Malumbo 27 - Sumu Yedi ya Isa Masiya 1906 Kitamo 1897 Malumbo 1905

¹ Mzuri niye kyangaji kyangu na lukio lwangu; nimwituke niani: Mzuri niye zinya ya moo wangu; nimwondoke niani?

² Wekinanizie waketi‐viwiwi nesa wale nyama yangu: wazo wangu na maring’a mangu, webighie msadara wakagwa.

³ Ikioka lweriri lwatua wanga yangu, ngoro yangu teineituka: ikioka ngondo yawuka wanga yangu, niho pia nineitikija.

⁴ Kindu kimwe naomba hena Mzuri, nikyo ninekienda: nitue nyumbeni ha Mzuri misi yose ya kukia kwangu, kuuyoa uwedi wa Mzuri, na kuomba ghati ya hekalu lakwe.

⁵ Amu ghati ya musi wa wasi enenirinda na mbiso ghati ya hema lakwe: ghati ya finikiro la hema lakwe eneniwisa; eneniwushija wanga ya ibwe.

⁶ Na ingeriaha mtwi wangu unewushijwa: wanga ya maring’a mangu wa mbai yose.

⁷ Nineng’ola ghati ya hema lakwe matasi ma luizihiro: ninevina, ee, ninevina maluisiso hena Mzuri.

⁸ Usikie, ee Mzuri, nikiiya na ighonda langu: unisarie pia, na unitalwe.

⁹ Ukinaghambe, Endeni wusho wangu: ngoro yangu ikuwurrie, Wusho wako, ee Mzuri, nineuenda.

¹⁰ Usiniwisie wusho wako: usimkinye muzoro wako ghati ya kuregija kwako.

¹¹ Uokie lughenjo lwangu: usinikinye nete usinishighe, ee Izuwa wa lukio lwangu.

¹² Amu apa na iya wenishigha: kake Mzuri eneniwushija.

¹³ Uniloshe nzia yako, ee Mzuri: na unitike ghati ya nzia irongeke, amu ya maring’a mangu.

¹⁴ Usinigere mikononi ha maring’a mangu: amu weng’oli‐mburi wa maongo waniwukia, na wenye kuteta viwiwi.

¹⁵ Kwakicha nikisokea, nisiitikija kuwona uwedi wa Mzuri: ghati ya isanga lawo wenye moo.

¹⁶ Mwinda Mzuri: duwa, ngoro yako idinde; ee, mwinda Mzuri.