Malumbo 31 - Sumu Yedi ya Isa Masiya 1906 Kitamo 1897 Malumbo 1905

¹ Ghati yako, ee Mzuri, nawika luing’idaki lwangu; nisigurwe ni soni ndarasi: unikije ghati ya ngalo yako.

² Uniinamijie isikio lako, unikije wangu: uoke ibwe lidindie hangu, nyumba ya lurindo ya kunikija.

³ Amu niwe ibwe langu na boma yangu: hena iyo unitike na unirongoje hena lwa izina lako.

⁴ Uning’ole ghati ya nyavu wenigeria hena mbiso: amu niwe boma yangu.

⁵ Mkononi hako nawika ngoma yangu: wanikombola, ee Mzuri, Izuwa wa kididi we.

⁶ Nawasua wala weyoa vihaya vya maongo: kake naitikija hena Mzuri.

⁷ Nineisejwa na nineizihirwa ghati ya lusario lwakwe: amu wauwona wasi wangu, wamatisiwa mawukiwa ma ngoro yangu.

⁸ Tounifingawe mkononi ha mring’a: wamawika maghu mangu na handu habaha.

⁹ Unisarie, ee Mzuri, amu nioho na wukiwa: ijiso langu likundie kuteka hena lushinio, ee, ngoro yangu na muri wangu.

¹⁰ Amu kukia kwangu kwatonga na wukiwa, na miaka yangu na kusumukia: zinya yangu yaduhuka amu ya owiwi wangu, na mawindi mangu manyonga.

¹¹ Amu ya wazo wangu wose niokie nguruna: ee, muno hena walatya wangu, na kuondoka hena wala wenitisiwa.

¹² Wala weniwona shighati wenimatukie: naiwaawa ngoroni sa efwie, niokie sa kiya kibajike.

¹³ Amu nisikie machunganyo ma weingi, kuituka kwa mbai jose: wekila ngiliwata hamwe wanga yangu, wekiareha ukeleki wanikome.

¹⁴ Kake niitikije hena we, ee Mzuri: nikaghamba, Niwe Izuwa wangu.

¹⁵ Magheri mangu meoho mkononi hako: uning’ole mkononi na ha wala wenikinya.

¹⁶ Uuangaje wusho wako wanga ya muzoro wako: unikije ghati ya lukundo lwako.

¹⁷ Nisigurwe ni soni, ee Mzuri, amu nikuitangie: wawiwi wagurwe ni soni, wahuje ghati ya Sheol.

¹⁸ Miomo yenye kuchwa‐maongo ihuje: iwaetie nyare wenye ngalo, na mafuti na kudaa.

¹⁹ Nize uwedi wako ni wingi, uwawikie wala wekuondoka: uwaarehia wala weitikija hena we, msongorana wa waana wa wandu.

²⁰ Ghati ya finikiro la kuikaa kwako unewawisa hena ngiliwata ja wandu: unewarinda na mbiso ghati ya hema hena malelano ma malumi.

²¹ Atasiwe Mzuri: amu eniwondja lukundo lwakwe lwa kuing’asija ghati ya kiongo kina zinya.

²² Amu nitetie nikisara, Nachika mesoni hako: kake usikie ighonda la kusemba kwangu nikinakuiyie.

²³ Mkundeni Mzuri, unywi wose mushenete wakwe: Mzuri ewarinda waitikiji, na emng’olia viingi mwenye kuketa hena mafuti.

²⁴ Mudinde, na ngoro yenyu ikarie: unywi wose muing’idaki hena Mzuri.