Malumbo 25 - Sumu Yedi ya Isa Masiya 1906 Kitamo 1897 Malumbo 1905

¹ Hako, Ee Mzuri, nawushija ngoma yangu: Ee Izuwa wangu, nakuitikija We.

² Nisigurwe ni soni: nete maring’a mangu wasining’arie.

³ Ee, tehena ekuinda We enegurwa ni soni: wala wenegurwa ni soni weketa hena urenge wesho.

⁴ Uniwondjia nzia jako, Ee Mzuri: uniloshe mavetio mako.

⁵ Unirongoje ghati ya kididi yako, na uniloshe: amu niwe Izuwa wa lukio lwangu; nakuinda We hemusi puti.

⁶ Umakumbuke, Ee Mzuri, masario mako na malukundo mako: amu meokie ndarasi too kae.

⁷ Usijikumbuke ng’oki ja wudongo wangu, nete matekwa mangu: hena lukundo lwako unikumbuke, hena lwa uwedi wako, Ee Mzuri.

⁸ Wedi na eirowili Mzuri: amu ya iyo enelosha wenye ng’oki nzieni.

⁹ Enewarongoja wahoo ghati ya wuchili: enewalosha wahoo nzia yakwe.

¹⁰ Nzia jose ja Mzuri ni lukundo na kididi: hena wala wegura aghanyo lakwe na mburi jakwe.

¹¹ Hena lwa izina lako, Ee Mzuri: unishighie kutekwa, amu kubaha.

¹² Mundu uhi niye emwondoka Mzuri: enemlosha na nzia eneisaghura.

¹³ Ngoma yakwe inetua na lusowoko: na waana wakwe wenelihodja isanga.

¹⁴ Ngiliwata ya Mzuri ni hamwe na wala wemwondoka: na enewawondjia aghanyo lakwe.

¹⁵ Meso mangu misi yose meoho ha Mzuri: amu niye eneng’ola maghu mangu ghati ya nyavu.

¹⁶ Ukugharushe hangu, na unisarie: amu nina kihebu na nala wasi.

¹⁷ Mawukiwa ma ngoro yangu maneta: uning’ole ghati ya mawasi mangu.

¹⁸ Uyoe wasi wangu na ndima yangu: na unishighie ng’oki jangu jose.

¹⁹ Umayoe maring’a mangu, amu ni meingi: na wenisua na lusugho lukaehe.

²⁰ Unirinde ngoma, unikije: nisigurwe ni soni, amu nakuitikija We.

²¹ Wuirowili na wusheneto wunirinde: amu nakuinda We.

²² Umkombole Israeli, Ee Izuwa: ghati ya mawasi makwe mose.