Malumbo 32 - Sumu Yedi ya Isa Masiya 1906 Kitamo 1897 Malumbo 1905

¹ Etasiwa ula, kutekwa kwakwe kwashighiwa: na ng’oki yakwe yafinikirwa.

² Etasiwa mundu, Mzuri asimtarie viwiwi: na ngoroni hakwe tehenaho ukeleki.

³ Nikinahuje, mawindi mangu meokie mekikua: hena kururuma kwangu hemusi puti.

⁴ Amu hemusi na kio mkono wako uemee wanga yangu: na mbombe yangu ikagharuka kuoka kuoma kwa irukiruki.

⁵ Nikaighamba ng’oki yangu msongorana wako: nete owiwi wangu siuwisami.

⁶ Nitetie, nineghamba matekwa mangu msongorana wakwe Mzuri: ukaushighia owiwi wa ng’oki yangu.

⁷ Hena iyo mundu ose wedi akuombe magheri ma kuwonwa kwako: kididi mbombe mbaha jikivimba tejikamfikia.

⁸ Niwe handu ha kukuwisa hangu; unenirinda nisiwone wasi: unenijunguluka na vivino vya lukio.

⁹ Ninekuaghanya na ninekulosha ghati ya nzia ila uneitongia: ninekuinga mburi, na ijiso langu wanga yako.

¹⁰ Musioke sa frasi na nyumbu, jisina kucha: mahambo mawo lijamu na hatamu ja kujiswija, kwakicha si huwo tejikusongeria.

¹¹ Mawukiwa meingi meneoka hena wawiwi: kake ula eitikija hena Mzuri, lusario lunemjunguluka.

¹² Muisejwe ghati ya Mzuri, na izihirweni, unywi wenye ngalo: na lozeni hena kuizihirwa unywi wose muirowili ngoroni.