Malumbo 40 - Sumu Yedi ya Isa Masiya 1906 Kitamo 1897 Malumbo 1905

¹ Namwindia Mzuri na kuinda kwedi: akaniinamia, akakisikia kiiyo kyangu.

² Akanikweja pia ghati ya iwongo la wasi, ghati ya kitondo kya kushereta: akamawika maghu mangu ibweni, akaiduwija mitongie yangu.

³ Naye egera kivino kisha itumbuni hangu, nikyo luisiso hena Izuwa wetu: weingi weneiwona, na weneondoka, na wenemwitikija Mzuri.

⁴ Etasiwa mundu emwosha Mzuri luing’idaki lwakwe: na teyoaye wenye mafuti, nete wala wegharuka mbai hena maongo.

⁵ Meingi, Ee Mzuri Izuwa wangu, marighio umaareha, na makusaro mako hetu: temeidima kutarwa hako; nikakunda kumatoranya na kumatetia, nimo meingi mekelie kutarika.

⁶ Itasi na mang’olwa toumakundie; umajughua masikio mangu: itasi la kushota na itasi la ng’oki toumaendawe.

⁷ Niho nitetie, Yoa, naza: ghati ya kikodo kya kitamo natamiwa.

⁸ Nakunda kuketa sandu ukundie We, Ee Izuwa wangu: ee, sheria lako lioho ngoroni hangu.

⁹ Natoranya ngalo ghati ya mawunganyiko mabaha: yoa, sikaiswija miomo yangu, Ee Mzuri, watisiwa.

¹⁰ Siwisami ngalo yako ngoroni hangu; nalutoranya luitikijo lwako na lukio lwako: simawisiami mawunganyiko mabaha lukundo lwako na kididi yako.

¹¹ Usiniime malusario medi mako, Ee Mzuri: lukundo lwako na kididi yako jinirinde misi yose.

¹² Amu mawiwi mesitarika menijunguluka mbai jose, matekwa mangu manigura, nisiidime kuwushija meso mangu: nimo meingi kukela nyui ja mtwi wangu, na ngoro yangu yasokea ndeni hangu.

¹³ Uisejwe, Ee Mzuri, hena kunikija: usare kunighenja, Ee Mzuri.

¹⁴ Wagurwe ni soni na warighiwe hamwe, wala waienda ngoma yangu wainyamare: wagharushwe nyuma na wawone nguruna, wala weizihirwa ghati ya mawinyo mangu.

¹⁵ Washighwe wenye amu ya nguruna yawo: wala weniwurra, We, we!

¹⁶ Wose wakuenda we waizihirwe na waisejwe ghati yako: na wala welukunda lukio lwako waghambe misi yose, Mzuri arumishwe.

¹⁷ Kake nimi mkiwa na mbaiya; Mzuri enikumbuka: niwe lughenjo lwangu na mukija wangu; usisheshe, Ee Mzuri wangu.