Malumbo 37 - Sumu Yedi ya Isa Masiya 1906 Kitamo 1897 Malumbo 1905

¹ Usikurishe wasi amu ya wala weketa viwiwi: nete usiwaneng’e wala wevihira visina ngalo.

² Amu afuhi wenetemwa sa mani: na wenenyaruka sa kimeo kiwisi.

³ Uitikije hena Mzuri, na ukete vyedi: ikaa isangeni, ureluratera luitikijo.

⁴ Ukuiseje pia ghati ya Mzuri: na enekuinga vila vikundike ngoroni hako.

⁵ Uiwike nzia yako hakwe Mzuri: uitikije hena ye, na eneifisha.

⁶ Eneiosha ngalo yako kufuma sa kyangaji: na wuchili wako sa hemusi.

⁷ Soghoka hakwe Mzuri, umwinde hena kugumiria: usikurishe wasi amu ya ula eketa nguwari nzieni hakwe, amu ya mundu efisha makusaro mawiwi.

⁸ Ushighe kuregija, utane na oro: usikurishe wasi, amu ni hena kuketa viwiwi.

⁹ Amu waketi‐viwiwi wenechika: kake wala wemwinda Mzuri, wenelihoja isanga.

¹⁰ Amu kutera kadongo, na wawiwi wenesoweka: ee, unehayoa muno handu hakwe, na tekaokaye.

¹¹ Kake wahoo wenelihoja isanga: na wenekuiseja na luworo lwingi.

¹² Wawiwi wela ngiliwata wanga yakwe mwenye ngalo: na emtafunia majegho makwe.

¹³ Mzuri enemsekia: amu ewona ti musi wakwe waza.

¹⁴ Wawiwi weidiwa kujuta muhandi, na kuhinda wuta: waghushe wakiwa na wala wesowa vindu, wakome wala weirowili nzieni.

¹⁵ Muhandi wawo uneingia na ngoro yawo wenye: na mawuta mawo menebaika.

¹⁶ Keba kidongo mwenye ngalo ekihete: kukela wuingi wa wawiwi weingi.

¹⁷ Amu mikono yawo wawiwi inebaika: kake Mzuri emwimusha mwenye ngalo.

¹⁸ Mzuri eitisiwa misi ya wairowili: na uhoja wawo uneoka wa ndarasi.

¹⁹ Tewekaoke na soni magheri ma viwiwi: na misi ya nzaa weneighuta.

²⁰ Kake wawiwi weneteka, na maring’a makwe Mzuri weneoka sa marisho medi: weneiting’o, sa moshi weneiting’o deng’e.

²¹ Wawiwi wahakua, wasiihewa: kake mwenye ngalo eketa hena kuora, na eng’ola.

²² Amu wala wetasiwe na ye wenelihoja isanga: na wala weseswa na ye wenechiwa.

²³ Mitongie ya mundu yadindijwa na Mzuri: na eisejwa na nzia yakwe.

²⁴ Ekigwa, tekaghushwa deng’e: amu Mzuri emwimusha na mkono wakwe.

²⁵ Niokie mdongo, na ingeriaha nakua: kake simewonami mwenye ngalo eshighwa, nete waana wakwe weomba kidjo.

²⁶ Hemusi puti eketa na kuora, na ehakusha: na waana wakwe wetasiwa.

²⁷ Shigheni viwiwi, keteni vyedi: mureikaa ndarasi.

²⁸ Amu Mzuri ekundie wuchili, na tewashighaye washenete wakwe: werindwa ndarasi, kake waana wa mbiwi wenechwiwa.

²⁹ Wenye ngalo wenelihodja isanga: na wenetua uko ndarasi.

³⁰ Itumbu la mwenye ngalo lakutetia kucha: na lumi lwakwe lwaghamba wuchili.

³¹ Sheria ya Izuwa wakwe ioho ngoroni hakwe: mawato makwe temekashereta nete limwe.

³² Mbiwi emyoa mwenye ngalo: na eenda nzia ya kumkoma.

³³ Mzuri temshighaye mkononi hakwe: nete temchiliaye magheri eingia na wuchili.

³⁴ Mwinde Mzuri, na uigure nzia yakwe; na enekukweja ulihoje isanga: wawiwi wekichwiwa, unewona.

³⁵ Nimbonie mbiwi mwenye zinya nyingi: ekikuronga sa mti mbisi umea handu hakwe.

³⁶ Kake mwe evetie, na yoa, teohoye: ee, nikamwenda, asiidime kuwonwa.

³⁷ Yoa nezo mundu eirowili, na yoa ula erongeke: amu kuidiwika kwa mundu ula luworo.

³⁸ Kake watekwa, wenenyamarwa hamwe: kuidiwika kwawo wawiwi kunechika.

³⁹ Kake lukio lwawo wenye ngalo ni lwa kufuma hakwe Mzuri: niye boma yawo magheri ma wasi.

⁴⁰ Na Mzuri ewaghenja, na ewakija: ewakija ghati ya wawiwi, na ewahodja, amu wemdindikia.