Malumbo 42 - Sumu Yedi ya Isa Masiya 1906 Kitamo 1897 Malumbo 1905

¹ Sa sarigha yahemahema hena mifuro: huwo ngoma yangu yahemahema hena we, Izuwa.

² Ngoma yangu ina ngiru hena Izuwa, hena Izuwa mwenye moo: ni rini nineza na ninefumiria msongorana wakwe Izuwa.

³ Masoji mangu meokie kidjo kyangu hemusi na kio: wekiniwurra hemusi puti, Izuwa wako eohohi?

⁴ Navikumbuka vindu ivi, namimina ngoma yangu ndeni hangu: nize nitongie na matorano, nikawatika na nyumba ya Izuwa.

⁵ Na ighonda la luizihirwo na luisiso: matorano megura musi mbaha.

⁶ Nini wainama, ee ngoma yangu: nini wala wasi ndeni hangu?

⁷ Mwing’idaki Izuwa: amu ikuade ninemwisisa hena luduwo lwa wusho wakwe.

⁸ Ee Izuwa wangu, ngoma yangu yainama ndeni hangu: amu ii nakukumbuka kufuma isanga la Yardeni, na Mahermoni, na nduwi Mizar.

⁹ Heforeke heitanga heforeke hena kururuma kwa ngungu yako: visibwe vyako vyose vidongo na vibaha vyavetia wanga yangu.

¹⁰ Kake Mzuri eneluaghanya lukundo lwakwe hemusi: na kio kivino kyakwe kineoka hamwe na mi, luombo hena Izuwa wa moo wangu.

¹¹ Ninemburra Izuwa ibwe langu, Nini waniiwaa: nini natonga nikishiniwa amu ya kuinyalwa kwa maring’a?

¹² Sa na muhandi mawindini hangu, wazo wangu wenibohia: wekiniwurra misi yose, Izuwa wako eohohi?

¹³ Nini wainama, ee ngoma yangu: nini wala wasi ndeni hangu?

¹⁴ Mwing’idaki Izuwa: amu ikuade ninemwisisa; eye luduwo lwa wusho wangu, na Izuwa wangu.