Malumbo 33 - Sumu Yedi ya Isa Masiya 1906 Kitamo 1897 Malumbo 1905

¹ Izihirweni ghati ya Mzuri, unywi wenye ngalo: luisiso ni lwedi hena wairowili.

² Mwanjeleni Mzuri hena kinubi: mbinieni maluisiso hena kinanda kya nzighi ikumi.

³ Mbinieni kivino kisha: bigheni kinanda hena ng’eno na kilozo kibaha.

⁴ Amu kiteto kyakwe Mzuri kirongeke: na ndima yakwe yose yaketika hena luitikijo.

⁵ Ekundie ngalo na wuchili: masanga meizua lukundo lwakwe Mzuri.

⁶ Hena kiteto kyakwe Mzuri vya wanga vikaarehika: na lweriri lwawo lwose hena kuhema kwa itumbu lakwe.

⁷ Ejiwunganya mbombe ja bahari hamwe sa kizumbu: ehawisa heforeke vilaloni.

⁸ Masanga mose mamwondoke Mzuri: na wose wetue masangeni wamwituke.

⁹ Amu etetie, kikaarehika: akaaghanya, kikaimuka nezo.

¹⁰ Mzuri eitesha mburi ya mbare: emaosha makusaro ma wandu kunyamarika.

¹¹ Mburi yakwe Mzuri yaimuka ndarasi: makusaro ma ngoro yakwe hena marika mose.

¹² Itasiwa mbare ila, Izuwa wakwe niye Mzuri: wandu ewasawurie waoke uhoja wakwe mwenye.

¹³ Mzuri eyoa kufuma wanga: ewawona waana wa wandu wose.

¹⁴ Kufuma handu ha kutua kwakwe eyoa: wanga ya wose wetua masangeni.

¹⁵ Eye ejiareha ngoro jawo wose: ejigheshijia ndima jawo jose.

¹⁶ Tehenaho mfumwa ekijwa hena lweriri lubaha: mundu mwaaria tekijwa hena zinya mbaha.

¹⁷ Frasi ni kindu kihaya hena kukija: nete teng’olaye mundu hena zinya mbaha yakwe.

¹⁸ Yoa, ijiso lakwe Mzuri lioho wanga yawo wemwondoka: wanga yawo weing’idaki ghati ya lusario lwakwe.

¹⁹ Awakije ngoro yawo ghati ya kifwa: na awarinde na moo magheri ma nzaa.

²⁰ Ngoro yetu yamwinda Mzuri: niye lughenjo lwetu na ngao yetu.

²¹ Amu ngoro yetu ineizihirwa hena ye: amu twaitikija hena izina lakwe lishenete.

²² Lusario lwako, ee Mzuri, luoke wanga yetu: sandu twaing’idaki hena we.