala wewuka wanga yetu.

⁶ Amu sineuing’idaki wuta wangu: nete muhandi wangu tounenikija.

⁷ Kake we watukija ghati ya wazo wetu: ukawaitukuru wala wetushishirwa.

⁸ Hena Izuwa twakuisisa hemusi puti: na tuneling’ola izina lako haika ndarasi.

⁹ Kake ingeriaha watutagha, watugera soni: na toufumawe hamwe na malweriri metu.

¹⁰ Watuosha tugharuke hena mzo: nawo wetushishirwa wetutahia.

¹¹ Watung’ola sa maghonji hena kidjo: na utubarasakanya ghati ya mbare.

¹² Watagha wandu wako huwo: nete touwonawe mbucha hena zora yawo.

¹³ Watuosha sola hena walatya wetu: wadawa na wasekwa hena wandu wetujunguluka.

¹⁴ Watuosha mashomio ghati ya mbare: kukushakusha kwa mtwi ghati ya wandu.

¹⁵ Hemusi puti nguruna yangu msongorana wangu: na soni ya wusho wangu inifinikira.

¹⁶ Amu ighonda lakwe mwenye kuitukuru na kurigha: amu ya mring’a na mwihija‐lawi.

¹⁷ Iki kyose kyatugura: kake totukuiwaa, nete totuliketia aghanyo lako hena ukeleki.

¹⁸ Ngoro yetu teigharuka nyuma: nete mawato metu temeng’oleka na nzia yako.

¹⁹ Ukioka watuhua ghati ya handu ha mabau: watufinikira na kivuri kya kifwa.

²⁰ Tukioka tuliiwaa izina la Izuwa wetu: kana tumrongia mikono yetu izuwa igheni:

²¹ Izuwa tenekienda: amu etisiwa vya‐mbiso vya ngoro.

²² Ee, hena lwako twakomwa hemusi puti: twatarwa sa ng’onji hena kusinzwa.

²³ Uwuke, ee Mzuri, nini washinjia: uwuke, usitutaghe ndarasi.

²⁴ Nini wauwisa wusho wako: ukiiwaa wasi wetu na kuinyalwa kwetu.

²⁵ Amu ngoma yetu yainama purughusheni: ndeni yetu yagurana na si.

²⁶ Uwuke hena lughenjo lwetu: na utukombole hena lwa lukundo lwako.