Malumbo 19 - Sumu Yedi ya Isa Masiya 1906 Kitamo 1897 Malumbo 1905

¹ Wanga jakitoranya kirumi kya Izuwa: mwanya wa ghati utinda mburi ya ndima yakwe.

² Hemusi yang’ola kiteto hena hemusi: na kio kyang’ola lutisiwo hena kio.

³ Tehena nete viteto nete vighambo: ighonda lawo teliidima kusikiwa.

⁴ Mtambara wawo uvetia ghati ya masanga mose, na viteto vyawo mtano kuidiwika kwa masanga: ghati yawo egera hema hena nzano.

⁵ Niyo sa mwenye‐ngasu ekifuma na nyumba yakwe: na yaizihirwa sa mundu mwaaria ekitonga na nzia yakwe.

⁶ Mifumie yakwe ni kufuma kuidiwika kwa masanga, na kujunguluka kwakwe mtano miidiwiko yakwe: nete tehena kindu kyawiswa hena moto wakwe.

⁷ Sheria lakwe Mzuri liirowili, likidindija ngoma: mburi ya Mzuri iduwie, ikiwacheija wetomode.

⁸ Maitanawo makwe Mzuri merongeke, mekiiseja ngoro: aghanyo lakwe Mzuri lizerre, likiangaja meso.

⁹ Luondoko lwa Mzuri luzerre, lukiikaa ndarasi: mawuchili ma Mzuri ma singisi, na ma ngalo deng’e.

¹⁰ Nimo ma kukundika kukela thahabu, ee, kukela thahabu yedi: menonie pia kukela nzoke na malala ma nzoke.

¹¹ Nawa henamo esinga lako ewondjwa: na hena kumagura ewona mbucha nyingi.

¹² Niani ula etisiwa matekwa makwe: unizerrije ghati ya vindu viwisiwe.

¹³ Umswije esinga lako pia ghati ya ng’oki ja mafuti; jisiniitorie: niho nineirowili, na ninezerrika ghati ya kutekwa kubaha.

¹⁴ Viteto vya itumbu langu na makusaro ma ngoro yangu makundike na We misi yose: Ee Mzuri, Ibwe langu, na Mkombola wangu.