Malumbo 35 - Sumu Yedi ya Isa Masiya 1906 Kitamo 1897 Malumbo 1905

¹ Ulelane, ee Mzuri, na wala welelana na mi: ubighane na wala webighana na mi.

² Ugure ngao mbaha na ndongo: na uimuke hena lughenjo lwangu.

³ Ung’olewa ichumo, urewafingia wala weniratera nzia: uiwurre ngoro yangu, Nimi lukio lwako.

⁴ Wala weienda ngoro yangu wagurwe ni soni na waetwe na nguruna: wala weniendia viwiwi wagharushwe nyuma na warishwe wasi.

⁵ Waoke sa makekeshwa msongorana wa ngungu: na malaika wa Mzuri ekishukuma.

⁶ Nzia yawo ioke na kija na kushereta: na malaika wa Mzuri ekiwaratera.

⁷ Amu wesina lukake weniwisia nyavu yawo iwongoni: wesina lukake weiforia ngoro yangu.

⁸ Kunyamarwa kumzie turu na turu, na nyavu yakwe eiwisie imgure mwenye: agwe ndeni yakwe hena kunyamarwa.

⁹ Na ngoro yangu ineisejwa ghati ya Mzuri: ineizihirwa ghati ya lukio lwakwe.

¹⁰ Mawindi mangu mose meneghamba, Mzuri, niani efwanana na we, umkija mkiwa hena ula ena zinya kukela ye: ee, mkiwa na mwenye wasi hena ula emhora.

¹¹ Wang’oli‐mburi wesina ngalo wewuka: weniwujanya mburi ya vindu nisivitisiwa.

¹² Wenihunduiya viwiwi hena vyedi: hena kuihora ngoro yangu.

¹³ Kake mi, wekinawadjue, nidokie gunia; nikairisha wasi ngoro yangu hena kuchunga: luombo lwangu lukanihundukia mbafuni.

¹⁴ Nikaketa sandu ekioka mbuyaa kana mundwetu: nikakuinamija nikiiya, sa mwenye kufwiwa ni mee.

¹⁵ Kake nikinachingilike weizihirwe, wakakuwunganya hamwe: wenye kubigha wakakuwunganya wanga yangu, nisitisiwe; wakanibaja, wasiting’o.

¹⁶ Sa wenye kusola viwiwi ghati ya karamu: wakanitafunia majegho.

¹⁷ Mzuri, mtano rini uneyoa: uikije ngoro yangu ghati ya kunyamara kwawo, mkundwa wangu ghati ya simba.

¹⁸ Ninekuanjela ghati ya matorano mabaha: ninekuisisa ghati na ghati ya wandu weingi.

¹⁹ Wala maring’a mangu wasiizihirwe wanga yangu hena maongo: nete wala wenisua hesina lukake wasikonye na ijiso.

²⁰ Amu tewetetawo luworo: kake weenda viteto vya ukeleki wanga ya wala wahoo wa isanga.

²¹ Ee, weniaramijia itumbu lawo: wakaghamba, We, we, ijiso letu lawona.

²² We wawona, ee Mzuri; usihuje: ee Mzuri, usioke hae kufuma hangu.

²³ Ukuwushe, na uwuke hena wuchili wangu: hena mburi yangu, Izuwa wangu na Mzuri wangu.

²⁴ Unichilie, ee Mzuri Izuwa wangu, hena ngalo yako: na wasiizihirwe wanga yangu.

²⁵ Wasighambe ngoroni hawo, We, ni huwo tukundie: wasighambe, Twaidiwa kummija.

²⁶ Wala waizihirwa hena kuwinywa kwangu wagurwe ni soni na warishwe wukiwa hamwe: wala wekurumisha wanga yangu wadoke soni na nguruna.

²⁷ Wala weikundie mburi yangu ya ngalo waloze hena kuizihirwa na waisejwe: ee, waghambe wasiiting’o, Mzuri arumishwe, Eye eisejwa hena kuketa nguwari kwa mzoro wakwe.

²⁸ Na lumi lwangu luneitetia ngalo yako: na luisiso lwako hemusi puti.